აფხაზეთში ბჟანია და ოპოზიცია დროებით კომპრომისამდე მივიდნენ

ოპოზიციის მოთხოვნა აფხაზეთის პრეზიდენტს 

აფხაზეთის პრეზიდენტმა ასლან ბჟანიამ და გაერთიანებულმა ოპოზიციამ მოახერხეს შეთანხმებამდე მისვლა 21 დეკემბრის, ერთდღიანი ქუჩის მწვავე დაპირისპირების შემდეგ. პრეზიდენტმა მოთხოვნების სია მიიღო, რომლის განხილვაც 2022 წლიდან, საახალწლო დღესასწაულის დასრულებისთანავე უნდა დაიწყოს. 

მართალია, ხელისუფლების ძალადობრივი გზით ცვლილების თავიდან არიდება მოხერხდა, ადგილობრივ ექსპერტებს მიაჩნიათ, რომ პრეზიდენტს ნაკლებად უნდა მიაჩნდეს ეს თავის გამარჯვებად. ახალი თავდასხმის თავიდან ასარიდებლად, მას შეთანხმება მოუწევს. 

• კომენტარი: ასლან ბჟანია თავდაცვით მდგომარეობაში გადავიდა
• „აფხაზეთის ნებისმიერ ლიდერს ორი პრობლემა აქვს: დახმარება უნდა ითხოვოს და ახსოვდეს, რომ ამისთვის გადახდა მოუწევს“
• მოსაზრება: როდის დასრულდება აფხაზეთში პრეზიდენტების ჩამოგდება
• აფხაზეთის მოქმედი პრემიერი და ყოფილი პრეზიდენტი – უმდიდრესთა სიაში

რა მოთხოვნებია წამოყენებული კომპრომისის პირობად 

მოლაპარაკებების დასრულების შემდეგ, ოპოზიციის ლიდერმა ადგურ არძინბამ მხარდამჭერებს ის მოთხოვნები გააცნო, რომლის განხორციელებაც პოლიტიკურ დაძაბულობას მოხსნის:

• ერთი წლით გადაიდოს საპარლამენტო არჩევნები (2022 წლის მარტში უნდა გაიმართოს) და ახალი შერეული სისტემით ჩატარდეს. 
• პრეზიდენტის ხელისუფლებიდან ჩამოშორების პროცედურების შემუშავების ინიცირება მოხდეს. 
• გაიყინოს პრეზიდენტის ინიციატივები უცხოელების მიერ აფხაზეთში უძრავი ქონების შეძენაზე აკრძალვის მოხსნის შესახებ, და ასევე უარი ითქვას ენერგეტიკული სფეროების განსახელმწიფოებრიობის გეგმებზე. 

„სიტყვა „არა“ პრეზიდენტს არ უთქვამს და გამოხატა მზადყოფნა მოლაპარაკებებისთვის“, – განაცხადა ადგურ არძინბამ.  

აფხაზეთის თანამედროვე ისტორიაში პრეზიდენტის სასახლე უკვე რამდენჯერმე აიღეს შტურმით. მათ შორის, თავად ასლან ბჟანიაც ხელისუფლებაში 2020 წლის დასაწყისში სწორედ ამ გზით მოვიდა. 

მანამდე, ორჯერ – 2004 და 2014 წლებში – ხელისუფლება ადმინისტრაციის შენობის შტურმით და პრეზიდენტის გაძევებით შეიცვალა მანამდე, სანამ მას უფლებამოსილების ვადა ამოეწურებოდა. 

ამჯერად ხელისუფლება სერიოზულად მოემზადა ამ სცენარის გამეორებისთვის. უკვე 21 დეკემბრის დილას, როდესაც ოპოზიციამ ქუჩის პროტესტის დაწყების შესახებ განაცხადა, სამთავრობო შენობების კომპლექსი მიუდგომელ ციხესიმაგრეს ჰგავდა.  

მთელ კვარტალს გარს ერტყა ერთმანეთზე გადაბმული მეტალის წინაღობები. მთელი პერიმეტრის გასწვრივ, კომპლექსის მისადგომები ჩახერგილი იყო სკოლის ავტობუსებითა და მილიციის ავტომობილებით. ყველა ძალოვანი სტრუქტურის თანამშრომელი მოვლენების ეპიცენტრისკენ იყო გადასროლილი. 

აქციის გადაღებისას აფხაზეთის ტელევიზიის გადამღები ჯგუფი დაშავდა. სცემეს მძღოლსა და ოპერატორს. ერთ-ერთ ოპერატორს ხელიდან ვიდეოკამერა გამოსტაცეს, რომელიც შედეგად მწყობრიდან გამოვიდა.

მხოლოდ შუაღამისკენ მოახერხეს მხარეებმა კომპრომისამდე მისვლა. და მხოლოდ ამის შემდეგ თქვეს ოპოზიციის მომხრეებმა პრეზიდენტის სასახლის ალყასა და პრეზიდენტის გადადგომის მოთხოვნაზე უარი. 

სიტუაციის დასასტაბილურებლად მოლაპარაკებებს პარლამენტის შენობაში უშუალოდ აფხაზეთის პრეზიდენტი ასლან ბჟანია და ოპოზიციის ლიდერი, ადგურ არძინბა მართავდნენ. 

ასლან ბჟანიას უფლებამოსილების ვადა 2025 წლის აპრილში იწურება. მაგრამ იმისათვის, რომ იმ დრომდე პრეზიდენტის სავარძელში დარჩეს, მას ოპონენტებთან მოლაპარაკება მოუწევს. უარი მაშინვე გამოიწვევს ოპოზიციის მხრიდან ძალადობრივი გზით ხელისუფლების ხელში ჩაგდების მცდელობას. 

და მოლაპარაკებების მაგიდასთან დაჯდომისთვის პირველი ნაბიჯების გადადგმა მას საახალწლო დღესასწაულის დასრულებისთანავე მოუწევს, წინააღმდეგ შემთხვევაში შიდაპოლიტიკური კრიზისის გაღრმავება გარდაუვალია. 

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო