სომხეთის პარლამენტმა ოპოზიციური ფრაქციის ლიდერს დეპუტატის იმუნიტეტი შეუჩერა

16 ივნისს სომხეთის პარლამენტმა ოპოზიციური ფრაქცია „აყვავებული სომხეთის“ ლიდერის, გაგიკ ცარუკიანისთვის დეპუტატის იმუნიტეტის ჩამორთმევის გადაწყვეტილება მიიღო.

მას ბრალად ედება 2017 წლის საპარლამენტო არჩევნების წინ იმ ჯგუფის შექმნა, რომელიც ამომრჩევლებს ქრთამს ურიგებდა.

15 ივნისს გენერალურმა პროკურორმა პარლამენტს დეპუტატ ცარუკიანის მიმართ სისხლის სამართლის დევნის, მისი ბრალდებულად ცნობისა და მისთვის თავისუფლების აღკვეთის შუამდგომლობით მიმართა. ამავდროულად, ეროვნული საკრებულოსთვის წარდგენილ დოკუმენტში ნათქვამია, რომ გამოძიებამ მის წინააღმდეგ ჯერ კიდევ 2020 წლის თებერვალში აღძრული სისხლის სამართლის საქმის ფარგლებში ბრალის დადასტურება შეძლო. 

ამავდროულად თავად დეპუტატი და ქვეყნის ერთ-ერთი ყველაზე მსხვილი ბიზნესმენი თავის ბრალს უარყოფს. მეტიც, ის ირწმუნება, რომ ბრალდება – ნაჩქარევად „შეკერილი“ საქმე და დაუფარავი პოლიტიკური დევნა მის ბოლო ხმამაღალ განცხადებას უკავშირდება – 5 ივნისს მან მოქმედ მთავრობას მოუწოდა, რომ გადამდგარიყო, რადგან ის თავის მოვალეობას ვერ უმკლავდება.

გაგიკ ცარუკიანმა განაცხადა: მის მიმართ სისხლის სამართლის დევნა მანამდე რომ დაწყებულიყო, ვიდრე ის მთავრობას სრულ ჩავარდნაში დაადანაშაულებდა, შესაძლოა, მას კიდევ ეჭვი შეჰპარვოდა. მაგრამ დევნა მის მიერ მთავრობის გადადგომის მოთხოვნის შემდეგ დაიწყო, და შესაბამისად, ეს პოლიტიკური დაკვეთაა.

სომხეთის ეროვნულ საკრებულოში ოპოზიცია ორი პარტიით არის წარმოდგენილი. ერთ-ერთი მათგანია „აყვავებული სომხეთი“, რომლის ლიდერიც არის გაგიკ ცარუკიანი. ამ პარტიას 25 მანდატი აქვს. პარტია „განათლებულ სომხეთს“ კი – 18 მანდატი.

მიუხედავად იმისა, რომ ყველა ოპოზიციონერი ცარუკიანისთვის დეპუტატის იმუნიტეტის ჩამორთმევის წინააღმდეგ გამოდიოდა, მათი ხმები რაიმე გადაწყვეტილების მისაღებად არასაკმარისია. მათ კენჭისყრაზე უარი განაცხადეს და მასში მხოლოდ მმართველი უმრავლესობის დეპუტატები მონაწილეობდნენ. ფარულ კენჭისყრაში მონაწილე „ჩემი ნაბიჯის“ 87-ვე დეპუტატმა ცარუკიანისთვის დეპუატატის იმუნიტეტის ჩამორთმევას მისცა ხმა. 

პარლამენტის სხდომის პარალელურად, მის შენობასთან გაგიკ ცარუკიანის მომხრეების საპროტესტო აქცია მიმდინარეობდა. მიტინგი არასანქცირებული იყო და ასზე მეტი ადამიანი დააკავეს.

