საქართველოს მთავრობა აფხაზეთის რკინიგზის საკითხზე სომხეთთან მოლაპარაკებებს უარყოფს

საქართველოს მთავრობა, შესაძლოა, ფარულ მოლაპარაკებებს მართავს სომხეთთან აფხაზეთის გავლით სარკინიგზო მიმოსვლის აღდგენის შესახებ, – მიიჩნევს ნაციონალური მოძრაობა.

როგორც საგანგებო პრესკონფერეციაზე პარტიის წრმომადგენელმა ნიკა რურუამ განაცადა, არსებობს „საფუძვლიანი ეჭვები”, რომ ეს საკითხი 23-24 თებერვალს საქართველოში სომხეთის პრემიერ-მინისტრის ვიზიტის დროს განიხილებოდა.

ოპოზიციის შეშფოთების მიზეზი გახდა სომხეთის პრემიერის კარენ კარაპეტიანის  თბილისში ყოფნისას ჟურნალისტებთან საუბრის დროს გაკეთებული განცხადება. „თუ გაინტერესებთ, იქნება თუ არა ლარსის ალტერნატივა, შემიძლია დაგარწნუნოთ, რომ იქნება. დანარჩენზე შემდეგ ვისაუბროთ, ჯერ ფრჩხილებს ვერ გავსხნი. მოვილაპარაკეთ როგორც ლარსის, ასევე ენერგეტიკული დერეფნის შესახებ”, – განაცხადა კარაპეტიანმა.

ნაციონალური მოძრაობის აზრით, სომხეთის პრემიერმა, შესაძლოა, რკინიგზის აფხაზეთის მონაკვეთი იგულისხმა.

„აფხაზეთის რკინიგზის გახსნა ეროვნული ინტერესების ღია ღალატია და დაუშვებელია, როგორც მტრული ნაბიჯი, რომელიც მხოლოდ რუსებს, სეპარატისტებს ახეირებს.  ამასთან, გააუარესებს ეკონომიკურ მდგომარეობას, რადგან დაასუსტებს ტვირთბრუნვას ფოთის პორტში და გაგვიფუჭებს ურთიერთობას აზერბაიჯანთან”, – განაცხადა ნიკა რურუამ. მან ხელისუფლებას ამ საკითხზე სრული ინფორმაცია მოსთხოვა, წინააღმდეგ შემთხვევაში კი,  “სახალხო მღელვარებით” დაემუქრა.

„ნაციონალური მოძრაობის” პროტესტს პარტია „ევროპული საქართველოც” შეუერთდა, რომელმაც ხელისუფლებას მოლაპარაკებების შესახებ კითხვებზე პასუხები მოსთხოვა.

თუმცა, საქართველოს მთავრობის ვიცე-პრემიერმა კახა კალაძემ განაცხადა, რომ სომხეთის პრემიერის საქართველოში ვიზიტისას ამ თემაზე საუბარი არ ყოფილა და მეტიც, მთავრობას ამ საკითხზე საერთოდ არ უმსჯელია. ოპოზიციის ბრალდებებს მან სიცრუე უწოდა.

პრემიერ-მინისტრის სპეცწარმომადგენელმა ზურაბ აბაშიძემ ასევე კატეგორიულად უარყო აფხზეთის რკინიგზის გახსნის შესახებ მსჯელობა. „აფხაზეთის გავლით სარკინიგზო მიმოსვლის აღდგენის საკითხი პირდაპირ კავშირშია საქართველოს ტერიტორიული მთლიანობის პრობლემატიკასთან და მხოლოდ ამ კონტექსტშია შესაძლებელი მისი განხილვა“, – აღნიშნა მან.

ამავე დროს სომხური დელეგაციის სამშობლოში დაბრუნების შემდეგ სომხეთის ოფიციალურ პირებს არაფერი უთქვამთ საქართველოსთან ტრანზიტის შესახებ რაიმე შეთანხმების თაობაზე.

აფხაზეთის რკინიგზის გახსნის საკითხი არაერთხელ წამოიჭრა 2012 წელს საქართველოში ხელისუფლების ცვლილების შემდეგ, მათ შორის – ყოფილი პრემიერის ბიძინა ივანიშვილის, ასევე რუსეთის პრეზიდენტის ვლადიმირ პუტინის მიერ. ამ საკითზე მსჯელობას ოპოზიციის და საზოგადოების ნაწილის მწვავე რეაქცა მოჰყვებოდა.

რკინიგზის აღდგენის პროცესში მთავარი დამაბრკოლებელი ფაქტორია აფხაზეთის სტატუსი, რომელიც 2008 წლის აგვისტოს ომის შემდეგ უკვე ოფიციალურად აღიარა რუსეთმა. JAMnews-ის მიმოხილვა აღნიშნულ თემაზე.