საქართველოსა და რუსეთის მოქალაქეებს ბრიტანეთის გავლით მოგზაურობისთვის სატრანზიტო ვიზა დასჭირდებათ

საქართველოსა და რუსეთის მოქალაქეები ბრიტანეთში

საქართველოსა და რუსეთის მოქალაქეებს ბრიტანეთის გავლით მოგზაურობისთვის ე.წ. სატრანზიტო ვიზა დასჭირდებათ. აღნიშნული რეგულაცია ძალაში 8 სექტემბერს შევიდა.

კერძოდ, საუბარია ადამიანებზე, რომლებიც ბრიტანეთის ტერიტორიაზე არ შედიან და მხოლოდ ტრანზიტით [გავლით] სარგებლობენ. როგორც დიდი ბრიტანეთის შსს განმარტავს, რუსეთის და საქართველოს მოქალაქეებს შორის ყველაზე ხშირია ტრანზიტის დროს თავშესაფრის მოთხოვნა.

ცვლილება არ შეეხებათ საქართველოს, რუსეთისა და წითელ სიაში მყოფი სხვა მრავალი ქვეყნის იმ მოქალაქეებს, რომლებიც ფლობენ ავსტრალიის, კანადის, ახალი ზელანდიის ან შეერთებული შტატების ვიზას ან აქვთ ევროკავშირის ქვეყნებში ბინადრობის უფლება.

ასევე, შეზღუდვები არ ეხება მათ, ვინც ბილეთი იყიდა 8 სექტემბრის 00:01 საათამდე [ბრიტანეთის დროით].

ბრიტანეთის ხელისუფლების წარმომადგენელთა ცნობით, 2018 წლიდან საქართველოსა და რუსეთის მოქალაქეები მუდმივად მოწინავე ადგილებს იკავებენ იმ ქვეყნებს შორის, რომლებიც თავშესაფრის მოთხოვნით გაერთიანებული სამეფოს სატრანზიტო დებულებებს “ბოროტად იყენებენ.”

ბრიტანეთის შინაგან საქმეთა სამინისტროში აცხადებენ, რომ გაერთიანებულ სამეფოში სტუმრობამდე საქართველოსა და რუსეთის მოქალაქეებისთვის ვიზის ქონის აუცილებლობა თავშესაფრის მოთხოვნის მიზნით ბრიტანეთში გამგზავრების ფაქტებს შეამცირებს.

სატრანზიტო ვიზა 48 საათით ფორმდება. განცხადების შეტანა ვიზისთვის შესაძლებელია სავიზო და საიმიგრაციო სამსახურის ვებ-გვერდზე, სავიზო გადასახადის გადახდის შემდეგ.

მოგვიანებით ამ თემაზე ინფორმაცია გაავრცელა საქართველოს საგარეო საქმეთა სამინისტრომაც.

“8 სექტემბრიდან საქართველოს მოქალაქეებისთვის აეროპორტში ტრანზიტული გავლისას შემოღებულ იქნა ვიზის მიღების ვალდებულება (DATV). აღნიშნული კატეგორიის ვიზა საჭიროა მაშინ, როდესაც პირი მიემგზავრება მესამე ქვეყანაში, დიდ ბრიტანეთში იცვლის ფრენას და არ გადის სასაზღვრო შემოწმებას”, – ნათქვამია უწყების ინფორმაციაში, რომელშიც ასევე ხაზგასმულია, რომ დიდმა ბრიტანეთმა ეს რეჟიმი ასზე მეტ ქვეყანასთან მიმართებით შემოიღო.

● ზელენსკი: ყველა ევროპული ქვეყანა, რომელიც ესაზღვრება რუსეთს და არ უნდა რუსეთი, უნდა გახდეს ევროკავშირისა და NATO-ს წევრი
● Georgian Airways რუსეთის მოქალაქეებისთვის თბილისიდან ევროპაში ტრანზიტულ რეისებს იწყებს – RTVI
● ბელგიამ საქართველო უსაფრთხო ქვეყნების სიიდან ამოიღო. გამოხმაურება თბილისში

აღსანიშნავია, რომ სწორედ თავშესაფრის გაზრდილი მოთხოვნის გამო, გერმანიის კოალიციურმა მთავრობამ შინაგან საქმეთა მინისტრის, ნენსი ფეიზერის შემოთავაზებული კანონპროექტი მიიღო, რომლის მიხედვითაც საქართველო და მოლდოვა უსაფრთხო ქვეყნებად დასახელდა.

მინისტრის განმარტებით, საქართველოსა და მოლდოვაში მოქალაქეებს, როგორც წესი, პოლიტიკური დევნა არ ემუქრებათ და ქვეყნებისთვის უსაფრთხო სტატუსის მინიჭება გერმანიას საშუალებას მისცემს, არალეგალი მიგრანტები ქვეყნიდან გააძევოს.

გადაწყვეტილებით შესაძლებელი ხდება ქართველი და მოლდოველი თავშესაფრის მაძიებელი მიგრანტების აპლიკაციების უფრო სწრაფად განხილვა, რაც, აპლიკანტის განცხადების დაუკმაყოფილებლობის შემთხვევაში, მის დეპორტაციასაც დააჩქარებს.

მიმდინარე წლის 25 ივლისს კი ცნობილი გახდა, რომ ირლანდიის თავშესაფრის მაძიებელთათვის გამოყოფილ საცხოვრებლებში მცხოვრებ მოქალაქეთა შორის პირველ ადგილს ქართველები იკავებენ.

სტატისტიკის მიხედვით, თავშესაფრის მაძიებელთათვის გამოყოფილ საცხოვრებლებში 3432 ქართველი ცხოვრობს და ამ რაოდენობით საქართველო წინ უსწრებს ისეთ ქვეყნებს, როგორიცაა ნიგერია, ალჟირი და სირია.