• სომხეთი: საპროტესტო აქცია ეროვნული უშიშროების სამსახურის შენობასთან, სადაც მსხვილი ბიზნესმენისა და ოპოზიციური პარტიის ლიდერის დაკითხვა მიმდინარეობს
• სომხეთი: ექს-პრეზიდენტის სიძემ პრემიერის ცოლი სიგარეტის კონტრაბანდასთან კავშირში დაადანაშაულა

ცარუკიანის გამოსვლა პარლამენტში

მან გაიხსენა, რომ ხელისუფლების შეცვლის პირველივე დღეებიდან, ანუ 2018 წლის ხავერდოვანი რევოლუციის შემდეგ ახალ ხელისუფლებას მხარს უჭერდა, ხელი მოაწერა მთავრობასთან თანამშრომლობის მემორანდუმს, დახმარება სურდა. ცარუკიანმა განაცხადა, რომ სომხეთის ეკონომიკაში 20 მილიარდი დოლარის ოდენობის ინვესტირება განახორციელა.

ამავდროულად, მისი აზრით, თავიანთთვის ფეიკებით ვირტუალური სამყარო შეიქმნეს და პერიოდულად მის მაკომპრომეტირებელ დეზინფორმაციას ავრცელებენ – ბიზნესმენმა მთავრობას მიმართა და განაცხადა:

 „უკვე ორი წელიწადია, ხალხს დაპირებებს აძლევთ. მაგრამ ეს ყველაფერი ტყუილია. თქვენ ყველაფერი ჩააფლავეთ“.

 გამოსვლის შემდეგ ცარუკიანმა სხდომათა დარბაზი დატოვა. პარლამენტის შენობასთან მას ეკონომიკური უსაფრთხოებისა და კორუფციის აღკვეთის დეპარტამენტის ხელმძღვანელის მეთაურობით,  ეროვნული უშიშროების სამსახურის თანამშრომლები დახვდნენ.

მიკაელ ამბარცუმიანმა ჟურნალისტების შეკითხვებს უპასუხა იმის თაობაზე, თუ რა ესაქმებოდა ეროვნული უშიშროების სამსახურს ეროვნული საკრებულოს ეზოში, თუკი გაგიკ ცარუკიანს იმუნიტეტი ჯერ ჩამორთმეული არ აქვს. მან მხოლოდ ის თქვა, რომ მათ შორის დაკითხვის ჩატარების შესახებ არსებობს შეთანხმება, და ცარუკიანი ეროვნული უშიშროების სამსახურის თანამშრომლებთან ერთად დაკითხვაზე წავიდა.

ჩხრეკა და დაკითხვა წინა დღეს

კვირას, 14 ივნისს, დილიდან გაგიკ ცარუკიანის სახლში ჩხრეკა ჩატარდა. ამის შემდეგ ის ეროვნული უშიშროების სამსახურში დაკითხვაზე დაიბარეს.

იუწყებოდნენ, რომ დეპუტატი მოწმის სახით დაიკითხებოდა. იმავდროულად ეროვნული უშიშროების სამსახურმა სისხლის სამართლის იმ სამი საქმის შესახებ გაავრცელა ცნობა, რომლებშიც ბრალი ცარუკიანს ედებოდა. საუბარი ეხებოდა სათამაშო ბიზნესის სფეროში  მისი კომპანიის არაკანონიერ საქმიანობას და 2017 წლის საპარლამენტო არჩევნების დროს ამომრჩევლებისთვის ქრთამის მიცემას.

ცარუკიანის მომხრეები და თანაპარტიელები ეროვნული უშიშროების შენობის წინ  დაახლოებით 10 საათის განმავლობაში მართავდნენ საპროტესტო აქციას. იმასთან დაკავშირებით, რომ სომხეთში კორონავირუსის გამო საგანგებო მდგომარეობის რეჟიმი გრძელდება და ყველა მასობრივი ღონისძიება აკრძალულია, პოლიცია დროდადრო აქციის მონაწილეებს აკავებდა. საბოლოოდ ორასზე მეტი ადამიანი დააკავეს.

ადვოკატის განცხადება

გაგიკ ცარუკიანის ადვოკატს მიაჩნია, რომ მის დაცვის ქვეშ მყოფს არავითარი კავშირი არ აქვს სისხლის სამართლის იმ საქმეებთან, რომლებშიც მას ბრალი ედება, და მისთვის ხელშეუხებლობის ჩამორთმევის არავითარი საფუძველი არ არსებობს.

