სომხეთში საგანგებო მდგომარეობის რეჟიმი გააგრძელეს - შეზღუდვების შემოღების გარეშე, მაგრამ ქცევის ახალი წესებით

14 მაისს, სომხეთის ხელისუფლებამ საგანგებო მდგომარეობის რეჟიმის კიდევ ერთი თვით – 13 ივნისამდე გაგრძელების გადაწყვეტილება მიიღო.

ეს დაკავშირებულია იმასთან, რომ კორონავირუსით ინფიცირებულთა რიცხვი კვლავ იზრდება და ყოველდღიურად 100-ზე მეტი ახალი შემთხვევა ფიქსირდება.

თავდაპირველად საგანგებო მდგომარეობა სომხეთში, 16 მარტს – მხოლოდ ერთი თვით გამოცხადდა. 14 აპრილს, ხელისუფლებამ მისი ერთი თვით გაგრძელების გადაწყვეტილება მიიღო.

თუმცა, ჯერ კიდევ ვადის ამოწურვამდე, 4 მაისიდან, ადამიანებს თავისუფლად გადაადგილების საშუალება მიეცათ, ამუშავდა საწარმოების დიდი ნაწილი.

ამის შემდეგ, ქვეყანაში შემთხვევათა რაოდენობის მკვეთრად ზრდა დაიწყო.

ამავდროულად, საგანგებო მდგომარეობის რეჟიმი არც ახლა ითვალისწინებს შეზღუდვების შემოღებას. უფრო მეტიც, უქმდება ძველი აკრძალვები. მაგრამ კომენდატურა ქცევის ახალ ნორმებს აწესებს და მათ დამრღვევებს დიდი ჯარიმები დაეკისრებათ.

ყველა დეტალი – კიდევ რა ამუშავდება, რის გამო მოუწევთ ჯარიმის გადახდა და როდის გაიხსნება საზღვრები.

ჯანდაცვის სამინისტროს ცნობით, 15 მაისს, 184 ახალი შემთხვევა დაფიქსირდა. ეს დაინფიცირების რაოდენობის ახალი ანტირეკორდია. სულ, ქვეყანაში, 4 044 ადამიანი დაინფიცირდა. მათგან 1 666 უკვე გამოჯანმრთელდა და გაეწერა საავადმყოფოდან. 52 ადამიანი გარდაიცვალა. სულ გაკეთებულია 37 476 ტესტი.

• პოლიტიკოსები კორონავირუსის შესახებ: რატომ აღმოჩნდა სომხეთი რეგიონული ლიდერი ინფიცირებულთა რიცხვით? 
• „37.5 მაქვს, რა გავაკეთო?“ – მოსკოვში, კორონავირუსის სამკურნალოდ – ფული და კავშირებია საჭირო  

რა იქნება ახლა შესაძლებელი 

პრემიერ-მინისტრმა ნიკოლ ფაშინიანმა ხაზი გაუსვა, რომ ხელისუფლება ახალ შეზღუდვებს არ აწესებს, მაგრამ შეეცდება „დაარწმუნოს ადამიანები უსაფრთხოების წესების დაცვის აუცილებლობაში“.

კომენდატურამ უკვე წარმოადგინა ცვლილებების სია, უფრო ზუსტად, კიდევ რა შეზღუდვები უქმდება საგანგებო მდგომარეობის პერიოდში. 

• 18 მაისიდან მოიხსნება საზოგადოებრივი ტრანსპორტისა და მეტროს მუშაობის აკრძალვა. დაწესდება მათი დეზინფექციის განსაკუთრებული წესები. მგზავრებს კი ტრანსპორტით მგზავრობა დამცავი ნიღბებითა და ხელთათმანებით შეეძლებათ. 
• გაიხსნება სავაჭრო ცენტრები. 
• მუშაობის დაწყება შეეძლება ყველა საზოგადოებრივი კვების ობიექტს. ადრე მხოლოდ იმ კაფეებსა და რესტორნებს შეეძლოთ მუშაობა, რომლებსაც კლიენტების მომსახურება ღია ცის ქვეშ შეეძლოთ. 
• მუშაობის უფლება მიიღო სპორტულმა დარბაზებმა. ადრე ისინი მხოლოდ პროფესიონალი სპორტსმენებისთვის მუშაობდა. 
• გაიხსნება ღია ცის ქვეშ არსებული ისტორიული და კულტურული ღირსშესანიშნაობები. 
• ამუშავდება საბავშვო ბაღები. 

