საქართველოში იქმნება აპლიკაცია, რომელიც კოვიდსტატუსის იდენტიფიცირებას მოახდენს
საქართველოს ჯანდაცვის სამინისტრო მუშაობს აპლიკაციის შექმნაზე, რომელიც QR კოდით მოქალაქის კოვიდსტატუსის იდენტიფიცირებას მოახდენს. ამის შესახებ საკოორდინაციო საბჭოს დასრულების შემდეგ შრომის ინსპექციის უფროსმა, ბექა ფერაძემ განაცხადა. სხდომის დასრულების შემდეგ ცნობილი გახდა ისიც, რომ საქართველოში ტრანსპორტი 13 სექტემბერს ამუშავდება, ხოლო სკოლები, სავარაუდოდ, 4 ოქტომბერს დაიწყება.
___________________
როგორც ბექა ფერაძემ განაცხადა, აპლიკაციაში იქნება სრული ინფორმაცია მოქალაქის PCR და სწრაფი ტესტის პასუხისა და ვაქცინაციის შესახებ. ასევე, ამ აპლიკაციის მეშვეობით აბსოლუტურად გათვალისწინებულია პერსონალური მონაცემების სრული დაცვა და მისი გამოყენებით მომხმარებელი ადასტურებს, რომ ეთანხმება მისი ინფორმაციის დამუშავებას.
“აპლიკაცია მოიცავს ბოლო 72 საათში PCR ტესტის უარყოფით პასუხს, სწრაფი ტესტის უარყოფითი პასუხი ასახული იქნება 24 საათის განმავლობაში, ასევე აპლიკაციაში იქნება ინფორმაცია ვაქცინაციაზე, აცრილია თუ არა ადამიანი და ბოლო 6 თვის განმავლობაში თუ აქვს კოვიდი გადატანილი”, – აღნიშნა ფერაძემ.
მისი განმარტებით, იმ შემთხვევაში, თუ მოქალაქეს არ ექნება შესაბამისი სმარტფონი აპლიკაციის ჩამოსატვირთად, მას შეეძლება საკუთარი QR კოდის ამობეჭდვა.
საკოორდინაციო საბჭოს შემდეგ კიდევ ერთი გადაწყვეტილება გახდა ცნობილი – საქართველოში 13 სექტემბრიდან მუნიციპალური ტრანსპორტის მოძრაობა აღდგება.
დიდ ქალაქებში საზოგადოებრივი ტრანსპორტის მოძრაობა 14 აგვისტოს შემდეგ შეიზღუდა, შეზღუდვა 4 სექტემბერს უნდა მოხსნილიყო, თუმცა საკოორდინაციო საბჭოს გადაწყვეტილებით, 13 სექტემბრამდე გახანგრძლივდა.
კოვიდვითარებაზე კომენტარი გააკეთა ჯანდაცვის მინისტრმა ეკატერინე ტიკარაძემაც. მისი თქმით, თითქმის გადაწყვეტილია, რომ სწავლა კლასებში 4 ოქტომბერს დაიწყება.
ასევე, მინისტრის განმარტებით, მნიშვნელოვანია არა მასობრივი, არამედ მიზნობრივი ვაქცინაცია:
“საქართველოს მაგალითზე ჩვენ დავაკვირდით, თუ რომელი ჯგუფი ავადდება ყველაზე მეტად, რომელი ჯგუფის ჰოსპიტალიზაცია ხდება ყველაზე მეტად და ჰოსპიტალიზებულთა შორის, ვისი ლეტალობა არის მაღალი და აქ ცალსახად გამოიკვეთა ის ასაკობრივი გრადაცია და ასაკობრივი პირამიდა, რომელიც ჩვენ უკვე რამდენჯერმე განვმარტეთ – ეს ძირითადად არიან 60 წელს ზევით მოქალაქეები და მოქალაქეები, რომლებსაც აქვთ მძიმე ქრონიკული დაავადებები.”
_____________________________________________
● საქართველოს პრეზიდენტი: დღეს პატრიოტიზმი და ვაჟკაცობა გადის ვაქცინაციაზე
● საქართველოში კათოლიკე სასულიერო პირების 83 პროცენტი აცრილია
● ეკლესია და Pfizer-ი: რატომ ჩააგდო საქართველომ ვაქცინაციის კამპანია
_____________________________________________
საქართველოში ახალი შეზღუდვები 14 აგვისტოდან მოქმედებს. შესაბამისად, 14 აგვისტოდან შეზღუდულია მუნიციპალური ტრანსპორტის მოძრაობა. ასევე, სრულად იზღუდება ფესტივალები, გასართობი ღონისძიებები, კონცერტები და სპორტული შეჯიბრებები. ამასთან ერთად იზღუდება ბავშვთა გასართობი ცენტრების მუშაობაც.
ეპიდვითარების გაუარესების გამო, 2 ოქტომბერს დაგეგმილი თვითმმართველობის არჩევნების გადადების მოთხოვნით გამოვიდა საქართველოს სახალხო დამცველი ნინო ლომჯარია.
ბოლო თვეებია საქართველოში ყოველდღიურად კორონავირუსით 6000-მდე ინფიცირების და 80-მდე გარდაცვალების შემთხვევაა. თუმცა დღეს, 7 სექტემბერს, სხვა დღეებთან შედარებით ყველაზე ნაკლები, 1 965 ახალი შემთხვევა დაფიქსირდა, რაზეც დაავადებათა კონტროლის ცენტრის დირექტორმა, ამირან გამყრელიძემ განაცხადა, რომ ეს რეალური ციფრი არ არის.
მისი განმარტებით, გუშინ სერვერებზე შეფერხებები იყო, რის გამოც პორტალზე ყველა შედეგი არ არის ატვირთული.
“ეს შედეგები, ალბათ, დღეს დღის განმავლობაში აიტვირთება და ხვალ ვნახავთ, როგორი იქნება შემთხვევათა რაოდენობა”, – თქვა გამყრელიძემ.
18 აგვისტოს ბრიფინგზე ჯანდაცვის მინისტრის მოადგილემ, თამარ გაბუნიამ თქვა, რომ ინფიცირების ტემპი ისევ მაღალია და სტაბილიზაციის ნიშნები არცერთ რეგიონში არ არის.
დაავადებათა კონტროლის ცენტრი ამბობს, რომ თუ დადებითობის მაჩვენებელი 4 პროცენტზე დაბლა არ იქნება, სწავლის დაწყების რეკომენდაციას ვერ გასცემენ.
7 სექტემბრის მონაცემებით სულ საქართველოში ჩატარებულია 1 340 062 აცრა:
1 დოზით ვაქცინირებულია 850 868 ადამიანი – მოზრდილი მოსახლეობის 29.8%;
სრულად ვაქცინირებულია 489 194 ადამიანი – მოზრდილი მოსახლეობის 17.1%.
