ნიღბებით, შესვენებებისა და ბუფეტის გარეშე: სომხეთი ახალი სასწავლო წლისთვის ემზადება
სომხეთის სკოლებში, გაკვეთილები 15 სექტემბრიდან დაიწყება. თანაც, საუბარია არა დისტანციურ სწავლებაზე – მოსწავლეებმა სკოლებში კვირაში ექვსი დღე უნდა იარონ და ისხდნენ კლასებში, შესვენებებზე გასვლისა და ბუფეტში ჭამის უფლების გარეშე.
განათლების, მეცნიერების, კულტურისა და სპორტის სამინისტრომ კორონავირუსის პანდემიის პერიოდში, სკოლებში სწავლის წესები გამოაქვეყნა.
ამ დოკუმენტის თანახმად, ახლა მოსწავლეები, მთელი დროის განმავლობაში, ნიღბებში უნდა ისხდნენ და პერიოდულად გამოიცვალონ ის, შეინარჩუნონ სოციალური დისტანცია და ადგილიდან ჩააბარონ გაკვეთილი, დაფასთან გასვლის გარეშე.
სკოლის ახალი წესების ნაწილმა სომეხი მშობლები დააბნია, ნაწილი კი მათ წარმოუდგენლად მოეჩვენათ. ზოგიერთი მათგანი სოციალურ ქსელებში უკვე წერს, რომ ამჯობინებენ ბავშვები სკოლაში არ გაუშვან.
განათლების მინისტრმა არაიკ არუთუნიანმა კი სკოლის მოსწავლეებსა და სტუდენტებს მოუწოდა, ნებაყოფლობით წავიდნენ ორი კვირით თვითიზოლაციაში – სასწავლო წლის დაწყებამდე, რათა შეამცირონ კორონავირუსის გავრცელების რისკები.
ახალი წესები
წესების დაცვას სკოლების ყველა თანამშრომელი დააკვირდება, მაგრამ ძირითადი პასუხისმგებლობა მათ შესრულებაზე დირექტორებს ეკისრებათ.
ყველა სკოლა თავად უზრუნველყოფს მოსწავლეებს ნიღბებითა და სადეზინფექციო საშუალებებით. სკოლებში, მინიმუმ, მათი ერთი კვირის რეზერვი უნდა იყოს. ყველა მასწავლებელმა და მოსწავლემ ისინი ყოველ 4 საათში ერთხელ უნდა გამოიცვალოს.
მასობრივი ღონისძიებების ჩატარება სკოლებში აკრძალულია, დროებით შეწყდება გახანგრძლივებული, სხვადასხვა ჯგუფები და ფიზიკური აქტივობები.
მოსწავლეები ვერ შეძლებენ კლასიდან გასვლას არა მხოლოდ შესვენებებზე. საკლასო ოთახიდან გასასვლელად, ნებისმიერი გადაუდებელი აუცილებლობის შემთხვევაში, მათ მასწავლებლისგან განსაკუთრებული ნებართვის მიღება დასჭირდებათ.
გაკვეთილების დროს მოსწავლეები შეძლებისდაგვარად თითო-თითოდ უნდა დასხდნენ, ჯვარედინად ან ერთი და იმავე მერხის სხვადასხვა ბოლოში.
სკოლის ახალ წესებში განსაკუთრებით ხაზგასმულია სოციალური დისტანციის შენარჩუნების, თავშეყრისა და მჭიდრო კონტაქტების გამორიცხვის აუცილებლობა.
შესასვლელში, ყველას გაუზომავენ ტემპერატურას დისტანციური თერმომეტრით. სკოლები უზრუნველყოფილი იქნება ინდივიდუალური თერმომეტრებითაც განსაკუთრებული აუცილებლობის შემთხვევაში გამოსაყენებლად. ვირუსული დაავადების რაიმე სიმპტომის აღმოჩენის შემთხვევაში, ყველას სახლში გაუშვებენ.
ერთ საკლასო ოთახში, ერთდროულად მაქსიმუმ 20 მოსწავლის ყოფნა შეიძლება. თუკი მეტი მოსწავლეა, კლასი ჯგუფებად გაიყოფა, რათა უზრუნველყოფილი იყოს ბავშვებს შორის მეტრნახევრიანი სოციალური დისტანცია.
საკლასო ოთახებთან დაკავშირებული მოთხოვნები:
- 20 მოსწავლე შეიძლება იმყოფებოდეს შენობაში, რომლის ფართობიც, სულ მცირე, 54 კვადრატული მეტრია. ეს შეიძლება იყოს სკოლის დარბაზები და დერეფნებიც.
- იმ კლასებში, სადაც 10-ზე ნაკლები მოსწავლეა, გაკვეთილების ჩატარება შეიძლება შენობებში, რომლის ფართობიც სულ მცირე 42 კვადრატული მეტრია.
ექვსდღიანი სასწავლო რეჟიმი დადგინდა იმის გამო, რომ შემცირდეს სკოლებში ყოფნის დრო.
ასევე, აკრძალულია საწერი სამუშაოებისთვის რვეულების გამოყენება. საკონტროლო დავალებების შესასრულებლად ცალკე ფურცლები გაიცემა. მათ შემოწმებას მასწავლებლები მხოლოდ ერთი დღის შემდეგ დაიწყებენ. ფურცლების მოსწავლეებისთვის დაბრუნება აკრძალულია – აუცილებლობის შემთხვევაში, მასწავლებელმა მათ ქსეროასლი უნდა მიაწოდოს.
