საქართველოში COVID-19-ის საწინააღმდეგო ვაქცინაცია დაიწყო

საქართველოში COVID-19-ის საწინააღმდეგო ვაქცინაცია დაიწყო. პირველ ეტაპზე აცრები სამედიცინო პერსონალს უტარდება. საზოგადოებისთვის ცნობილმა ექიმებმა ვაქცინა სხვადასხვა კლინიკებში პირდაპირ ეთერში გაიკეთეს.

დაავადებათა კონტროლის ეროვნული ცენტრის ხელმძღვანელის მოადგილე პაატა იმნაძე ერთ-ერთი პირველი იყო მათგან, ვინც კამერების წინ საჯაროდ აიცრა.

“ამაში არაფერია საშიში. თავს ვგრძნობ გადასარევად, – თქვა პაატა იმნაძემ აცრის შემდეგ – დღეს მნიშვნელოვანი დღეა ჩვენი ქვეყნისთვის. დღეს იწყება ჩვენს ქვეყანაში ეპიდემიის დასრულების დასაწყისი. ყველამ უნდა გავითავისოთ, რომ ეს ვაქცინა არის ერთადერთი გზა იმისკენ, რომ ჩვენი ქვეყანა ნორმალურ ცხოვრებას დაუბრუნდეს”.

ვაქცინაციის დაწყებაზე კომენტარი გააკეთა  ინფექციური საავადმყოფოს სამედიცინო დირექტორმა, მარინა ეზუგბაიამ. მან ანტივაქსერებს მოუწოდა, ჩაიტარონ ვაქცინაცია და ამით დაიცვან საკუთარი თავი და ქვეყანა:

“ანტივაქსერებში შეიძლება სხვადასხვა ტიპის ადამიანები იყვნენ. ის ვინც რეალურად ანტივაქსერები არიან და ის ვინც გარკვეულწილად კონფრონტაციაში არიან ქვეყანასთან. ანტივაქსერებს მოვუწოდებ, რომ გადადონ თავიანთი მიმართულება ამ საკითხის მიმართ და ჩაიტარონ ვაქცინაცია, რადგან ამით დაიცავენ საკუთარ თავს, ოჯახს, ახლობლებს და ქვეყანას”

რესპუბლიკურ საავადმყოფოში ვაქცინაციის პროცესს დაესწრო დაავადებათა კონტროლის ეროვნული ცენტრის დირექტორი ამირან გამყრელიძეც.

მისი თქმით, ვაქცინაციის დაწყება ძალიან კარგია, მაგრამ მთავარი მაინც დამთავრებაა.

“ჩვენ უნდა ავცრათ წელს მილიონ 600 ათასი – მილიონ 700 ათასამდე ადამიანი. თუ ამას გავაკეთებთ, მაშინ ვუბრუნდებით ცხოვრების ჩვეულებრივ რიტმს”, – განაცხადა გამყრელიძემ.

ასტრაზენეკას განცხადება: ვაქცინაციით თრომბოზის განვითარების რისკი არ დასტურდება

ასტრაზენეკას ვაქცინის მოხმარება რამდენიმე ევროპულმა ქვეყანამ შეაჩერა და მიზეზად თრომბული მოვლენები დაასახელა, რასაც კომპანიის მხრიდან მყისიერი პასუხი მოჰყვა.

ასტრაზენეკა აცხადებს, რომ მას შემდეგ, რაც ევროკავშირსა და ბრიტანეთში 17 მილიონზე მეტი ადამიანი აიცრა, მათზე დაკვირვებამ და უსაფრთხოების ყველა მონაცემის განხილვამ აჩვენა, რომ ფილტვის ემბოლიის, ვენის ღრმა თრომბოზის ან თრომბოციტოპენიის განვითარების რისკი არც ერთ ასაკობრივ და სქესობრივ ჯგუფსა თუ რომელიმე კონკრეტულ ქვეყანაში არ დასტურდება. 

კომპანიაში ასევე ამბობენ, რომ 17 მილიონი ვაქცინირებული ადამიანიდან მხოლოდ 15 ადამიანის დაუდასტურდა ვენის ღრმა თრომბოზი და 22 ადამიანს – ფილტვის ემბოლია, რაც ვერ იქნება დაკავშირებული აცრის უკუჩვენებებთან, რადგან მოსახლეობის ამ რაოდენობისთვის მსგავსი სიმპტომები ბუნებრივია. 

კლინიკური ცდებით დადასტურდა, რომ თრომბოზული მოვლენების რაოდენობა მცირე იყო ვაქცინირებულ ჯგუფებში. ასევე არ არსებობს სისხლდენის მომატების მტკიცებულება. 

____________________________________

● კერძო სადაზღვევო კომპანია “ჯიპიაი” ამბობს, რომ მარტის ბოლოს ასტრაზენეკას შემოიტანს და დაზღვეულებს აცრის
● ფეისბუკ-ჯგუფები, როგორც ჯანდაცვის სისტემის ალტერნატივა? VIDEO
● რა არის ცნობილი კორონავირუსის ვაქცინებზე, დაამარცხებენ თუ არა ისინი პანდემიას და როდის?

____________________________________

საქართველომ COVAX პლატფორმის საშუალებით ასტრაენეკას ვაქცინის 43,200 დოზა 13 მარტს მიიღო. ვაქცინა AstraZeneca-SKBio-ს (კორეის რესპუბლიკა) მიერ არის დამზადებული.

ეს ვაქცინის პირველი პარტიაა, რომელიც ქვეყანამ მიიღო.

აღნიშნული ვაქცინის შეძენაში ქვეყნის მთავრობას გაეროს ბავშვთა ფონდი (UNICEF) დაეხმარა. ჯანდაცვის მინისტრის თქმით, შერჩეულია ის 82 სამედიცინო დაწესებულება, სადაც ვაქცინაციის პროცესი დაიწყება.