სომხეთი, კორონავირუსი: როგორ და რით ცხოვრობენ ადამიანები - ეკითხებოდა ტელეფონით პრემიერ-მინისტრი

ოფიციალური მონაცემებით, 27 მარტს სომხეთში კორონავირუსით დაინფიცირების 329 შემთხვევა დაფიქსირდა. ერთ-ერთ დაინფიცირებული გარდაიცვალა, 28 გამოჯანმრთელდა. 16 მარტიდან ქვეყანაში საგანგებო მდგომარეობის რეჟიმი დაწესდა. ის 14 აპრილამდე იმოქმედებს.

27 მარტს სომხეთის პრემიერ-მინისტრი ქვეყნის მაცხოვრებლებს შემთხვევით ნომრებზე ურეკავდა და ინტერსდებოდა, თუ როგორ ცხოვრობენ ისინი კარანტინის პირობებში. ეს ყველაფერი მის  Facebook-გვერდზე პირდაპირი ეთერით ტრანსლირდებოდა.

ზარებამდე მან თქვა, რომ ერთ-ერთი უმნიშვნელოვანესი ამოცანა ქვეყნის მოქალაქეებთან კონტაქტის უზრუნველყოფაა. ხოლო ზარებთან დაკავშირებული ექსპერიმენტი იმისთვის არის საჭირო, რომ გაიგონ, თუ როგორია მოქალაქეების მდგომარეობა და საით უნდა მიმართოს სახელმწიფომ სოციალური დახმარება კორონავირუსის დროს.

მთავრობაში მუშავდება სოციალური დახმარების პაკეტი იმ ადამიანებისთვის, რომლებიც საგანგებო მდგომარეობისა და სახლიდან გასვლის აკრძალვის პერიოდში უმუშევრები და საარსებო სახსრების გარეშე დარჩნენ.

რა არის აკრძალული სომხეთში საგანგებო მდგომარეობის რეჟიმის პერიოდში

კორონავირუსის ეპიდემია კავკასიაში: ფაქტები და ციფრები რეგიონში

კორონავირუსი: არის პირველი მსხვერპლი, დაინფიცირებულები არიან მოზარდები, სამხედროები და მედიცინის მუშაკები, ჟურნალისტებისთვის მუშაობის შეზღუდვა შერბილებულია

რა შეიტყო პრემიერმა

პრემიერის პირველი თანამოსაუბრე გახდა ხნიერი ქალბატონი, რომელიც თავის 90 წლის ქმართან ერთად ცხოვრობს.

ის მოჰყვა, რომ საგანგებო მდგომარეობის გამცხადების შემდეგ პირველ დღეებში მათთან სოციალური სამსახურების თანამშრომლები მიდიოდნენ და საკვები მიჰქონდათ. მაგრამ ახლა აღარ მიდიან. ახლა ხანშიშესულ წყვილს უვლის მათი ქალიშვილი, რომელიც რუსეთიდან ჩამოვიდა, მაგრამ ხვალ უკან ბრუნდება.

ფაშინიანი ინტერესდებოდა, აქვთ თუ არა ადამიანებს საარსებო სახსრები, რათა გაძლონ საგანგებო მდგომარების რეჟიმის დროს, სანამ ბევრი ორგანიზაცია არ მუშაობს.

პრემიერის ზარები მის თანამოსაუბრეებს აოცებდა და ახარებდა. ადამიანები პრბლემებზე ლაპარაკს მაშინვე არ იწყებდნენ. მაგრამ საუბრისას ირკვეოდა, რომ ბევრი გროშებით არსებობს, უმუშევრად დარჩნენ, და თავი ზაფხულში მომზადებული კონსერვებით გააქვთ.

