საქართველო საზღვრებს ხსნის ევროკავშირის ხუთი ქვეყნისთვის. ოღონდ ფრენები არ არის

კორონავირუსის პანდემიის პერიოდში თითქმის ხუთი თვით ჩაკეტილი საქართველო საზღვრებს ხსნის, თუმცა მხოლოდ ევროკავშირის ხუთი ქვეყნისთვის. ესენია გერმანია, საფრანგეთი, ლატვია, ლიეტუვა და ესტონეთი.

ამ ხუთი ქვეყნის მოქალაქეებს საქართველოში  ჩამოსვლა შეუძლიათ მხოლოდ საჰაერო გზით, ოღონდ რეგულარული ფრენები აღდგენილი არ არის. ამ დროისთვის ქვეყანაში ისევ დაკეტილი რჩება სახმელეთო საზღვრები. 

საქართველოს საზღვრის გადმოკვეთამდე,  მათ უნდა შეავსონ სპეციალური, ელექტრონული ანკეტა და მიუთითონ საკონტაქტო ინფორმაცია, შემოსვლამდე ბოლო 14 დღის განმავლობაში მოგზაურობის ისტორია და ასევე ისიც, საქართველოში ყოფნის დროს სად დარჩებიან. 

საქართველოში შემოსვლისას, საზღვარზე მათ თერმოსკრინინგი ჩაუტარდებათ.  37 გრადუსზე მაღალი ტემპერატურის შემთხვევაში, აეროპორტშივე კორონავირუსის PCR ტესტს გაუკეთებენ.

ამ ხუთი ქვეყნებიდან ჩამოსულ მოქალაქეებს სავალდებულო კარანტინში არ მოათავსებენ.

თუმცა, თუკი ეს მოქალაქეები ბოლო 14 დღის განმავლობაში ევროკავშირის არაწევრ ან კორონავირუსის პანდემიის გავრცელების მაღალი საფრთხის მქონე ქვეყნებში მოგზაურობდნენ, მაშინ მათ სავალდებულო ორკვირიანი კარანტინი შეეხებათ.

• მოსაზრება: ვიზეარის კონტრრევოლუცია
• როგორი იქნება ტურიზმი კორონავირუსის შემდეგ. საქართველო ტურისტების მისაღებად ემზადება

საქართველოში ჩამოსულ თითოეულ ადამიანთან პროაქტიურ კავშირში იქნება და მათზე იზრუნებს სპეციალურად შექმნილი ქოლ-ცენტრის ჯგუფი.

რატომ ეს ხუთი ქვეყანა?

იმიტომ, რომ სწორედ ამ ხუთმა ქვეყანამ გაუხსნა საზღვრები საქართველოს მოქალაქეებს იგივე პირობებით – ანუ კარანტინის გავლის გარეშე.

ამ ეტაპზე საქართველოსთვის საზღვრებს არ ხსნიან ევროკავშირის შემდეგი ქვეყნები: ავსტრია, ბელგია, ბულგარეთი, დანია, ნორვეგია, მალტა, ფინეთი, შვეიცარია, ჩეხეთი, სლოვაკეთი და უნგრეთი.

იტალიამ, კვიპროსმა, ისლანდიამ და სლოვენიამ კი საქართველოსთვის საზღვრების გახსნის მზაობა გამოთქვეს, თუმცა კონკრეტული შეზღუდვების დაწესებით – ამ ქვეყნებში ჩასულმა საქართველოს მოქალაქეებმა 14-დღიანი სავალდებულო კარანტინი უნდა გაიარონ. 

ევროკავშირის წევრ იმ ქვეყნებს, რომლებმაც საქართველოსთვის საზღვარი არ გახსნეს, საზღვარს არ უხსნის არც საქართველო. 

ხოლო იმ ქვეყნების მოქალაქეებს, რომლებმაც საქართველო შეიყვანეს ე.წ. მწვანე სიაში, თუმცა დაუწესეს შეზღუდვები, საქართველოც იგივე ტიპის შეზღუდვებს უწესებს – ქვეყანაში შემოსვლისას მათ უნდა გაიარონ 14-დღიანი სავალდებულო კარანტინი და კარანტინის  ხარჯები თავად დაფარონ.

ეს წესები საზღვარგარეთ მყოფ საქართველოს მოქალაქეებსაც ეხებათ?

