საქართველომ გაეროს რეზოლუციას ირანში ადამიანის უფლებების მდგომარეობის შესახებ ხმა არ მისცა

საქართველომ გაეროს რეზოლუციას ხმა არ მისცა

საქართველოს დელეგაციამ გაეროს გენერალური ასამბლეის ე.წ. მესამე კომიტეტის სხდომაზე, რომელიც სოციალურ, ჰუმანიტარულ და კულტურულ საკითხებზე მუშაობს, ირანში ადამიანის უფლებების მდგომარეობის შესახებ რეზოლუციის პროექტის მიცემისგან თავი შეიკავა. რეზოლუციას მხარი 79-მა სახელმწიფომ დაუჭირა, 28 ქვეყანა წინააღმდეგი იყო, ხოლო 68 კენჭისყრას არ დაესწრო. საქართველო სწორედ იმ ქვეყნებს შორის მოხვდა, რომელიც კენჭისყრას არ დაესწრო.

რეზოლუციით გაერო მოუწოდებს ირანს, შეწყვიტოს ძალის გადამეტებული გამოყენება მშვიდობიანი მომიტინგეების, მათ შორის, ქალებისა და ბავშვების წინააღმდეგ. ასევე, გაერო ირანს მოუწოდებს, რომ აღმოფხვრას ყველა სახის დისკრიმინაცია, რომელიც ხორციელდება ადამიანის აზრის, რელიგიის ან რწმენის საფუძველზე.

აღსანიშნავია, რომ რეზოლუციის მიხედვით, გაერო შეშფოთებას გამოხატავს ირანში ადამიანების სიკვდილით დასჯის საგანგაშოდ მაღალი სიხშირის გამო. ასამბლეა ასევე მტკიცედ მოუწოდებს ირანს, რომ აღმოფხვრას ქალთა მიმართ ყველა სახის სისტემური დისკრიმინაცია და ადამიანის უფლებების დარღვევა.

“უზრუნველყოს ქალების უფლებების დაცვა, მათ შორის, ბავშვთა ადრეული და იძულებითი ქოქრინების აკრძალვით. უზრუნველყოფილი იყოს მათი თანაბარი ხელმისაწვდომობა განათლებაზე, მართლმსაჯულებაზე და ა.შ.” – წერია რეზოლუციაში.

აღსანიშნავია ისიც, რომ 4 ნოემბერს, მაშინ როცა ირანში პროტესტი მძვინვარებდა და უკრაინული მხარეც მუდმივად საუბრობდა იმაზე, რომ რუსეთი ირანული თვითმკვლელი დრონებით ქვეყნის ინფრასტრუქტურას ანადგურებს, საქართველოს თავდაცვის მინისტრმა ჯუანშერ ბურჭულაძემ საქართველოში ირანის ისლამური რესპუბლიკის ახლადდანიშნულ ელჩთან, მაჰმუდ ადიბთან გაცნობითი შეხვედრა გამართა.

თავდაცვის სამინისტროს მიერ გავრცელებული ინფორმაციით, ჯუანშერ ბურჭულაძემ ირანელ დიპლომატს ახალ პოზიციაზე დანიშვნა მიულოცა და წარმატებები უსურვა.

„შეხვედრაზე საუბარი შეეხო რეგიონის წინაშე არსებულ ახალ გამოწვევებსა და შესაძლებლობებს. მხარეებმა, ასევე განიხილეს ორ ქვეყანას შორის ორმხრივი თანამშრომლობის დღის წესრიგში არსებული აქტუალური საკითხები და სამომავლო გეგმები.

მაჰმუდ ადიბმა საქართველოში ირანის ისლამური რესპუბლიკის ელჩის პოზიციაზე აქბარ ყასემი ალი-აბადი შეცვალა“, – ნათქვამია თავდაცვის სამინისტროს მიერ გავრცელებულ ინფორმაციაში.

ევროპარლამენტარი ვიოლა ფონ კრამონი საქართველოს თავდაცვის მინისტრისა და ირანის ისლამური რესპუბლიკის ახლადდანიშნული ელჩის შეხვედრას „ტვიტერზე“ გამოეხმაურა:

„სერიოზულად? რეგიონული გამოწვევები და შესაძლებლობები“ ირანის რეჟიმთან, რომელიც ამჟამად ახშობს ყველას ყველაზე სასტიკი გზით? ეს ახალი თანამშრომლობა აჩვენებს იმ მცდარ გზას, რომელიც საქართველომ, სამწუხაროდ აირჩია და საქართველოს პოლიტიკურ იზოლაციას, რომლის წინაშეც ის უკვე დგას.“ – წერს ვიოლა ფონ კრამონი.

