საქართველოს პარლამენტი, რომელსაც ამნისტიის კანონზე უნდა ემსჯელა, შვებულებაში გავიდა

შარლ მიშელის დოკუმენტზე ხელმომწერი პარტიები, რომლებიც სამშაბათს პარლამენტში მისვლას და ამნისტიის კანონპროექტზე მუშაობას გეგმავდნენ, ორი კვირით დაითხოვეს. ამის მიზეზი მმართველი პარტიის, “ქართული ოცნების” გადაწყვეტილება გახდა – მოულოდნელად პარლამენტმა შვებულების შესახებ განცხადება გაავრცელა. სავარაუდოდ, ორი კვირის განმავლობაში საკანონმდებლო ორგანოში ბიუროს სხდომა და კომიტეტები არ გაიმართება. 

“საქართველოში გამოცხადებულია უქმე დღეები. ეს იმას ნიშნავს, რომ პარლამენტსაც ეხება უქმე დღეები. გამომდინარე აქედან, უახლოესი ბიურო როცა ჩატარდება ამ დღეების შემდგომ, აქვე დარეგისტრირდება როგორც „ქართული ოცნების“, ასევე ოპოზიციის მიერ დაინიცირებული კანონპროექტები“, – განაცხადა მმართველი გუნდის წევრმა, გურამ მაჭარაშვილმა.

ხელისუფლების ამ გადაწყვეტილებას გამოეხმაურა ოპოზიცია. ისინი თვლიან, რომ როდესაც  ქვეყანაში უმძიმესი პრობლემებია და პარლამენტს მნიშვნელოვანი საკითხები ჰქონდა განსახილველი, ორ კვირიანი შვებულება მართებული არ იყო და „ქართული ოცნება“ ამნისტიის კანონზე მსჯელობას განგებ აჭიანურებდეს. 

“ჩვენ მნიშვნელოვნად მიგვაჩნია, რომ პრინციპული საკითხები გარკვეული იქნას იქამდე, სანამ პარლამენტი სრულყოფილად გააგრძელებს მუშაობას და გააგრძელებს მონაწილეობას ოპოზიციის მონაწილეობით. თუ ხელისუფლება აი, ამ დროს გამოიყენებს იმისთვის, რომ პრინციპული საკითხების გადაწყვეტაში მიიღოს მონაწილეობა და შეასრულოს პოზიტიური როლი, ეს იქნება მხოლოდ და მხოლოდ მისასალმებელი, წინააღმდეგ შემთხვევაში, თუ ხელისუფლება ამ დროს არ გამოიყენებს პროდუქტიულად, ეს იქნება ფუჭად დახარჯული დრო, რომელიც რიგი საკითხების გაჭიანურებისკენ შეიძლება იყოს მიმართული,”  – ამბობს „ლელოს“ ერთ-ერთი ლიდერი საბა ბუაძე.

_____________________________

● რა წერია შარლ მიშელის ახალ გეგმაში – ხუთივე პუნქტი მოკლედ
● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა
● მიხეილ სააკაშვილი: მას შემდეგ, რაც მელია ციხეს დატოვებს, ენმ-მ ხელი უნდა მოაწეროს დოკუმენტს

________________________________

პარლამენტში ამ დროისთვის 20 ივნისის ამნისტიის შესახებ ორი კანონპროექტია დარეგისტრირებული – ერთი ხელისუფლების, რომელიც 20 ივნისის მოვლენებზე ყველა პასუხისმგებელი პირის ამნისტიას გულისხმობს, და მეორე ოპოზიციის – სადაც საუბარი მხოლოდ რამდენიმე პოლიციელზეა და ისიც იმ შემთხვევაში, თუ დაზარალებულების თანხმობა იქნება. დამნაშავეებს – მათ შორის მაღალი თანამდებობის პირებს – ამნისტია არ უნდა შეეხოს.