ის ფაქტი, რომ სკოლები და უნივერსიტეტები არ გაიხსნება და ამუშავდება საბავშვო ბაღები, კომენდანტმა ასე ახსნა: „დასაქმებული მშობლებისთვის პრობლემაა პატარა ბავშვების მოვლის უზრუნველყოფა“.

საქმიანობის ყველა სფეროსთვის დადგენილია უსაფრთხოების სპეციალური წესები.

ქცევის ახალი წესები 

18 მაისიდან, სომხეთის ყველა მცხოვრები ვალდებული იქნება დამცავი ნიღაბი ატაროს დახურულ შენობაში. 25 მაისიდან კი ნიღაბი სავალდებულო იქნება ყველგან ანუ ქუჩაშიც.

ამ წესის დარღვევისთვის, გათვალისწინებულია ჯარიმა, მინიმუმ 100 ათასი დრამის (200 დოლარის) ოდენობით.

„მიმაჩნია, რომ ამ საკითხში, შეძლებისდაგვარად მკაცრები უნდა ვიყოთ“, – განაცხადა ვიცე-პრემიერმა და საგანგებო მდგომარეობის კომენდანტმა.

ტიგრან ავინიანის თქმით, შესაძლებელი იქნება ნიღბის, მათ შორის, საკუთარი ხელით დამზადებულისა და შარფების ტარება.

ახალი წესებით, „საჯარო ღონისძიებებში“ მონაწილეობის მიღება მაქსიმუმ 5 კაცს შეეძლება. თუმცა, კონკრეტულად რა განეკუთვნება საჯარო ღონისძიებებს, კომენდატურას ჯერჯერობით არ განუმარტავს.

აღდგება ავიამიმოსვლა 

რეგულარული რეისები რუსეთიდან სომხეთის მიმართულებით, 15 მაისიდან განახლდება.

„15 მაისიდან, რუსეთიდან სომხეთის მიმართულებით, ორ დღეში ერთხელ დაიწყება რეგულარული ავიარეისები, რომლებიც ჩვენს მოქალაქეებს შინ დაბრუნების საშუალებას მისცემს. ყველა დაბრუნებული ვალდებული იქნება დაიცვას თვითიზოლაციის მკაცრი რეჟიმი“, – განაცხადა კომენდანტმა.

განახლდება ფრენები სომხეთიდან ევროპის ქვეყნების მიმართულებით. კერძოდ, დაბალბიუჯეტური WizzAir-ი ავიამიმოსვლის დაწყებას უკვე ივნისის შუა პერიოდიდან აპირებს.

თუმცა, გადაწყვეტილება იმის შესახებ, თუ როდის გაიხსნება სახმელეთო საზღვრები, ჯერჯერობით არ მიუღიათ.

რას წერენ სოციალურ ქსელებში 

Facebook-ის სომხურ სეგმენტში, მომხმარებლები აქტიურად განიხილავენ კომენდატურის მიერ შემოღებულ ახალ წესებს.

აი, რამდენიმე კომენტარი:

„უნდა გაძლიერდეს კონტროლი! ყველგან წერია, რომ ნიღბისა და ხელთათმანების გარეშე შესვლა აკრძალულია, მაგრამ თვითონ თანამშრომლებიც კი არ იცავენ ამ წესებს, მით უმეტეს, მომხმარებლები. არავინ, არსად და არაფერს არ იცავს!“

„გთავაზობთ, რომ საზოგადოებრივ ტრანსპორტში, როგორც პოლიკლინიკებში, იყოს ვინმე, ვინც მგზავრებს ტემპერატურას გაუზომავს. მათ, ვისაც ნორმაზე მაღალი ტემპერატურა ექნება, საჯარო ტრანსპორტში ჩაჯდომის ნებართვა არ უნდა მისცენ“.

„რომელი ნიღბები? რომელი სოციალური დისტანცია? საზოგადოებრივ ტრანსპორტში, როგორც წესი, ფეხზე დასადგომი ადგილიც არ არის და ადამიანები ვერ სუნთქავენ, როგორ წარმოგიდგენიათ, რომ ისინი კიდევ ნიღბებით იყვნენ?“

„სახის დამცავი ნიღბის ხანგრძლივი გამოყენება, სისხლში ჟანგბადის დეფიციტს იწვევს, რაც საფრთხეს უქმნის ჯანმრთელობას!“