სომხეთისა და აზერბაიჯანის საზღვარზე, ორმხრივი სროლების მეოთხე დღეს ვითარება დამშვიდდა
სომხეთ-აზერბაიჯანის საზღვარზე, უკვე მეოთხე დღეა, დროგამოშვებით ახლდება საბრძოლო მოქმედებები. ყველაფერი 12 ივლისს, აზერბაიჯანის თოუზის რაიონსა და სომხეთის ტავუშის პროვინციის საზღვარზე მომხდარი ინციდენტით დაიწყო.
ორივე მხარეს არიან დაღუპული სამხედრო მოსამსახურეები.
სომხეთისა და აზერბაიჯანის თავდაცვის სამინისტროების ბოლო ცნობებით, შუაღამიდან მოყოლებული, საზღვარზე ვითარება შედარებით დამშვიდებულია, „ღამით არტილერია აღარ გამოუყენებიათ“.
- სომხეთის საზღვარზე სროლისას დაღუპულთა ცხედრების ჩამოსვენების შემდეგ, ბაქოში არეულობები დაიწყო
- სომხეთ-აზერბაიჯანის საზღვარზე ვითარება იძაბება. არიან გარდაცვლილები
ინფორმაცია ერევნიდან
14 ივლისისთვის, ერევანში, ყველაზე განხილვადი ახალი ამბავი იყო სატელიტიდან გადაღებული სურათი, რომელიც სომხეთის თავდაცვის სამინისტროს პრესმდივანმა, შუშან სტეპანიანმა გამოაქვეყნა.
სურათზე ჩანს აზერბაიჯანული სოფელი დონდარ გუშჩუ, რომელიც თოუზის რაიონში, საზღვრიდან, დაახლოებით, 10 კილომეტრში მდებარეობს. სოფლის გარშემო, საარტილერიო პოზიციებია განლაგებული.
პრესმდივანმა სურათის შესახებ კომენტარი გააკეთა:
„აზერბაიჯანულმა მხარემ თავის მოსახლეობას გარს შემოარტყა საარტილერიო ბატარეები, სამიზნედ აქცია და ჩივის, რომ სომხეთის შეიარაღებული ძალები ამ მიმართულებით ისვრიან“.
ამის შემდეგ, Facebook-ის სომხური სეგმენტის მომხმარებლებმა საკუთარ გვერდებზე, ამ ინფორმაციის განთავსება დაიწყეს, რომელიც 13 ენაზე არის ნათარგმნი.
რატომ არ მიმართავს სომხეთი დახმარებისთვის კოლექტიური უსაფრთხოების შეთანხმების ორგანიზაციას
„მიმდინარე კონფლიქტის ხარისხი და მასშტაბები არ არის ისეთი, რომ აიძულოს სომხეთი, დახმარებისთვის კოლექტიური უსაფრთხოების შეთანხმების ორგანიზაციას მიმართოს. სომხეთი და მისი შეიარაღებული ძალები, ზუსტად ასრულებენ საკუთარ ამოცანებს“, – განაცხადა თავდაცვის სამინისტროს ყოფილმა პრესმდივანმა, არცრუნ ოვანისიანმა.
სომხეთი რუსეთის ლიდერობის ქვეშ მოქმედი ამ სამხედრო ბლოკის წევრია და სომეხმა ჟურნალისტებმა არაერთხელ წამოჭრეს, საზღვარზე შექმნილ ვითარებაში, კოლექტიური უსაფრთხოების შეთანხმების ორგანიზაციის ჩართვის საკითხი.
თავად ორგანიზაცია, ტრადიციულად, მხოლოდ სროლების დაუყოვნებლივ შეწყვეტის მოწოდებით გამოვიდა.
რას ამბობს პრემიერ-მინისტრი
„სომხეთის რესპუბლიკის შეიარაღებული ძალები კიდევ არაერთხელ დაამტკიცებენ, რომ ჩვენთან ძალის პოზიციიდან საუბარი არ შეიძლება“, – განაცხადა ნიკოლ ფაშინიანმა 14 ივლისს, თავდაცვის სამინისტროსა და შეიარაღებული ძალების ხელმძღვანელებთან შეხვედრისას.
ასევე, ფაშინიანმა ქვეყნის პრეზიდენტს შესთავაზა, დააჯილდოოს ივლისის საბრძოლო მოქმედებების დროს დაღუპული ოთხი სამხედრო მოსამსახურე.
პრეზიდენტმა უკვე მოაწერა ხელი შესაბამის განკარგულებას. მაიორი გარუშ ამბარცუმიანი სიკვდილის შემდეგ დაჯილდოვდა II ხარისხის ორდენით „სამშობლოს წინაშე დამსახურებისთვის“, კაპიტანი სოს ელბაკიანი – მედლით „მამაცობისთვის“, უმცროსი სერჟანტები – სმბატ გაბრიელიანი და გრიშა მატევოსიანი – მედლით „სამხედრო სამსახურისთვის“.