„სისხლის სამართლის საქმე აბსოლუტურად უკანონო და დაუშვებელი, რადგან როგორც განცხადებებში, ისე კომენტარებში გამოთქმული აზრების მიხედვით, შეგვიძლია დავამტკიცოთ: ბატონის ცარუკიანის წინააღმდეგ აშკარა სისხლის სამართლის დევნა დაიწყეს. იურისპრუდენციაში არსებობს ასევე „ფარული“ სისხლის სამართლის დევნის ცნება. მაგრამ აქ ასეთი მცდელობაც კი არ არის“, – განაცხადა ემინ ხაჩატრიანმა.

გენპროკურორის შუამდგომლობის შესახებ წინასწარ იყო ცნობილი

პარტია „აყვავებული სომხეთის“ წევრები ბოლო ორი დღის განმავლობაში ასევე გამოდიოდნენ განცხადებებით იმის თაობაზე, რომ მათი ლიდერი უდანაშაულოა და დევნას ექვემდებარება.

პარტია „აყვავებული სომხეთის“ დეპუტატმა ნაირა ზოგრაბიანმა 14 ივნისს განაცხადა: მათ აქვთ სარწმუნო ინფორმაცია იმის შესახებ, რომ ხელისუფლება ცარუკიანისთვის იმუნიტეტის ჩამოსართმევად ემზადება და გენერალური პროკურორი პარლამენტს შესაბამისი შუამდგომლობით მიმართავს. 15 ივნისს მან ეს ინფორმაცია საკუთარ Facebook-გვერდზე გაიმეორა, და დასძინა:

 „გენერალურ პროკურორ არტურ დავიტიანს კიდევ აქვს შანსი, რომ პოლიტიკური დაკვეთა არ შესარულოს“.

გენერალური პროკურორის მრჩეველმა გორ აბრამიანმა უპასუხა:

„არ შეიძლება ვინმე დეპუტატის, მათ შორის გაგიკ ცარუკიანისთვის, დეპუტატის იმუნიტეტის ჩამორთმევის თაობაზე შუამდგომლობის შეტანის შესახებ გადაწყვეტილებაპოლიტიკური იყოს. ამგვარი გადაწყვეტილება მხოლოდ და მხოლოდ სისხლის სამართლის პროცესის ფარგლებში მიიღება, იქიდან გამომდინარე, თუ რამდენად სარწმუნოდ მიაჩნია გენერალურ პროკურორს გამოძიების პროცესში მოპოვებული მტკიცებულებები“. 

ამ განცხადებიდან რამდენიმე საათში პარლამენტის სპიკერმა განაცხადა, რომ გენერალური პროკურორის შუამდგომლობა უკვე მიიღო.

პარტია „განათლებული სომხეთის“ მოსაზრება

ოპოზიციური პარტია „განათლებული სომხეთი“ გამოვიდა განცხადებით იმის შესახებ, რომ „აყვავებული სომხეთის“ ლიდერის გაგიკ  ცარუკიანის წინააღმდეგ აღძრული სისხლის სამართლის საქმეები „პოლიტიკური მიზანშეწონილობით არის ნაკარნახევი“:

 „კანონის დამრღვევმა ნებისმიერმა ადამიანმა კანონის მთელი სიმკაცრით უნდა აგოს პასუხი. მაგრამ სამართლებრივი პროცესის, ასევე შანტაჟისა და კომპრომატების პოლიტიკურ ინსტრუმენტად გამოყენება, იმისთვის, რომ ოპონენტს გაჩუმება აიძულო, მიუღებელია და გაკიცხვას იმსახურებს“.

პრემიერის მოსაზრება

ცარუკიანისთვის დეპუტატის იმუნიტეტის ჩამორთმევის შესახებ პარლამენტის სხდომის დაწყებამდე პრემიერ-მინისტრმა ნიკოლ ფაშინიანმა თავის Facebook-გვერდზე დაწერა:

„ადამიანების ნების გამოხატვის თავისუფლებისთვის ხელის შეშლის (მთლიანობაში კორუფციის, ბოროტად გამოყენების, გადასახადებისთვის თავის არიდების და ა.შ.) ყველა შემთხვევა სომხეთის კანონმდებლობის შესაბამისად უნდა იქნას გამოძიებული … თავისუფლებას, დემოკრატიასა და კანონიერებას სომხეთში ალტერნატივა არ გააჩნია. კანონის წინაშე ყველა თანასწორია“.