აზერბაიჯანი, ახალი ამბები: დაპატიმრებულია ოპოზიციური პარტიის ლიდერის კიდევ ერთი დაცვის წევრი
დაპატიმრებულია ოპოზიციური პარტიის ლიდერის კიდევ ერთი დაცვის წევრი
ერთი კვირის განმავლობაში ოპოზიციური პარტია „აზერბაიჯანის სახალხო ფრონტის“ ლიდერის ალი ქერიმლის დაცვის უკვე ორი წევრია დაპატიმრებული. პირველი იყო ნიამედინ აჰმედოვი, რომელსაც ბრალად ტერორიზმის დაფინანსება ედება, და მალევე, მის კვალდაკვალ, იარაღის გამოყენებით ხულიგნობის ბრალდებით, საიდ მამედზადე დააპატიმრეს. აზერბაიჯანის სახალხო ფრონტში მიიჩნევენ, რომ ორივე ეს ბრალდება შეთითხნილია, პოლიტიკურად მოტივირებული, და რომ ეს პარტიის წინააღმდეგ რეპრესიების ახალი ტალღაა.
- „აზერბაიჯანში ცხოვრება ჩემი უფლებაა“. ყოფილი სინდისის პატიმარი, ჟურნალისტი აფგან მუხთარლი JAMnews-ს თავის სამომავლო გეგმების შესახებ ესაუბრა
- ნავთობი და კორონავირუსი – აზერბაიჯანის ეკონომიკის ორი უბედურება
- ყველაფერი აზერბაიჯანის საპარლამენტო არჩევნების შესახებ ერთ წუთში
საიდ მამედზადე საჯარო ღონისძიებების დროს ალი ქერიმლის უსაფრთხოებას საზოგადოებრივ საწყისებზე უზრუნველყოფდა. მას ბრალად სდებენ, თითქოს ის ვიღაცას თავს დანით დაესხა, – წერს „კავკაზსკი უზელი“. ამისთვის მამედზადეს ორიდან ექვს წლამდე პატიმრობა ემუქრება. ჯერჯერობით კი სასამართლომ მას აღმკვეთ ღონისძიებად სამთვიანი პატიმრობა შეუფარდა.
შინაგან საქმეთა სამინისტროს პრეს-სამსახურში დაადასტურეს, რომ მამედზადე დაპატიმრებულია, თუმცა ირწმუნებიან, რომ მისი ოპოზიციური საქმიანობა ამასთან კავშირში არ არის.
ნებართვის მიღება სანაპიროზე წასასვლელად
ბაქოს აღმასრულებელი ხელისუფლების ხელმძღვანელი ელდარ ავიზოვი სანაპიროზე ადგილის ელექტრონულად დაჯავშნის სისტემის შემოღებას სთავაზობს. ანუ, სანაპიროზე მოსახვედრად, ადამიანებმა საგანგებო ელექტრონული სისტემის საშუალებით ადგილი წინასწარ უნდა დაჯავშნონ. ჩინოვნიკები ამ გზით ადამიანების თავშეყრის თავიდან აცილებას იმედოვნებენ, – წერს 1news.
ქალაქელებმა ეს სიახლე ძირითადად ირონიით აღიქვეს. ვერავინ, მათ შორის ვერც ჩინოვნიკები, ჯერჯერობით კარგად ვერ ხვდებიან, თუ როგორ უნდა განხორციელდეს ტექნიკურად ეს იდეა. ელექტრონული სისტემა ჯერჯერობით შემუშავებული არ არის, არ არის მოფიქრებული ნიუანსები. მაგალითად, ბაქოს გარეუბნებში, „რეგულირებადი“ ფასიანი სანაპიროების გარდა, არსებობს ასევე უფასო საზოგადოებრივი სანაპიროები, რომლებსაც თვალ-ყურს არავინ ადევნებს (მაშველების გარდა). ჩვეულებრივ ბევრი ხალხი სწორედ ამ სანაპიროებზე იყრის თავს. და გაურკვეველია, თუ როგორ აპირებს ხელისუფლება იქ მიმსვლელთა რაოდენობის გაკონტროლებას.
- „დილამდე ვიცეკვებ და ტატუს გავიკეთებ“, – ბაქოელები კარანტინის შემდგომი ცხოვრების გეგმებს გვიზიარებენ
- არტ-პროვინცია: როგორ ავითარებენ ახალგაზრდები კულტურულ ცხოვრებას აზერბაიჯანის რეგიონებში
ჩვეულებრივ, აზერბაიჯანში ზღვის სეზონი ოფიციალურად ივნისის შუა რიცხვებში იწყება, მაგრამ წელს ეს ჯერჯერობით კითხვის ნიშნის ქვეშაა. მიუხედავად ამისა, ზოგიერთმა ქალაქელმა ზღვაზე სიარული უკვე დაიწყო.
აზერბაიჯანელ ოპოზიციონერს ტერორიზმის დაფინანსებაში ადანაშაულებენ
ოპოზიციური პარტიის „აზერბაიჯანის სახალხო ფრონტის“ აქტივისტს ნიამედინ ახმედოვს ბრალად ტერორიზმის დაფინანსებას სდებენ. მას 10-დან 14 წლამდე პატიმრობა ემუქრება.
თავად ის ამ ბრალდებას უარყოფს, „აზერბაიჯანის სახალხო ფრონტში“ კი მიაჩნიათ, რომ ხელისუფლება ამით ახმედოვზე შურს იძიებს.
- ყველაფერი აზერბაიჯანის არჩევნების შესახებ. ვიდეო
- როგორ აპირებს ყოფილი აზერბაიჯანელი პოლიტპატიმარი არჩევნებში ალიევის დამარცხებას. ვიდეო
2020 წლის 15 აპრილს ნიამედინ ახმედოვი დააკავეს და 30 დღე-ღამით ადმინისტრაციული პატიმრობა მიუსაჯეს. მას ბრალად საკარანტინო რეჟიმის დარღვევა და პოლიციისადმი დაუმორჩილებლობა დასდეს.
მისი თქმით, ძალოვანები მას აწამებდნენ, და „აზერბაიჯანის სახალხო ფრონტის“ ლიდერის ალი ქერიმლის წინააღმდეგ ჩვენების მიცემას აიძულებდნენ.
15 მაისს, როდესაც ადმინისტრაციული პატიმრობის ვადა ამოიწურა, ახმედოვი არ გაათავისუფლეს, და მას ახალი ბრალდება წაუყენეს – ტერორიზმის დაფინანსება. საუბარია ფულზე, რომელსაც ახმედოვს უცხოეთში მცხოვრები ადამიანი უგზავნიდა, – ჰყვება ადვოკატის სიტყვებზე დაყრდნობით „კავკაზსკი უზელი“.
თავად ახმედოვი ამბობს, რომ მას უბრალოდ ვალი დაუბრუნეს. ჯერჯერობით სხვა არავითარი წვრილმანი ცნობილი არ არის.
