POLITICO: საქართველო ერთ-ერთი ქვეყანაა, რომელიც სანქციების არიდების პრობლემას იწვევს

საქართველო სანქციების არიდების პრობლემას იწვევს

ავტორიტეტული ამერიკული გამოცემა Politico წერს, რომ აშშ-მ გამოავლინა 5 ქვეყანა, რომელიც ხელს უწყობს რუსეთის მიერ სანქციებისთვის თავის არიდების პრობლემას, მათ შორის ერთ-ერთი საქართველოა. გამოცემა ეყრდნობა აშშ-ის სახელმწიფო დეპარტამენტის სანქციების კოორდინატორის, ჯიმ ო’ბრაიენის საგარეო ურთიერთობათა ევროპული საბჭოს (ECFR) ყოველწლიურ შეხვედრაზე გამოსვლას.

“აშშ-მ გამოავლინა ხუთი ქვეყანა, რომლებიც რუსეთის მიერ სანქციების არიდების პრობლემას იწვევენ: თურქეთი, ყაზახეთი, საქართველო, არაბთა გაერთიანებული საამიროები და სომხეთი”. – წერია Politico-ს სტატიაში.

როგორც ო’ბრაიენმა აღნიშნა, ომის დაწყების შემდეგ G7-ის წევრმა ქვეყნებმა რუსეთისთვის ტექნიკის მიწოდება შეწყვიტეს, თუმცა გაიზარდა ექსპორტი სხვა ქვეყნების მიმართულებით, როგორებიცაა თურქეთი, არაბთა გაერთიანებული ემირატები და ყაზახეთი. სახდეპის სანქციების კოორდინაციის ოფისის ხელმძღვანელმა მიუთითა, რომ სწორედ ეს ქვეყნები გახდნენ რუსეთისთვის დასავლური პროდუქციის მსხვილი მიმწოდებლები. მისივე თქმით, სანქციების პრობლემა მნიშვნელოვანი საკითხია და აშშ მისი გადაჭრის მიზნით ამ ქვეყნებთან მოლაპარაკებებს აწარმოებს. ზემოთ ჩამოთვლილ ქვეყნების სიაში ო’ბრაიენმა საქართველო და სომხეთიც მოიხსენია. 

ო’ბრაიენის განმარტებით, პრობლემა ის არის, რომ ევროპული კომპანიები მასალებს სხვა ქვეყნებს ყიდიან, შემდეგ კი ეს ქვეყნები ამ მასალებს რუსეთში ყიდიან.

“ძირითადი მიკროჩიპებისა და ელექტრონიკის ექსპორტი, რომელიც რუსეთს მისი ომის მანქანისთვის სჭირდება, დაუბრუნდა ომამდელ დონეს, რადგან რუსეთი სანქციების გვერდის ავლაში უკეთესი გახდა. ამ წლის დასაწყისისთვის რუსეთს შეეძლო ელექტრონიკის გარკვეული ძირითადი კატეგორიების ხელახალი იმპორტი, დაახლოებით ომამდელ დონეზე, რაც გულისხმობდა ჩიპებს, პროცესორებს და ინტეგრირებულ სქემებს, რომლებიც თანამედროვე იარაღის დამზადებისთვის არის საჭირო

თქვენ იცით, რა დევს სასწორზე. თქვენი ეკონომიკა რისკის ქვეშ არის. შემოსავლების უმეტესობას ევროპასთან, აშშ-სთან იაპონიასთან ურთიერთობის საფუძველზე იღებთ. რატომ აყენებთ ამ ყველაფერს საფრთხეში რამდენიმე გარიგებისთვის?”. – განაცხადა ო’ბრაიენმა.

● საქართველო და სანქციები რუსეთის წინააღმდეგ – რატომ ასოცირდება ქვეყანა “შავ ხვრელთან”?
● სახელმწიფო დეპარტამენტი: კომპანიები საქართველოს აეროპორტებში, შესაძლოა სანქციების საფრთხის წინაშე აღმოჩნდნენ
● როგორ მივიდა საქართველოს სასამართლო სისტემა დასავლურ სანქციებამდე

“შეუცდომელი იყო მაცხოვარი. წერტილი”. – ამბობს “ქართული ოცნების” დეპუტატი ალუდა ღუდუშაური ჯეიმს ო’ბრაიენის განცხადებაზე სანქციებისთვის გვერდის ავლასთან დაკავშირებით. 

“მთელი ამ ხნის განმავლობაში, პრაქტიკულად, რამდენიმე წელია, გრძელდება სიცრუის ტირაჟირება და, მათ შორის, სამწუხაროდ, იმიჯის დამაზიანებელი განცხადებები გვესმის. როგორ შეიძლება, 2 წლის განმავლობაში ვერ მოხერხდა, რომ ერთი მტკიცებულება დადებულიყო, ყველას გვენახა და გვეთქვა, რომ დიახ, ეს, თურმე ასე ყოფილა”. – აცხადებს ღუდუშაური. 

___________

2022 წლის 24 თებერვალს რუსეთის უკრაინაში შეჭრის შემდეგ, ბევრმა ქვეყანამ – აშშ-მ, ევროკავშირის ქვეყნებმა, დიდმა ბრიტანეთმა, იაპონიამ, ავსტრალიამ და ა.შ. – რუსეთის წინააღმდეგ სანქციების რამდენიმე პაკეტი შემოიღო – როგორც კოლექტიური, ასევე ცალმხრივი.

სანქციები ეხება ფინანსურ, ენერგეტიკულ  და სატრანსპორტო სექტორს, ექსპორტსა და იმპორტს, სავიზო პოლიტიკას. სანქციები დაუწესდათ ჩინოვნიკებს, ოლიგარქებსა და პუტინთან დაახლოებულ პირებს. დასავლურ სამყაროს იმედი აქვს, რომ  რუსეთის მთავრობა ამ წნეხს  ვერ გაუძლებს და უკრაინის წინააღმდეგ ომს შეწყვეტს.

საქართველოს რუსეთისთვის სანქციები არ დაუწესებია. მეტიც, 24 თებერვლიდან დღემდე, საქართველოს ხელისუფლების წევრები ხაზგასმით იმეორებენ, რომ საქართველო  დასავლეთის მიერ დაწესებულ სანქციებს არ უერთდება. უკრაინა საქართველოს ამ პოზიციით უკმაყოფილოა და ამას ღიად გამოხატავს.

ამასთან, საქართველოს პრეზიდენტმა და ცალკეულმა უწყებებმა არაერთხელ აღნიშნეს, რომ საქართველო იცავს რუსეთის წინააღმდეგ დაწესებულ სანქციებს და არავის დაეხმარება მათ თავიდან აცილებაში.