ერთ-ერთმა მათგანმა თქვა, რომ მას სამსახურში არ იღებენ, რადგან ის 46 წლისაა. ის ტაქსის მძღოლად დასაქმებას  ცდილობდა, მაგრამ იქ უთხრეს, რომ მხოლოდ 35 წლამდე ასაკის, მაქსიმუმ 40 წლამდე, მძღოლებს იყვანდნენ. ოჯახში ორი მცირეწლოვანი ბავშვია, ცოლი არ მუშაობს. ოჯახი სახელმწიფოსგან შემწეობას არ იღებს, რადგან სესხი აქვთ გაფორმებული. სოციალური სამსახურის მიდგომა ასეთია – თუკი სესხის გადახდა შეგიძლია, ესე იგი, არ გიჭირს. არადა, სინამდვილეში, სესხი სწორედ იმისთვის აიღეს, რომ თავი რამენაირად ერჩინათ.

პრემიერის თანამოსაუბრეები ამბობდნენ, რომ სახელმწიფოს დახმარებას არ სთხოვენ, მათ მხოლოდ სამუშაო ადგილები სჭირდებათ. მაგრამ ახლა ქვეყანაში უარაფროდ დარჩნენ ის ადამიანებიც, ვისაც კორონავირუსამდე და საწარმოების გაჩერებამდე სამუშაო ჰქონდა.

პრემიერი ყველა ისტორიას ისმენდა, დეტალებით ინტერესდებოდა, ჩანაწერებს აკეთებდა და ვიღაცებს ჰპირდებოდა, რომ ეთერის შემდეგ მათ დაუკავშირდებოდნენ, და პრობლემების ნაწილს მოუგვარებდნენ.

 „ძალიან მნიშვნელოვანია იმის ცოდნა, თუ რას გრძნობენ ჩვენი მოქალაქეები ამ დღეებში, როგორ ცხოვრობენ, როგორ ახერხებენ უსიამოვნებების გადალახვას,“ – ასე განმარტა ზარებთან დაკავშირებით საკუთარი ექსპერიმენტი ნიკოლ ფაშინიანმა.

მისი თქმით, ეს მას ეხმარება  „უკეთ გაიგოს პრობლემები, და ეკონომიკური, სოციალური დახმარების პაკეტის ფორმირების საკითხები დააზუსტოს“.   

საუბრისას ნიკოლ ფაშინიანი თანამოსაუბრეებს სახლიდან გასვლის შეზღუდვის თაობაზე შეახსენებდა. 25-დან 31 მარტამდე სომხეთში აუცილებლობის გარეშე სახლიდან გასვლა არ შეიძლება. გასვლამდე უნდა შეივსოს „გადაადგილების ანკეტა“. თითოეულმა თავად უნდა ჩაწეროს მასში მიზანი, და მისამართი – საიდან და სად მიდის, გასვლისა და სავარაუდო დაბრუნების დრო. თან უნდა იქონიონ პასპორტი ან ID-ბარათი, ამ მოთხოვნების შესრულებას პოლიცია მეთვალყურეობს.

დეტალები ქვეყანაში არსებული სიტუაციის შესახებ

ჯანდაცვის სამინისტროს ბოლო  მონაცემებით, ქვეყანაში კორონავირუსით დაინფიცირების 329 შემთხვევაა დადასტურებული.

დაინფიცირებულებს შორის არის ორი თვის ახალშობილი, რომელსაც ავადმყოფობა უსიმპტომოდ უვითარდება, და მისი დედა, რომელსაც ორი დღის განმავლობაში სიცხე ჰქონდა. ამჟამად ორივე თავს კარგად გრძნობს.

ერთ-ერთი დაინფიცირებულის მდგომარეობა უკიდურესად მძიმედ არის შეფასებული.

კორონავირუსით დაინფიცირებული ერთი პაციენტი   26 მარტს გარდაიცვალა.

იმავე დღეს ცნობილი გახდა, რომ ვირუსმა ჯარში შეაღწია. თავიდან დაინფიცირების სამ შემთხვევაზე იუწყებოდნენ. 27 მარტს ციფრები ხუთამდე გაიზარდა. ახლად დაინფიცირებულები წინა დღეს უკვე იზოლირებულები იყვნენ.

ქვეყანაში იზღუდება შესვლა და გასვლა.  აკრძალულია  საჯარო ღონისძიებები, რესტორნების, ბარებისა და კაფეების საქმიანობა.