პარლამენტის თავმჯდომარე საზოგადოების სახელით ოპოზიციისთვის "პასუხის მოთხოვნას" აანონსებს
შალვა პაპუაშვილი რეპრესიებს აანონსებს
საქართველოს პარლამენტის თავმჯდომარე შალვა პაპუაშვილი საზოგადოების სახელით ოპოზიციისთვის “პასუხის მოთხოვნას” აანონსებს. მისი თქმით, რომელ ქალაქში, სოფელში და უბანშიც არ უნდა მივიდეს ოპოზიცია, “გასაკვირი არაა”, რომ მათ პასუხს მოსთხოვენ.
შალვა პაპუაშვილმა ე.წ. გლობალურ პარტიაზეც ისაუბრა და განაცხადა, რომ “გლობალური ომის პარტიაა” ყველა, ვინც საქართველოს მოუწოდებდა გაეგზავნა მოხალისეები უკრაინაში, მიეწოდებინა იარაღი უკრაინისთვის და დაეწესებინა სანქციები რუსეთისთვის, საქართველოს რუსეთთან რუსეთთან ომში ჩართვისკენ უბიძგებდა.
რა თქვა შალვა პაპუაშვილმა
“ბოლო პერიოდში ვხედავთ რადიკალური ოპოზიციის შეცვლილ რიტორიკას საქართველოს ხელისუფლების მიერ რუსეთისთვის სანქციების არ დაწესების პოლიტიკის მიმართ. ადამიანები, რომლებიც ქსენოფობიის დონემდე მისულ ისტერიას თესავდნენ, დღეს რუსეთთან ღვინით და ვაშლით ვაჭრობაზე და რუსი ტურისტებისგან მიღებულ სარგებელზე ალაპარაკდნენ. ცხვრის ქურქის მოსხმის ეს ტაქტიკა ოპოზიციის მხრიდან ახალი არ არის, ეს მათი ნირი და წესია.
არჩევნების მოახლოებასთან ერთად დადგა მომენტი, როდესაც მათ მოუწევთ მოსცილდნენ საკუთარ Facebook გვერდებს, გამოვიდნენ საკუთარი ტელევიზიების სტუდიებიდან და ხალხს დაელაპარაკონ და განა გასაკვირი უნდა იყოს, რომ კახელები პასუხს მოსთხოვენ ოპოზიციას ღვინის შეგინებისთვის? განა გასაკვირი უნდა იყოს, რომ აჭარლები პასუხს მოსთხოვენ ოპოზიციას ტურისტებისთვის კვერცხების დაშენისთვის? განა გასაკვირი უნდა იყოს, რომ ქართველები, ვისაც ოჯახის წევრები ჰყავთ რუსეთში, პასუხს მოსთხოვენ ოპოზიციას აეროპორტის პიკეტირებისთვის?
და ბოლოს, რომელ ქალაქშიც, რომელ სოფელშიც და რომელ უბანშიც არ უნდა მივიდნენ, განა გასაკვირია, რომ მათ პასუხს მოსთხოვენ იმისთვის, რომ ხალხს ომისთვის, ნგრევისთვის და სიკვდილისთვის სწირავდნენ.”
შალვა პაპუაშვილმა მიმართა ჟურნალისტს, რომელმაც ე.წ. გლობალურ ომის პარტიაზე შეკითხვა დაუსვა. პარლამენტის თავმჯდომარის თქმით:
“ყველა, ვინც საქართველოსგან ითხოვდა მოხალისეების გაგზავნას, იარაღის მიწოდებას, სანქციის დაწესებას, ჩვენ გვიბიძგებდა ომისკენ. რაც შეეხება მტკიცებულებებს – არის ასეთი გამონათქვამი, “ადამიანს თუ არ უნდა რიყეზე ისე გავა, ქვას ვერ დაინახავს“. თქვენ ახლა რიყეზე ხართ, გარშემო ქვებია მიმობნეული და ამ ქვებს ვერ ხედავთ. ამას გეუბნებით, რომ დაინახეთ ქვები, ეს ქვები ძალიან კარგად ჩანს.
თუ არ გინდათ დანახვა, ვერ დაინახავთ, თქვენი ამოცანა თუ ეს არის. პირდაპირ გეუბნებით, ყველა, ვინც საქართველოს მოუწოდებდა გაეგზავნა მოხალისეები უკრაინაში, მიეწოდებინა იარაღი უკრაინისთვის და დაეწესებინა სანქციები რუსეთისთვის, საქართველოს უბიძგებდა რუსეთთან ომში ჩართვისკენ. ამაზე მეტი ცხადად როგორ გითხრათ?!
11 ივნისს საკუთარ სახლთან დახვდნენ და სასტიკად სცემეს სამოქალაქო აქტივისტს ზუკა ბერძენიშვილს. როგორც მისი მეგობარი სალომე ნიკოლეიშვილი ფეისბუკზე წერს, შემთხვევა დილის 11 საათისთვის მოხდა, ზუსტად ერთ საათში, მას შემდეგ, რაც პარლამენტის თავმჯდომარემ, შალვა პაპუაშვილმა გამოაქვეყნა ფეისბუკზე პოსტი, რომელიც ზუკა ბერძენიშვილს ეხებოდა.
პაპუაშვილი თავის პოსტში “ჯემნიუსს” და “ჯემნიუსის” თანამშრომელსაც ახსენებს. “ჯემნიუსმა” არაერთხელ განმარტა, რომ პოსტი, რომელსაც პაპუაშვილი “კეფაში ტყვიის მუქარას” უწოდებს, იყო სტენსილი ვახუშტის ხიდზე და არა “ჯემნიუსის” მიერ გაკეთებული წარწერა.
უკვე რამდენიმე თვეა “აგენტების კანონის“ მოწინააღმდეგე ადამიანების მიმართ სატელეფონო გინების, მუქარის, ქუჩაში დახვედრისა და ცემის, სახლთან თუ ოფისებთან შეურაცხმყოფელი შინაარსის წარწერების დატოვების პირველი ტალღა გრძელდება.
ერთ-ერთი ბოლო შემთხვევა 7 ივნისს მოხდა, როდესაც თბილისის სახელმწიფო უნივერსიტეტის პირველ კორპუსთან რამდენიმე პირი თავს დაესხა და სცემა აქტივისტს და სტუდენტური მოძრაობის ერთ-ერთ ლიდერს, ნიკო მანაგაძეს.
მანამდე დღისით, ავტობუსის გაჩერებასთან თავს დაესხნენ “გირჩის” წევრს ცოტნე კობერიძეს.
გამოძიებას ამ დრომდე არ ჰყავს იდენტიფიცირებული აქტივისტებზე თავდამსხმელი არც ერთი პირი მაშინ, როდესაც მთელ რიგ ვიდეოებში კარგად ჩანს თავდამსხმელთა სახეები.
