სომხეთის პრემიერ-მინისტრმა რუსული იარაღი გააკრიტიკა, მოსკოვში ის სიცრუეში დაადანაშაულეს
სომხეთის პრემიერ-მინისტრმა ნიკოლ ფაშინიანმა 2021 წელს, პირველი დიდი ინტერვიუ მისცა. ერთ-ერთი ადგილობრივი პროდასავლური საინფორმაციო ვებგვერდის ეთერში ნიკოლ ფაშინიანმა ეჭვი გამოთქვა რუსული სარაკეტო კომპლექს „ისკანდერის“ ეფექტიანობაზე. მან განაცხადა, რომ „ისინი არ აფეთქდა ან მხოლოდ 10 პროცენტი აფეთქდა“.
მის განცხადებას უკვე მოჰყვა რუსეთის სახელმწიფო დუმის თავდაცვის კომიტეტის თავმჯდომარის მოადგილის, ვიქტორ ზავარზინის რეაქცია, რომელმაც სომხეთის პრემიერი სიცრუეში დაადანაშაულა.
ყველა დეტალი – „აუფეთქებელ „ისკანდერებზე“ და რუსეთისა და სომხური ოპოზიციის რეაქციის შესახებ პრემიერის განცხადებაზე, შიდაპოლიტიკურ კრიზისსა და ხელისუფლების გეგმებზე.
- „სომხეთი ნიკოლის გარეშე“: ვიდეო ერევნიდან, სადაც ოპოზიციის საპროტესტო აქციები განახლდა
- რის მიღწევას ცდილობს რუსეთი ყარაბაღში? – კომენტარი ბაქოდან
რატომ იმუშავა „ისკანდერმა“ 10 პროცენტით
ინტერვიუს დროს, ნიკოლ ფაშინიანმა კომენტარი გააკეთა ექსპრეზიდენტ სერჟ სარგსიანის ზოგიერთ განცხადებაზე, რომელიც მან 16 თებერვალს, ოპოზიციური ტელეარხის, ArmNews-ის ეთერში გააჟღერა. კერძოდ, ყოფილმა პრეზიდენტმა სომხეთის ხელისუფლება იმაში დაადანაშაულა, რომ მათ არ გამოიყენეს „ისკანდერის“ სარაკეტო კომპლექსები 2020 წლის შემოდგომაზე, ყარაბაღის ომის მე-4-მე-5 დღეს.
ფაშინიანმა საპასუხოდ განაცხადა, რომ ექსპრეზიდენტმა თავად იცის პასუხი საკუთარ კითხვებზე:
„დაე, იკითხოს, რატომ არ აფეთქდა „ისკანდერის“ რაკეტა? ან, მაგალითად, რატომ აფეთქდა 10%?“.
ამ განცხადების შემდეგ, ჟურნალისტი ჩაეკითხა პრემიერს – განა ასე ხდებაო?, რაზეც ფაშინიანმა უპასუხა:
„არ ვიცი. შეიძლება, 80-იანების იარაღის შემთხვევაში“.
ხისტი რეაქცია მოსკოვიდან
რუსეთის სახელმწიფო დუმის თავდაცვის კომიტეტის თავმჯდომარის მოადგილე ვიქტორ ზავარცინმა გააკრიტიკა ნიკოლ ფაშინიანის განცხადებები.
მისი აზრით, ფაშინიანი ასე ცდილობს თავის გამართლებას და ბრალის მოხსნას ყარაბაღის ომში მარცხზე:
„როდესაც ადამიანი ცდილობს, უდანაშაულო იყოს, ის „ისკანდერსაც“ დაადანაშაულებს, სომეხ ხალხსაც და სამხედროებსაც. ეს, რა თქმა უნდა, რეალობას არ შეესაბამება. „ისკანდერი“ – ძალიან მაღალი სიზუსტის იარაღია, ეს არაერთხელ დაადასტურა სხვადასხვა სწავლებისას. ეს აბსოლუტური სიცრუეა [ფაშინიანის სიტყვები], ეს არანაირ ეჭვს არ ექვემდებარება“.
„კიდევ რამდენ ხანს უნდა ვეძებოთ სიმართლე?“ – ოპოზიციის რეაქცია
პრემიერ-მინისტრის ინტერვიუზე კომენტარი გააკეთა ოპოზიციური საპარლამენტო ფრაქცია „განათებული სომხეთის“ ლიდერმა, ედმონ მარუკიანმა.
