„საქართველომ სერიოზულად დაიხია უკან" - ევროპარლამენტმა ასოცირებაზე კრიტიკული ანგარიში მიიღო

საქართველომ სერიოზულად დაიხია უკან

ევროპარლამენტმა საქართველოს მიერ ასოცირების შეთანხმების შესრულებაზე კრიტიკული ანგარიში მიიღო. ახალ ანგარიშში ნათქვამია, რომ „საქართველომ სერიოზულად დაიხია უკან ძირითადი დემოკრატიული პრინციპებისა და იმ მთავარი პოლიტიკური ვალდებულებების თვალსაზრისით, რომლებიც ასოცირების შეთანხმების ფარგლებში იკისრა.”

მთავარი, რაც ანგარიშში წერია:

● მკვეთრი პოლიტიკური პოლარიზაციის ფონზე, საქართველოს დემოკრატიული ინსტიტუტები თანდათან კარგავენ საკუთარ არსს, ხოლო მმართველი პარტია სულ უფრო მეტად იგდებს ძალაუფლებას ხელში. ამასთან, ზღუდავს სივრცეს განსხვავებული აზრისთვის.

● მნიშვნელოვნად გაუარესდა კანონის უზენაესობა, რასაც მოწმობს ოპოზიციის ლიდერების დაკავება 2019 წლის ივნისში. ასევე, 2021 წლის ივლისის [იგულისხმება პირველ რიგში 5 ივლისი] ძალადობრივი ინციდენტების ეფექტური გამოძიების არარსებობა.

● სახელმწიფო ინსპექტორის სამსახურის გაუქმება.

● საქართველოს სასამართლო სისტემაში 2020 წლიდან განვითარებულმა მოვლენებმა ასოცირების შეთანხმების განხორციელებაში სერიოზული უკუსვლები გამოიწვია. კერძოდ: „მოსამართლეთა ნაჩქარევი და არაგამჭვირვალე დანიშვნები, გენერალური პროკურორის დანიშვნის რეფორმის შეუსრულებლობა, ცვლილებები კანონში საერთო სასამართლოების შესახებ.“

● კელი დეგნანი: იმედგაცრუებულები ვართ მოსამართლეების ნაჩქარევად დანიშვნის გამო

● საქართველოში ადამიანის უფლებებსა და თავისუფლებებთან დაკავშირებით არაერთგვაროვანი სურათია. ამასთან მნიშვნელოვნად გაუარესებულია ქართული მედიის მდგომარეობა.

„სამუშაო გარემო, რომელშიც ჟურნალისტები მუშაობენ კიდევ უფრო რთული გახდა მედიის მუშაობაში პოლიტიკური ჩარევის, ასევე ჟურნალისტების წინააღმდეგ სიტყვიერი და ფიზიკური თავდასხმების გამო“, – წერია დოკუმენტში.

● საზოგადოებრივი მაუწყებლის ჟურნალისტები არხზე არსებულ ცენზურაზე და “შავ სიებზე”

● მიუხედავად იმისა, რომ საქართველოს სამოქალაქო საზოგადოება ძლიერია, მასზე გავლენას ახდენს მზარდი პოლიტიკური ანტაგონიზმი.

● ამის საპირისპიროდ, 2020-2021 წლებში, საქართველომ მნიშვნელოვანი ზომები მიიღო ქალთა მიმართ ძალადობის წინააღმდეგ საბრძოლველად და სამსახურში გენდერული თანასწორობის გასაუმჯობესებლად. დადებითად ფასდება ბავშვთა უფლებების ახალი კოდექსიც.

● მიუხედავად იმისა, რომ საქართველო რეგიონულ ლიდერად რჩება კორუფციასთან ბრძოლის კუთხით, ანტიკორუფციული რეფორმები ბოლო წლებში შენელდა, ხოლო მაღალი დონის კორუფციის ეფექტიანი გამოძიება და სისხლის სამართლებრივი დევნა ჯერ ისევ მთავარ გამოწვევას წარმოადგენს.

● საქართველო მუდმივად ასრულებს ევროკავშირის ძირითად მოთხოვნებს უვიზო რეჟიმთან დაკავშირებით.

● ქვეყანა ეფექტიანად თანამშრომლობს ევროკავშირის სტრუქტურებთან და წევრ სახელმწიფოებთან კრიმინალთან ბრძოლის საქმეში.

● „დადებითად არის შეფასებული თანამშრომლობა საგარეო და უსაფრთხოების პოლიტიკის კუთხით. თუმცა, საქართველომ უარი თქვა 2022 წლის თებერვლის ბოლოს უკრაინაში შეჭრის შემდეგ რუსეთის წინააღმდეგ დაწესებულ სანქციებს შეერთებოდა.“

● მიუხედავად იმისა, რომ საქართველოს ეკონომიკა სერიოზულად დაზარალდა კოვიდის გამო, ქვეყანა მაინც კარგ შედეგებს აღწევს ყოვლისმომცველი თავისუფალი ვაჭრობის შეთანხმებით (DCFTA) გათვალისწინებული მოთხოვნების თვალსაზრისით.

● მართალია, საქართველო საკანონმდებლო პროცესების კუთხით სწორ გზაზეა, ის კვლავაც დგას მნიშვნელოვანი გამოწვევების წინაშე ენერგეტიკისა და გარემოს დაცვის სფეროში, განსაკუთრებით ენერგოეფექტიანობის კუთხით.

● კარლ ჰარცელი: ბევრი მეგობარი ქვეყანა სვამს კითხვას, სად მიდის საქართველო?

მოლაპარაკებები ევროპასთან ასოცირების შეთანხმების შესახებ ოფიციალურად დაიწყო 2010 წლის ივლისში და დასრულდა 2013 წლის ივლისში პარაფირებით, მას ხელი მოეწერა 2014 წლის 27 ივნისს ბრიუსელში.

ასოცირების შესახებ შეთანხმება არის საქართველოს ევროკავშირთან დაახლოების სამოქმედო გეგმა, რომელიც ქვეყნის პოლიტიკური, სოციალური და ეკონომიკური ცხოვრების თითქმის ყველა სფეროს მოიცავს. ის, აგრეთვე, მოიცავს “ღრმა და ყოვლისმომცველი” თავისუფალი ვაჭრობის კომპონენტს და ითვალისწინებს ევროკავშირთან დაახლოების მნიშვნელოვან კონკრეტულ მექანიზმებს.

ასოცირების შეთანხმება ასევე მიზნად ისახავს ევროკავშირთან პოლიტიკურ ასოცირებასა და ეტაპობრივ ეკონომიკურ ინტეგრაციას. შეთანხმებაში აღიარებულია საქართველოს ევროპული მისწრაფებები და ევროპული არჩევანი, აღნიშნულია, რომ ის საერთო ღირებულებები, რომლებსაც ეფუძნება ევროკავშირი – დემოკრატია, ადამიანის უფლებათა და ძირითად თავისუფლებათა დაცვა და კანონის უზენაესობა ასევე წარმოადგენს პოლიტიკური ასოცირებისა და ეკონომიკური ინტეგრაციის ქვაკუთხედს.