საქართველოში ღია რესტორნები და სავაჭრო მოლები გაიხსნა

პირველი ივნისიდან საქართველოში ღია რესტორნები, კაფეები,  დიდი სავაჭრო ცენტრები და ღია და დახურული ბაზრობები გაიხსნა. 

1 ივნისის მონაცემებით, საქართველოში კორონავირუსით ინფიცირების 794 შემთხვევაა დადასტურებული. კარანტინის რეჟიმშია 2494 ადამიანი, ხოლო სტაციონარში მეთვალყურეობის ქვეშ – 301 პირი. კორონავირუსით ინფიცირებულთაგან 624 გამოჯანმრთელდა და 12  გარდაიცვალა.

ღია რესტორნები და კაფეები, ისევე როგორც დიდი სავაჭრო ცენტრის მაღაზიები და ბაზრობები ვალდებულები არიან ჯანდაცვის სამინისტროს მიერ დადგენილი სანიტარულ-ჰიგიენური წესები დაიცვან. 

ნიღბის გამოყენება ყველგან სავალდებულოა.

ადამიანთა თავშეყრის თავიდან აცილების მიზნით, რესტორანმა წინასწარი ჩაწერის სერვისი უნდა დანერგოს. აუცილებელია, სტუმრის ადგილის წინასწარ განსაზღვრა იატაკლზე ნიშნულის გაკეთებითა და დისტანციის გათვალისწინებით. რეკომენდირებულია უნაღდო ანგარიშსწორება.

რეგულაციები რესტორნებისა და კაფეებისთვის:

რესტორნებსა და კაფეებში ბევრი ხალხის თავშეყრის თავიდან აცილების მიზნით ადგილების წინასწარი დაჯავშნის სისტემა ამოქმედდება. 

ყველა რესტორანი და კაფე ვალდებულია მომხმარებელს სიცხე გაუსინჯოს. სტუმარი, რომელსაც 37 გრადუსზე მაღალი სიცხე ექნება, არ დაიშვება. 

• ინფიცირებული კოღოები და ამერიკული თვითმფრინავი – მოსკოვი ლუგარის ლაბორატორიის ინსპექტირებას ითხოვს. რას პასუხობს თბილისი
• ეკლესია, რომელმაც ტრანსგენდერი ადამიანები შეიფარა. ვიდეო
• 434 მლნ ლარი სამშენებლო სექტორის გადასარჩენად – რას გულისხმობს ხელისუფლების ანტიკრიზისული გეგმა

შესასვლელში უნდა განთავსდეს დეზობარიერი, სალაროსთან კი დამცავი, გამჭვირვალე ბარიერი, რათა მომხმარებელთან პირდაპირი კომუნიკაცია არ მოხდეს.

მაგიდებს შორის დაცული უნდა იყოს 2-მეტრიანი დისტანცია. აკრძალულია მაგიდასთან 6-ზე მეტი ადამიანის დაჯდომა.

რესტორნებმა და კაფეებმა მომხმარებლებს ერთჯერადი მენიუ უნდა შესთავაზონ. 

ფულთან კონტაქტის თავიდან აცილების მიზნით, რეკომენდებულია უნაღდო ანგარიშსწორება.

შეზღუდვებია დაწესებული დიდ სავაჭრო ცენტრებსა და მაღაზიებშიც 

შესასვლელთან უნდა განთავსდეს დეზობარიერი და მაღაზიაში შესულ ყველა მომხმარებელს სიცხე გაუსინჯონ. 

უნდა გაკონტროლდეს მაღაზიაში მომხმარებელთა რაოდენობაც – 5 კვადრატულ მეტრზე მხოლოდ 1 ადამიანი უნდა იყოს. 

მომხმარებლებს შორის დაცული უნდა იყოს სოციალური დისტანცია. სალაროსთან რიგისთვის იატაკზე სპეციალური ადგილები უნდა მოინიშნოს. 

აუცილებელია ბუნებრივი ვენტილაცია. თუ ამის შესაძლებლობა არ არსებობს, ხელოვნური ვენტილაცია დასაშვებია გარედან შემოსული ჰაერის მომატებული კონცენტრაციით, ცირკულაციითა და გარეთ გატანით.

მიუხედავად იმისა, რომ ასეთი რეკომენდაცია საქართველოს ჯანდაცვის სამინისტროს არ გაუცია, ისეთ ბრენდულ მაღაზიებში, როგორიცაა Zara, Bershka, Marks&Spencer და სხვა, საერთაშორისო სტანდარტებს გამოიყენებენ და გამოსაცვლელი ოთახები დროებით გაუქმდება: ამ მაღაზიებში მომხმარებელი ტანსაცმელს ადგილზე ვეღარ მოისინჯავს. 

სამაგიეროდ, გაიზრდება დაბრუნება-გადაცვლის პროცედურის ვადა. მომხმარებელს საშუალება ექნება, რომ  ტანსაცმელი მაღაზიას 14-დღიან ვადაში დაუბრუნოს. 

მიბრუნებული ტანსაცმელი პირდაპირ დარბაზში აღარ მოხვდება: მას სპეციალურ ზონაში მოათავსებენ, სადაც დეზინფექცია ჩაუტარდება. დარბაზში ის 48 საათის გასვლის შემდეგ დაბრუნდება.

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. კორონავირუსის პანდემიის შესაჩერებლად 21 მარტიდან 23 მაისამდე საქართველოში საგანგებო მდგომარეობა იყო გამოცხადებული. 

კორონავირუსის პანდემიის გამო დაწესებული შეზღუდვების მოხსნის პირველი ეტაპი საქართველოში 27 აპრილიდან ამოქმედდა. 15 ივნისიდან საქართველო შიდა ტურიზმის განახლებას გეგმავს, 1 ივლისიდან კი საზღვრების გახსნას და უცხოელი ტურისტების მიღებას.