რა წერია ოპოზიციის კანონპროექტში

ოპოზიციის მიერ დარეგისტრირებული კანონპროექტი შემდეგ მუხლებს მოიცავს:

• სისხლის სამართლის კოდექსის 225-ე მუხლი, რაც ჯგუფური ძალადობის ორგანიზებას, მის ხელმძღვანელობას ან მონაწილეობას გულისხმობს.  

ამ მუხლითაა დაკავებული “ერიანი ნაციონალური მოძრაობის” თავმჯდომარე, ნიკა მელია. 

ასევე:

• სისხლის სამართლის კოდექსის 333-ე მუხლი, რაც სამსახურებრივი უფლებამოსილების გადამეტებას გულისხმობს.

კანონპროექტში განმარტებულია, რომ ამნისტია არ ვრცელდება იმ პირებზე, რომელსაც აღნიშნული ქმედება ჩადენილი აქვს სახელმწიფო პოლიტიკურ თანამდებობაზე ყოფნის დროს.

კანონპროექტში ნათქვამია ისიც, რომ სამსახურებრივი უფლებამოსილების გადამეტებაზე ბრალდებული პირების ამნისტირებისთვის, საჭიროა დაზარალებულის თანხმობა.

ოპოზიციის კანონპროექტის თანახმად, შესაძლოა პასუხისმგებლობა დადგეს ყოფილი პრემიერის და მაშინდელი შს მინისტრის, გიორგი გახარიას, მისი მოადგილის, კახა საბანაძის და სახელმწიფო დაცვის სპეციალური დეპრტამენტის დირექტორის, ანზორ ჩუბინიძის მიმართ.

რა წერია ხელისუფლების კანონპროექტში

ოპოზიციის შემდეგ, საკუთარი ვერსია დაარეგისტრირა მმართველმა პარტიამაც.

კანონპროექტის თანახმად, სისხლისსამართლებრივი პასუხისმგებლობისა და სასჯელისაგან თავისუფლდება ყველა პირი, რომელმაც 2019 წლის 19-21 ივნისის მოვლენებთან დაკავშირებით ჩაიდინა დანაშაული და უარს არ აცხადებს მის მიმართ ამნისტიის გავრცელებაზე.

ამნისტია ვრცელდება აგრეთვე იმ პირებზე, რომელმაც 2019 წლის 19-21 ივნისის მოვლენებთან დაკავშირებული დანაშაული მოამზადა ან დაგეგმა.

_____________________________

● გავრილოვი, პროპორციული, რკინის ღობე – რით დაგვამახსოვრდება მეცხრე მოწვევის პარლამენტი
● 20 ივნისი. გზამკვლევი მათთვის, ვისაც დეტალები კარგად არ ახსოვს

__________________________

18 აპრილს, ევროპული საბჭოს პრეზიდენტმა შარლ მიშელმა წინადადებების ახალი პაკეტი შესთავაზა საქართველოს პოლიტიკურ პარტიებს.

დოკუმენტს ჰქვია “სამომავლო გზა საქართველოსთვის” და იგი რამდენიმე მნიშვნელოვანი დეტალით განსხვავდება ბოლო დოკუმენტისგან, რომელიც შარლ მიშელის წარმომადგენელმა, ქრისტიან დანიელსონმა 31 მარტს წარუდგინა ოპოზიციას.

სიახლეები ეხება ორ ყველაზე მნიშვნელოვან და მხარეებს შორის ყველაზე შეუთანხმებელ პუნქტს – პოლიტიკური ნიშნით დაკავებულ ადამიანებს და ახალ საპარლამენტო არჩევნებს, რომელთა რიგგარეშე ჩატარებასაც ითხოვს ოპოზიცია.

ახალი წინადადების შესათანხმებლად 18 აპრილს ევროკავშირის დელეგაციის ოფისში მივიდა ყველა პარტიის წარმომადგენელი, მმართველი პარტიის გარდა. მოგვიანებით მმართველმა პარტიამ გაავრცელა განცხადება, სადაც წერია, რომ ხელისუფლება “მზად არის” მიშელის წინადადებების განსახილველად.