Facebook-ის საკუთარ გვერდზე ის კითხულობს, რატომ ეწინააღმდეგება სომხეთის ხელისუფლება ყარაბაღის 44-დღიანი ომის შესახებ ფაქტების შემგროვებელი კომისიის შექმნას, თუკი თავად აყენებს ეჭვქვეშ ბევრ მნიშვნელოვან კითხვას – მათ შორის, შეიარაღებასთან დაკავშირებულს:
„მოქმედი და ყოფილი ხელისუფლებების წარმომადგენლები, თავდაცვისა და უსაფრთხოების სფეროს წარმომადგენლები, საველე მეთაურები და დანარჩენები მომავალშიც მისცემენ ინტერვიუებს ომის თემაზე ან მაინც მიხვდებიან პარიტეტული კომისიის შექმნის აუცილებლობას და გამოიჩენენ პოლიტიკურ ნებას მის შესაქმნელად, რათა პასუხები მივიღოთ კითხვებზე, რომელიც ყველას აღელვებს?“.
„ჩვენ არმიის რეფორმა უნდა დავიწყოთ“
„რაც შეეხება საერთოდ ჩვენი რეგიონული უსაფრთხოების სისტემებს, რა თქმა უნდა, ჩვენ უნდა დავიწყოთ არმიის რეფორმა, სტრუქტურული, არსებითი რეფორმები, კერძოდ, შეიარაღებისა და სტრატეგიული შემადგენლის თვალსაზრისით“, – განაცხადა ფაშინიანმა.
პრემიერმა ხაზი გაუსვა, რომ სომხეთი შეეჯახა საშინაო და საგარეო გამოწვევებს, ამიტომ, უშუალოდ ომის დასრულების შემდეგ, მან პრიორიტეტულ საკითხად წარმოადგინა სომხეთსა და მის გარშემო უსაფრთხოებისა და სტაბილურობის უზრუნველყოფა:
„ჩვენ არ შეგვიძლია ვთქვათ, რომ ეს პრობლემა 100%-ით გადაჭრილია, მაგრამ მტკიცე ნაბიჯებით მივიწევთ წინ ამ მიმართულებით“.
არმიაში რეფორმების შესახებ, წინა დღეებში საუბრობდა სომხეთის თავდაცვის მინისტრიც. თანაც, ვაგარშაკ არუთუნიანის თქმით, ისინი უკვე მიმდინარეობს და „ამ პროცესში უშუალოდ არიან ჩართული რუსი კოლეგები“.
ოპოზიციამ ვადამდელი არჩევნები არ მოისურვა
ნიკოლ ფაშინიანმა კომენტარი გააკეთა სომხეთში ვადამდელი საპარლამენტო არჩევნების ჩატარებაზეც. ის თავად გამოვიდა ამ მიმართულებით კონსულტაციების დაწყების ინიციატივით, რათა გადალახულიყო ქვეყანაში პოლიტიკური კრიზისი, რომელიც ომის შემდეგ შეიქმნა. მაგრამ მალევე, თავად მმართველმა პოლიტიკურმა ძალამ განაცხადა უახლოეს მომავალში არჩევნების გამართვის მიზანშეუწონლობის შესახებ.
პრემიერმა განმარტა, რომ არჩევნებზე, პირველ რიგში, უარი თქვა ოპოზიციამ, ამიტომაც მიიღეს ამ საკითხის ივნისამდე გადადების გადაწყვეტილება:
„ზოგიერთი ძალა აპირებს, საპარლამენტო არჩევნები რადიკალური მოქმედებების მოედნად გამოიყენოს, რამაც შეიძლება საფრთხე შეუქმნას შიდა სტაბილურობას და გააძლიეროს საგარეო გამოწვევები. ამიტომ, მივიღეთ რა ოპოზიციის უარი, გადავწყვიტეთ დავუბრუნდეთ ჩვენს „საგზაო რუკას“.
საუბარია ფაშინიანის მთავრობის რეფორმირების გეგმასა და ყარაბაღში საბრძოლო მოქმედებების დასრულების შემდეგ სომხეთში შექმნილი პრობლემების გადაჭრის გზებზე. პრემიერის „საგზაო რუკაში“ გაწერილია მთავრობის მოქმედებები 2021 წლის ივნისამდე.