რას წერენ სოციალურ ქსელებში
მშობელთა დიდი ნაწილი გაკვეთილების ჩატარების ახალი წესებით უკმაყოფილოა. და სოციალურ ქსელებშიც აქტიური განხილვა მიმდინარეობს:
აი, ზოგიერთი კომენტარი:
„მინდა გავიგო, თუ რატომ ხდება, რომ სახელმწიფო ორგანოები, რომლებიც კორონავირუსის ისტორიის დაწყებიდან მოყოლებული, მავალდებულებდნენ, სახლში ვმჯდარიყავი, დამეცვა სოციალური დისტანცია, მევლო ქუჩაში, სიცხეში, ჰაერზე ნიღბით და ა.შ., ჩემი და ჩემს გარემოცვაზე ზრუნვიდან გამომდინარე (მინდა მჯეროდეს), ახლა ყველას გვივიწყებენ და ხსნიან სკოლებსა და უმაღლეს სასწავლებლებს? ან იქნებ, პირადად მე, ძვირფასო სახელმწიფოვ, არ მინდა, რომ ჩემი შვილები დაავადდნენ და დაგვაინფიცირონ მე და დანარჩენი ოჯახის წევრები, მათ შორის, ხანდაზმულები?!“.
„თქვენ ვერ უზრუნველყოფთ ამ წყეულ სოციალურ დისტანციას ბავშვებს შორის საკლასო ოთახებში! თქვენ ვერ მომცემთ სკოლებში ჩემი შვილების უსაფრთხოების გარანტიას!“.
„სკოლებს გახსნიან და ერთი თვის შემდეგ დაკეტავენ, უმაღლეს სასწავლებლებს გახსნიან, რათა შეაგროვონ სტუდენტებისგან სწავლის სრული გადასახადი ფასდაკლების გარეშე. ჩვენთან შემოვარდება ინდუსი და ირანელი სტუდენტების ნაკადი – ეპიდემიოლოგიური თვალსაზრისით დაუცველი ზონებიდან“.
„ასეთი განათლების მინისტრის პირობებში, უმჯობესია, განათლების გარეშე დარჩე, ჯანმრთელი იქნები – ფიზიკურად და ფსიქიკურად“.
„ჩვენ ამ ვირუსთან ერთად ცხოვრება უნდა ვისწავლოთ. ის არსად არ წავა. სანამ არ იქნება ეფექტური ვაქცინა, ჩვენ ამ სამყაროში, რაღაცნაირად უნდა ვიარსებოთ. სასწორის მეორე მხარეს არიან მშობლები, რომლებსაც არ შეუძლიათ დაკავდნენ შვილების ონლაინგანათლებით. და მათაც შეიძლება გავუგოთ. რთული ვითარებაა. და არ არსებობს ერთმნიშვნელოვანი გადაწყვეტა. გასაგებია, რომ ჯანმრთელობა უმთავრესია. მაგრამ მუდმივ იზოლაციაში ცხოვრებაც არარეალურია“.
„მასწავლებელი ვარ და მეშინია, არ მინდა გავრისკო არც ჩემი და არც ჩემი ახლობლების ჯანმრთელობა!“.
„არ მინდა შვილის ნიღბით გაგზავნა, მაგრამ სკოლაში არსიარულიც არ არის ვარიანტი. არ ვიცი, რა გავაკეთო, იმედი მაქვს, რომ კერძო სკოლაა, ცოტა მოსწავლეა და ნიღბის გარეშე მეცადინეობის უფლებას მისცემენ“.
საქმეში ომბუდსმენი ერევა
სახალხო დამცველის ოფისმა უკვე მიიღო არაერთი საჩივარი მოსწავლეებისა და მათი მშობლების მხრიდან 15 სექტემბერს სასწავლო პროცესის განახლებასა და მოსწავლეების მიერ ნიღბების სავალდებულო ტარებასთან დაკავშირებით. ამის შესახებ, ომბუდსმენის Facebook-ის ოფიციალურ გვერდზეა საუბარი:
„ომბუდსმენისთვის გამოგზავნილი საჩივრების, ასევე სოციალურ მედიაში გამოთქმული შეშფოთების გათვალისწინებით, მთელი რიგი შეკითხვები გადაიგზავნა განათლების, მეცნიერების, კულტურისა და სპორტის სამინისტროში, სკოლებში სასწავლო პროცესის ორგანიზებისა და ბავშვთა უფლებების უზრუნველყოფის თაობაზე სრულყოფილი წარმოდგენის შესაქმნელად“.
აი, რამდენიმე კითხვა:
- როგორ მოხდება შესვენებების ორგანიზება?
- რა პროფესიონალური, მათ შორის, პედაგოგიური და სამედიცინო განხილვები ან კვლევები უძღოდა წინ, გაკვეთილების დროს ნიღბების ტარების მოთხოვნის დამტკიცებას? როგორია მათი შედეგები?
- რა საერთაშორისო მოთხოვნების ან პრაქტიკის გათვალისწინება მოხდა, როდესაც გადაწყვიტეთ, რომ ბავშვებს გაკვეთილების დროს ნიღაბი უნდა ეკეთოთ? ჩატარდა თუ არა ასეთი კვლევები?
- მოჰყვება თუ არა სამართლებრივი შედეგები ბავშვებისთვის, რომლებიც არ შეასრულებენ ნიღბის ტარების მოთხოვნას? თუ კი, მაშინ, რა შედეგებსა და პასუხისმგებლობის ზომებზეა საუბარი? კონკრეტულად ვის მიმართ იქნება გამოყენებული?