● რატომ გახდა ირანული დრონები უკრაინისთვის პრობლემა
● 10 წელი “ქართულ ოცნებასთან”. სხვადასხვა სფეროს ექსპერტები ოცნების მმართველობას აფასებენ
● როგორია სამყარო, რომელსაც პუტინი აშენებს

პარიზის პოლიტიკური მეცნიერებათა ინსტიტუტის პროფესორი და საქართველოს ყოფილი სახელმწიფო მინისტრი ევროპულ და ევროატლანტიკურ სტრუქტურებში თორნიკე გორდაძე სოციალურ ქსელში წერს, რომ საქართველო ხმის მიცემის დროს გარეთ გავიდა:

“მართალია რუსეთის, ბელორუსის, სირიის და ნიკარაგუის მსგავსად ხმა წინააღმდეგ არ მიუცია, მაგრამ კიდევ ერთი ნაბიჯით მტკიცედ ვუახლოვდებით ანტი-დასავლურ კლუბს. მაგალითად ჩვენსავით ხმის მიცემისად გარეთ გავიდა ვენესუელაც! (თუმცა მისი მხრიდან ეს უფრო მიღწევად შეიძლება ჩაითვალოს).

საქართველოს მთავრობას და მის მხარდამჭერ პოლიტიკურ ჯგუფებს ჩვეულებრივი ირანელები თბილისის ქუჩებში და კაფე-რესტორნებში არ მოსწონთ, თორემ აიათოლების ძალადობრივ დიქტატურასთან მშვენივრად თანამშრომლობენ.”

რა მოხდა ირანში

ირანში საპროტესტო აქციები ამ დრომდე გრძელდება. 13 სექტემბერს 22 წლის მაჰსა ამინი ოჯახთან ერთად გადაადგილებისას ე.წ. მორალის პოლიციის იმ სპეციალურმა განყოფილებამ გააჩერა, რომელსაც ქალების ჩაცმულობის მკაცრი კონტროლი ევალება.

ის უფლებადამცველები, რომლებიც ოჯახს ესაუბრნენ, ამბობენ, რომ პოლიციამ ამინი მანქანაში ძალით ჩასვა და ფურგონში ფიზიკური შეურაცხყოფა მიაყენა. 22 წლის ამინი მორალის პოლიციის განყოფილებაში “არასათანადო ჩაცმულობისთვის” დაკავების შემდეგ მალევე გარდაიცვალა.

პროტესტი 17 სექტემბერს ქურთების ქალაქ საკეზში, ქალის დაკრძალვაზე დაიწყო.

● ირანის რადიკალი პრეზიდენტი და კავკასია: შეფასებები ბაქოდან, ერევნიდან და თბილისიდან
● ნიკოლ ფაშინიანი: “ჩვენ მარტო ვერ ვიბრძოლებთ მთელი მსოფლიოს წინააღმდეგ”

მასობრივი აქციების დროს, დარბევების შედეგად, ამ დრომდე დაახლოებით 200-ზე მეტი ადამიანი დაიღუპა, მათ შორის რამდენიმე თინეიჯერი. ნორვეგიაში დაფუძნებული ირანის უფლებადამცველი ორგანიზაციის ცნობით, 10 ოქტომბრისთვის დემონსტრაციებზე დარბევებს სულ 185 ადამიანის, მათ შორის, 19 ბავშვის სიცოცხლე ემსხვერპლა.

აშშ-მ ირანის მორალის პოლიციასა და უსაფრთხოების მაღალჩინოსნებს სანქციები დაუწესა. აშშ-ს ხაზინის საგარეო აქტივების კონტროლის ოფისმა სანქციები ირანის უსაფრთხოების 7 ინსტიტუტის, მათ შორის მორალის პოლიციის, დაზვერვისა და უსაფრთხოების სამინისტროსა და არმიის სახმელეთო ძალების მაღალჩინოსნებზე გაავრცელა. აშშ-ს სახელმწიფო დეპარტამენტის ინფორმაციით, მაღალჩინოსნები იმ ორგანიზაციებს ზედამხედველობენ, რომლებიც მშვიდობიანი მომიტინგეების, სამოქალაქო საზოგადოების წევრების ჩასახშობად ძალადობას რეგულარულად იყენებენ. 

ირანს სანქციები დაუწესა დიდმა ბრიტანეთმაც, მათ შორის ირანის უსაფრთხოების ძალების მაღალჩინოსნებსა და ე.წ. მორალის პოლიციას – ირანის მორალის პოლიციის უფროსს, მუჰამედ როსტამ ჩეშმეჰ გაჩისა და თეირანის პოლიციის განყოფილების ხელმძღვანელს, ჰაჯ აჰმედ მირზაის.