შრომის ინსპექცია ღამის კლუბებს ლუქავს. მეპატრონეები აქციისთვის ემზადებიან
საქართველოს შრომის ინსპექცია ღამის კლუბებს ლუქავს. BASSIANI-ს ერთ-ერთი დამფუძნებლის, ნაჯა ორაშვილის თქმით, სახელმწიფოსთან კლუბების გახსნის ნაწილში 6 თვის განმავლობაში თანამშრომლობდნენ, თუმცა არც ერთმა უწყებამ მათ მიერ შემუშავებული სამოქმედო გეგმა არ გაითვალისწინა.
კლუბი “მტკვარზე” დამფუძნებელი ქეთა გაბუნია კი სოციალურ ქსელში შრომის ინსპექციის უფროსის მოადგილის, მაია მიქაიას წერილს ასაჯაროებს, რომლის მიხედვით ირკვევა, რომ სახელმწიფოსა და ღამის კლუბებს შორის მოლაპარაკების შემდეგ, აღნიშნული სივრცეები 17 დეკემბერს უნდა გახსნილიყო.
ნაჯა ორაშვილის თქმით, მოლაპარაკებების შედეგი არის – შანტაჟი, დაშინება და ღამის კლუბების განადგურება. მისივე განმარტებით, კლუბები იყვნენ ერთ-ერთი პირველები, რომლებმაც პანდემიის დაწყების შემდეგ, პასუხისმგებლიანად მოიქცნენ და დახურვის შესახებ განაცხადეს, მას შემდეგ კი 22 თვე გავიდა.
“თუნდაც თავისუფლების აღკვეთად დამიჯდეს, ამ სივრცეს არ დავალუქინებ. იმიტომ, რომ სახელმწიფო არის ან მზრუნველი ან მას სხვა გეგმები და მიზნები აქვს. ჩვენ 6 თვე ვიმუშავეთ გამოსავალზე, ცოდნაზე და გამოცდილებაზე დაფუძნებულ სტანდარტზე, რომელსაც უნდა უზრუნველყო დახურულ სივრცეებში ვირუსის გავრცელების რისკის მინიმუმამდე დაყვანა. მათ ამაზე უარი გვითხრეს. შესაბამისად მიზანი არის ამ თავისუფალი და უსაფრთხო სივრცეების ფიზიკური განადგურება, ჩვენი დაშინება.
პირადად მე 400-გვერდიანი სახელმძღვანელო დოკუმენტი მაქვს გაკეთებული, ორი კვლევა გვაქვს შემუშავებული. ძალიან კარგად გვესმის ეპიდემიოლოგიური სიტუაციების სიმწვავე, მისი ტრაგიკული შედეგები, მაგრამ პირველებმა დავხურეთ ამ მოტივით. 22 თვე ველოდებოდით, ვეძებდით გამოსავალს და ვიპოვეთ ეს გამოსავალი. ეს უწყებები უნდა დათანხმებოდნენ ამ გამოცდილებას. 6 თვე ველაპარაკეთ, შედეგი არის – შანტაჟი, დაშინება, განადგურება”, – განაცხადა “ფორმულას” ეთერში ნაჯა ორაშვილმა.
კლუბების მეპატრონეები ამბობენ, რომ “ამ უსამართლობას” არ შეეგუებიან და ფართომასშტაბიან აქციებს გამართავენ.
● საკოორდინაციო საბჭოს გადაწყვეტილებით, საქართველოში ღამის კლუბები არ გაიხსნება
● 18 თვე კორონავირუსთან ერთად: დაავადებათა კონტროლის ცენტრის ვრცელი ანგარიში
● შრომის ინსპექცია მოუწოდებს რესტორნებს, არ გაუკეთონ მწვანე სტატუსის არმქონე პირებს სწრაფი ტესტი
საქართველოში ღამის კლუბებში ღონისძიებების გამართვა ნებადართული ამ დრომდე არ არის. უკვე რამდენიმე თვეა, საკლუბო ინდუსტრია გახსნასთან დაკავშირებით მთავრობასთან მოლაპარაკებებს აწარმოებს.
3 დეკემბერს გავრცელდა ინფორმაცია, რომ ღამის კლუბები მუშაობას 17 დეკემბერს განაახლებდნენ. შრომის ინსპექციამ მაშინ განაცხადა, რომ სხვა პასუხისმგებელ უწყებებთან ერთად კორონავირუსის პანდემიის ფონზე მუშაობენ უსაფრთხოების პროტოკოლზე. თუმცა, საკოორდინაციო საბჭომ ღამის კლუბების გახსნაზე 22 დეკემბერს უარი განაცხადა.
პროფკავშირების ინფორმაციით, საკლუბო სექტორში დაახლოებით 8 000 ადამიანია დასაქმებული და ისინი 21 თვეა შემოსავლის გარეშე არიან.
