საქართველოს პარლამენტმა ცესკოს თავმჯდომარე და ახალი სახალხო დამცველი ვერ აირჩია

პარლამენტმა ცესკოს თავმჯდომარე და ახალი სახალხო დამცველი ვერ აირჩია

საქართველოს პარლამენტმა ცესკოს თავმჯდომარე, პროფესიული წევრები და ახალი სახალხო დამცველი ვერ აირჩია. ომბუდსმენის კანდიდატის არჩევას პარლამენტის 90 დეპუტატის ხმა სჭირდება, თუმცა გამომდინარე იქიდან, რომ 90 ადგილი პარლამენტში არც ერთ პარტიას არ უკავია, სახალხო დამცველის დამტკიცებას როგორც მმართველი პარტიის, ასევე ოპოზიციის ხმები სჭირდება. 

ფრაქცია “ქართული ოცნების” თავმჯდომარე მამუკა მდინარაძემ 21 დეკემბერს აცხადებდა, რომ ომბუდსმენის არჩევას ამ სესიაზე ვერ შეძლებდნენ, რადგან, მისი თქმით, უმრავლესობის მიერ შეთავაზებული ომბუდსმენობის 5 კანდიდატიდან, ოპოზიცია არც ერთს არ უჭერს მხარს.

არასამთავრობო ორგანიზაციებმა პარლამენტს ანა აბაშიძის, ნაზი ჯანეზაშვილისა და გიორგი ბურჯანაძის კანდიდატურები შესთავაზეს და მათ მხარი დაუჭირა ოპოზიციის დიდმა ნაწილმაც.

ჯამში პარლამენტში ომბუდსმენობის 19 მსურველის განაცხადი შევიდა, ხოლო პარლამენტს რვა მათგანზე (ანა აბაშიძე, გიორგი ბურჯანაძე, ლელა გაფრინდაშვილი, თინათინ ერქვანია, ნუგზარ კოხრეიძე, გიორგი მარიამიძე, ქეთევან ჩაჩავა და იაგო ხვიჩია) უნდა ემსჯელა, თუმცა, “ქართულმა ოცნებამ” ოპოზიციას სახალხო დამცველის არჩევა მხოლოდ 5 კანდიდატიდან შესთავაზა, რომელთა შორის არც გიორგი ბურჯანაძეა და არც ანა აბაშიძე არ არის.

მმართველი გუნდი ოპოზიციას სთავაზობს მომავალი ომბუდსმენი ლელა გაფრინდაშვილს, თინათინ ერქვანიას, ნუგზარ კოხრეიძეს, გიორგი მარიამიძესა და ქეთევან ჩაჩავას შორის შეარჩიოს.

ვერც ცესკოს თავმჯდომარეზე და ვერც ცესკოს პროფესიული წევრების არჩევაზე პარლამენტმა რაიმე სახის გადაწყვეტილება ვერ მიიღო. პრეზიდენტმა სალომე ზუსრაბიშვილმა პარლამენტს ცესკოს თავმჯდომარის თანამდებობაზე თამარ ალფაიძისა და რევაზ ეგაძის კანდიდატურები წარუდგინა. თუმცა ვერც ერთმა მათგანმა საჭირო 100 ხმა ვერ მიიღო.

თამარ ალფაიძეს არც ერთმა დეპუტატმა არ დაუჭირა მხარი, ხოლო რევაზ ეგაძეს მხოლოდ ერთმა დეპუტატმა მისცა ხმა.

ამასთან, ცესკოს წევრის ერთ ვაკანტურ თანამდებობაზე წარდგენილნი იყვნენ გიორგი მარსაგიშვილი და ნათია წიპტაური, ხოლო მეორე ვაკანტურ თანამდებობაზე – ლევან ისაკაძე და ქრისტინე ქაჯაია. ვერც ერთმა მათგანმა საჭირო რაოდენობის მხარდაჭერა ვერ მიიღო. 

მოქმედი რეგულაციით, ცესკოს თავმჯდომარე და პროფესიული წევრები აირჩევიან პარლამენტის სრული შემადგენლობის 2/3-ით (100 ხმა).

ასეთი უმრავლესობით არჩევის შეუძლებლობის შემთხვევაში, მათ პარლამენტის 90 ხმა ამტკიცებს, ხოლო თუ ეს კვორუმიც ვერ შეგროვდა, ცესკოს წევრს პარლამენტის უბრალო უმრავლესობა ირჩევს.

თითოეულ კენჭისყრას შორის პერიოდი არანაკლებ 4 კვირა უნდა იყოს.

● სახალხო დამცველი: ქართული საზოგადოება გაცილებით პროგრესულია, ვიდრე პოლიტიკური ელიტა
● “კითხვებს აჩენს ორმაგი სტანდარტი” – ჯანეზაშვილი უარს ამბობს ომბუდსმენობის კანდიდატების გასაუბრებაში მონაწილეობაზე
● სახალხო დამცველი: გასულ წელს ადამიანის უფლებების მდგომარეობა რიგ შემთხვევებში უფრო დამძიმდა

უკვე ყოფილი სახალხო დამცველის, ნინო ლომჯარიას შესახებ კულტურის მინისტრმა, თეა წულუკიანმა განაცხადა, რომ ლომჯარია იყო “მიშას, ვანოსა და ბაჩოს სახალხო დამცველი”, და ასეთი ომბუდსმენი “ჩვენ არ გვჭირდება.”

“ამდენი წელი ლომჯარია არავის მეტის სახალხო დამცველი არ ყოფილა. ამიტომ, ჩვენ გვჭირდება ის სახალხო დამცველი, რომელიც ნამდვილად არის ყველას სახალხო დამცველი, რომ მას არ მოერიდება დაიცვას საქართველოს სოფლებში მცხოვრებელი თითოეული მოქალაქის უფლებები, ვინც არ უნდა იყოს ის, რომელ პარტიასაც არ უნდა მიეკუთვნებოდეს. ასევე დასრულებული დიდი ქალაქებით და გაგრძელებული პატიმრებით.

ჩვენ არ გვჭირდება სახალხო დამცველი, რომელიც იქნება ორი ან სამი კონკრეტული ყოფილი პოლიტიკოსი პატიმრის უფლებების დამცველი. ჩვენ გვჭირდება სახალხო დამცველი, ვინც ყველას უფლებებს დაიცავს. ასეთი კანდიდატია მოსაძებნი. შესაბამისად, ის, ვისაც ოპოზიცია უჭერს მხარს, ზოგიერთი მათგანი არის მხარდაჭერილი, რადგან იმედი აქვთ, რომ მხოლოდ მათ უფლებებს დაიცავს. ჩვენ კი გვჭირდება სრულიად სხვა მასშტაბისა და სხვა მიდგომების კანდიდატი.” – განაცხადა წულუკიანმა.