სომხეთმა საბრძოლო პირობებში, პირველად გამოიყენა ეროვნული წარმოების დრონები
„13 ივლისი ისტორიაში შევა, როგორც სომხური წარმოების უპილოტო საფრენი აპარატის საბრძოლო ნათლობის დღე. პირველად იქნა გამოყენებული სომხური საბრძოლო უპილოტო თვითმფრინავი… საბრძოლო პირობებში და ბრწყინვალე შედეგები აჩვენა“, – დაწერა სომხეთის თავდაცვის სამინისტროს სამხედრო უნივერსიტეტის სამეთაურო-საშტაბო ფაკულტეტის ხელმძღვანელმა, არცრუნ ოვანისიანმა Facebook-ის საკუთარ გვერდზე.
უკვე მომდევნო დღეს, ტავუშში გამართულ ბრიფინგზე, მან ჟურნალისტებს აცნობა, რომ სომეხმა ინჟინრებმა შეაჩერეს უპილოტო სადაზვერვო თვითმფრინავებზე მუშაობა და დაიწყეს მოიერიშეს სრულყოფა.
ოვანისიანმა ასევე დაადასტურა ინფორმაცია იმის შესახებ, რომ სომეხმა მებრძოლებმა ჩამოაგდეს აზერბაიჯანული დრონი, თავის კლასში მსოფლიოში ერთ-ერთი ყველაზე ძლიერი უპილოტო თვითმფრინავი – ისრაელის წარმოების Hermes 900. ამისათვის გამოიყენეს საზენიტო-სარაკეტო სისტემა „ОСА-АКМ“.
თავდაცვის სამინისტრომ გამოაქვეყნა სომხეთის შეიარაღებული ძალების მიერ განხორციელებული დარტყმის ვიდეო.
დაჭრილთა მდგომარეობის შესახებ
თავდაცვის სამინისტროს პრესმდივანმა, შუშან სტეპანიანმა განაცხადა, რომ ტავუშში, საბრძოლო მოქმედებებისას, სხვადასხვა სიმძიმის ჭრილობა მიიღო 10-მა ჯარისკაცმა:
„ერთი მებრძოლი უკიდურესად მძიმე მდგომარეობაშია. ხუთის მდგომარეობა საშუალო სიმძიმისაა, დანარჩენები, უახლოესი კვირაში წესრიგში იქნებიან“.
ინფორმაცია ბაქოდან
14 ივლისის დღის მეორე ნახევარში, აზერბაიჯან-სომხეთის საზღვარზე, თოუზის მიმართულებით, შედარებით სიმშვიდე იყო. საბრძოლო მოქმედებები საღამოს დადგომის შემდეგ განახლდა.
უკვე ღამით, სამინისტრომ გაავრცელა ინფორმაცია იმის შესახებ, რომ ბრძოლის მიმდინარეობისას, თოუზის რაიონის მიმართულებით, აზერბაიჯანის შეიარაღებულმა ძალებმა ზუსტი ცეცხლით გაანადგურეს სომხეთის არმიის მორიგი ქვედანაყოფის საყრდენი პუნქტი.
რამდენიმე საათის შემდეგ, თავდაცვის სამინისტროს კიდევ ერთი ინფორმაცია გამოჩნდა. „აზერბაიჯანულმა არმიამ სომხეთის შეიარაღებული ძალების კიდევ ერთი გრძელვადიანი საცეცხლე წერტილი გაანადგურა, რომლიდანაც ესროდნენ ჩვენი ქვედანაყოფების პოზიციებსა და დასახლებულ პუნქტებს თოუზის რაიონის მიმართულებით“, – ნათქვამია მასში.
სამინისტროს ოფიციალური ცნობების თანახმად, გასული დღე-ღამის განმავლობაში, მოწინააღმდეგის შენაერთებმა 91-ჯერ დაარღვიეს ცეცხლის შეწყვეტის შეთანხმება, მათ შორის, მთიანი ყარაბაღის მიმართულებით, ჯარების საკონტაქტო ხაზთან.
„სომხური მედიის მიერ გავრცელებული ინფორმაცია იმის თაობაზე, თითქოს, აზერბაიჯანული არმიის შენაერთებმა გამოიყენეს ზალპური ცეცხლის რეაქტიული სისტემა „გრადი“ სომხეთის შეიარაღებული ძალების წინააღმდეგ თოუზის ფრონტის მიმართულებით, წარმოადგენს დეზინფორმაციას“, – აღნიშნა აზერბაიჯანის თავდაცვის სამინისტროს პრესმდივანმა, ვაგიფ დიარგახლიმ.
სასაზღვრო ზონაში, სადაც აქტიური საბრძოლო მოქმედებები მიმდინარეობს, ჩავიდა აზერბაიჯანის ომბუდსმენი, საბინა ალიევა.
