სომხეთის ექსპრეზიდენტის ძმისშვილს 5.5 წლით თავისუფლების აღკვეთა მიესაჯა

ერევნის სასამართლომ სომხეთის ექსპრეზიდენტის, სერჟ სარგსიანის ძმისშვილს, ნარეკ სარგსიანს 5.5 წლით თავისუფლების აღკვეთა მიუსაჯა. ის ბრალდებულია იარაღის უკანონოდ შენახვაში, ნარკოტიკებით უკანონოდ ვაჭრობასა და ადამიანის გატაცების ორგანიზებაში. განაჩენის გამოცხადებისას, მოსამართლემ განმარტა, რომ სარგსიანმა გარკვეული პერიოდი უკვე გაატარა პატიმრობაში და აქედან გამომდინარე, მისი პატიმრობის ვადა 3.5 წელიწადში დასრულდება.

მსჯავრდებულმა განაჩენის გამოცხადების შემდეგ, ხელი დაუქნია ჟურნალისტებს და სასამართლოს დარბაზი დატოვა.

ნარეკ სარგსიანი სომხეთის ექსპრეზიდენტის ოჯახიდან და გარემოცვიდან ერთადერთი არ არის, რომელიც 2018 წლის „ხავერდოვანი“ რევოლუციის შემდეგ, სამართალდამცავი ორგანოების ყურადღების ცენტრში აღმოჩნდა. კერძოდ, სისხლის სამართლის საქმეებია აღძრული სერჟ სარგსიანის ძმებზე, ძმისშვილებსა და სიძეზე.

უფრო მეტიც, თავად ყოფილი პრეზიდენტიც (2008-დან 2018 წლამდე) ბრალდებულია ე.წ. დიზელის საქმეზე. ვარაუდობენ, რომ მან 1 მილიონ დოლარზე მეტი საბიუჯეტო სახსრები გაფლანგა.

ყველა დეტალი – კონკრეტულად რაში ადანაშაულებენ ნარეკ სარგსიანსა და მის ახლობლებს. 

• წინასაარჩევნო მხილებები სომხეთში: ექსპრეზიდენტმა სკანდალური ჩანაწერი გამოაქვეყნა

აზერბაიჯანმა სომეხი ტყვეები დანაღმული ადგილების რუკაში გაცვალა

ნარეკ სარგსიანის საქმე

სისხლის სამართლის საქმე ექსპრეზიდენტის ძმისშვილის წინააღმდეგ 2018 წელს აღიძრა და მასზე ძებნა გამოცხადდა.

გასული წლის ექვს დეკემბერს, ნარეკ სარგსიანი პრაღაში აღმოაჩინეს, გვატემალის მოქალაქის, ფრენკლინ გონსალესის სახელზე გაცემული ყალბი პასპორტით.

მან ყველა ბრალდება აღიარა და როგორც ჩანს, სასამართლოს გადაწყვეტილების გასაჩივრებას არ აპირებს.

რაში ადანაშაულებენ ექსპრეზიდენტსა და მის ახლობლებს

სომხეთის ექსპრეზიდენტი სერჟ სარგსიანი ბრალდებულია ე.წ. დიზელის საქმეზე. ვარაუდობენ, რომ მან 1 მილიონ დოლარზე მეტი საბიუჯეტო სახსრები გაფლანგა.

ყოფილი პრეზიდენტის საქმეზე წინასწარი გამოძიება 2020 წლის იანვარში დასრულდა. საგამოძიებო ორგანოებმა შეკრებილი მტკიცებულებები ბრალის წარდგენისა და საქმის სასამართლოსთვის გადაცემისთვის საკმარისად მიიჩნიეს.

თავად სახელმწიფოს ყოფილი მეთაური ბრალს არ აღიარებს და ამ საქმეს პოლიტიკურ დევნად მიიჩნევს.

სერჟ სარგსიანის გარდა, სამართალდამცავი ორგანოების ყურადღების ცენტრში აღმოჩნდნენ მისი ახლობლებიც.

სისხლის სამართლის საქმეა აღძრული სერჟ სარგსიანის უფროსი ძმის, ლევონ სარგსიანის წინააღმდეგ. მას განსაკუთრებით დიდი ოდენობის თანხების მოპარვაში ადანაშაულებენ.

ექსპრეზიდენტის კიდევ ერთი ძმისშვილი – აიკ სარგსიანი – 2018 წელს, მკვლელობის მცდელობაში იყო ეჭვმიტანილი.

სისხლის სამართლის საქმეა აღძრული სერჟ სარგსიანის მეორე ძმის – ალექსანდრ სარგსიანის წინააღმდეგაც. მას განსაკუთრებით დიდი მასშტაბის თაღლითობაში ადანაშაულებენ.

სერჟ სარგსიანის სიძეს, მიკაელ მინასიანს ადანაშაულებენ უკანონოდ გამდიდრებაში, შემოსავლების შესახებ ყალბი ინფორმაციის დეკლარირებასა და დანაშაულებრივი გზით მიღებული ქონების ლეგალიზაციაში. სომხეთის სასამართლომ არაერთხელ მიიღო გადაწყვეტილება მისი დაპატიმრების შესახებ, მაგრამ გასაჩივრების შემდეგ, მას ბრალს უხსნიდნენ. თავად მინასიანი სომხეთის ფარგლებს გარეთ იმყოფება, მაგრამ კონკრეტულად სად – უცნობია.

მიკაელ მინასიანის მამას ანუ ექსპრეზიდენტის მძახალსაც წარუდგინეს ბრალი განსაკუთრებით მსხვილი მასშტაბის თანხების მითვისების, ძალაუფლების ბოროტად გამოყენებისა და დოკუმენტების გაყალბებისათვის. არა მინასიანი მრავალი წლის განმავლობაში ხელმძღვანელობდა „სურბ გრიგორ ლუსაროვიჩის“ სამედიცინო ცენტრს. რევოლუციის შემდეგ, ის თანამდებობიდან გადააყენეს.