საქართველოს ეკონომიკა მარტში 4 პროცენტით გაიზარდა
საქართველოს სტატისტიკის ეროვნული სამსახურის წინასწარი შეფასებით, 2021 წლის მარტში, წინა წლის შესაბამის პერიოდთან შედარებით, რეალური მთლიანი შიდა პროდუქტის (მშპ) ზრდამ 4 პროცენტი შეადგინა, ხოლო 1-ლი კვარტალის საშუალო რეალურმა კლებამ – 4.2 პროცენტი.
გასული წლის მარტი იყო თვე, როდესაც პირველად ამოქმედდა კომენდანდტის საათი და კორონავირუსის შეზღუდვების გამო დაიხურა ბიზნესი. შესაბამისად, გასული წლის ანალოგიურ მაჩვენებელთან შედარებით ზრდა, ეკონომისტების აზრით, მოსალოდნელი იყო.
2021 წლის მარტში, წინა წლის შესაბამის პერიოდთან შედარებით ზრდა შეინიშნებოდა შემდეგ საქმიანობებში:
● საფინანსო და სადაზღვევო საქმიანობა;
● ვაჭრობა;
● დამამუშავებელი მრეწველობა;
● უძრავ ქონებასთან დაკავშირებული საქმიანობები;
● ელექტროენერგიის, აირის, ორთქლის და კონდიცირებული ჰაერის მიწოდება;
● ტრანსპორტი და დასაწყობება;
● ინფორმაცია და კომუნიკაცია.
კლება შეინიშნებოდა შემდეგ სფეროებში:
● მშენებლობის;
● სამთომოპოვებითი მრეწველობის;
● ხელოვნების, გართობისა და დასვენების სფეროები.
ამავე ანგარიშის მიხედვით, იანვარში რეალური მშპ 11.5%-ით, ხოლო თებერვალში 5.1%-ით შემცირდა.
ეკონომიკურ ზრდასთან დაკავშირებით კომენტარი გააკეთა ფინანსთა მინისტრმა ლაშა ხუციშვილმა.
“ეკონომიკის აღდგენის პროცესის ტემპი იმაზე სწრაფად მიმდინარეობს, ვიდრე მოლოდინი იყო წლის დასაწყისში, მათ შორის, საერთაშორისო ორგანიზაციების მხრიდან და ვფიქრობ, რომ ეს პროცესი არის უკვე არაერთჯერადი, შეუქცევადი პროცესი, რასაც მომდევნო თვეში აუცილებლად დავინახავთ”, – განაცხადა ხუციშვილმა.
_________________________________
● საქსტატმა ახალი საარსებო მინიმუმი თვეში 178 ლარით და 10 თეთრით განსაზღვრა
● იანვარ-თებერვალში საქართველოს ეკონომიკა 8.3 პროცენტით შემცირდა
● საქართველოში 307 ათას ადამიანს ლომბარდის ვალი აქვს
● ისტორიული ვარდნა: 1994 წლის შემდეგ საქართველოს ეკონომიკა ყველაზე მეტად 2020 წელს შემცირდა
● რეფინანსირების განაკვეთის ზრდის გამო, საქართველოს 200 000-მდე მოქალაქეს სესხი გაუძვირდა
_________________________________