საქართველოს მოქალაქეები ევროკავშირის ქვეყნებიდან სამშობლოში დაბრუნების შემდეგ 14-დღიან სავალდებულო კარანტინს გაივლიან. კარანტინს გაივლიან ისინიც, ვინც საქართველოში გერმანიიდან, საფრანგეთიდან, ლატვიიდან, ლიეტუვიდან და ესტონეთიდან ჩამოვლენ.

განსხვავებით უცხო ქვეყნის მოქალაქეებისგან, სამშობლოში დაბრუნებული საქართველოს მოქალაქეების კარანტინის ხარჯებს სახელმწიფო დაფარავს.

რითი ჩამოვლენ საქართველოში?

საზღვრები კი გაიხსნა, მაგრამ რეგულარული საერთაშორისო ფრენები არ არის და სავარაუდოდ, აგვისტომდე არ აღდგება.

თვითმფრინავები არ დაფრინავენ ევროკავშირის არც იმ ხუთ ქვეყანაში, რომლებთანაც საქართველომ საზღვრები უპირობოდ გახსნა. ამ ხუთ ქვეყანასთან რეგულარული ფრენების აღდგენის მიზნით მოლაპარაკებები ამჟამად მიმდინარეობს რამდენიმე ავიაკომპანიასთან – Lufthansa, AirBaltic-სა და AirFrance-თან.

Lufthansa-სთან გარკვეული შეთანხმება უკვე მიღწეულია – აგვისტოდან ეს ავიაკომპანია მუნჰენის მიმართულებით თბილისიდან კვირაში ორ რეისს შეასრულებს.

ათასობით საქართველოს მოქალაქე კვლავ ვერ ბრუნდება ქვეყანაში რეგულარული რეისების არარსებობის გამო.

ივლისში მათ ჩამოსაყვანად პოლონეთიდან, ესპანეთიდან, იტალიიდან, საბერძნეთიდან და საფრანგეთიდან რეისებს შეასრულებენ Wizzair-ი და Myway Airlines-ი.

ამ რეისებზე ბილეთის ფასი საქართველოს მოქალაქეებისთვის მაქსიმუმ 200 ევრო იქნება. სხვა ხარჯებს სახელმწიფო დაფარავს.

გარდა ამისა, კომერციულ ჩარტერულ რეისებს ასრულებს ქართული ავიახაზები (აირზენა) შემდეგ ქალაქებში: ვენაში, ამსტერდამსა და თელავივში.

თუმცა, ამ ქართულ კომპანიასთან საზღვარგარეთ მცხოვრებ მოქლაქეებს ბევრი პრეტენზია აქვთ. ფეისბუკი სავსეა უკმაყოფილო პოსტებით, სადაც აღნიშნულია, რომ ჩარტერულ რეისებზე, რომელსაც ეს კომპანია ასრულებს, ბილეთების ფასი დათქმულ 200 ევროზე ბევრად მაღალია, ბილეთების შოვნა კი პრაქტიკულად შეუძლებელი. 

აქამდე საქართველოს მოქალაქეების სამშობლოში დასაბრუნებლად რეისებს მხოლოდ საქართველოს ავიახაზები ასრულებდა – ის ერთადერთი და ფაქტობრივად, მონოპოლისტი კომპანია იყო. თუმცა, მას შემდეგ, რაც ამ კომპანიის მიმართ პროტესტი ბევრმა ადამიანმა გამოთქვა, საქართველოს ხელისუფლებამ საერთაშორისო კომპანიებთან დაიწყო მოლაპარაკება  და ივლისში რეისებს Wizzair-ი და Myway Airlines შეასრულებენ. 

ივლისში ერთჯერად რეისს შეასრულებს ასევე ყატარის ავიახაზებიც  და დოჰადან, საქართველოს 105 ადამიანი დაბრუნდება.

საქართველოს მთავრობის ადმინისტრაციის ინფორმაციით, კორონავირუსის გამო ვითარება მუდმივად იცვლება, მიმდინარეობს მოლაპარაკებები ევროკავშირის სხვა ქვეყნებთან თანამშრომლობასა და მიმოსვლის აღდგენაზე, ამიტომ ქვეყანაში შემოსვლის წესები ყოველ ორ კვირაში ერთხელ გადაიხედება.