საქართველო: 2005 წლის შემდეგ, ყველაზე მცირე რაოდენობის ინვესტიცია 2020 წელს შემოვიდა
“საქსტატის” მონაცემებით 2020 წელს – როდესაც მსოფლიოს კორონავირუსის პანდემია მოედო – საქართველოში პირდაპირი უცხოური ინვესტიციები 57.2 პროცენტით შემცირდა და 572 მლნ აშშ დოლარი შეადგინა.
ინვესტიციების ასეთი დაბალი მაჩვენებელი ქვეყანას 2005 წლის შემდეგ არ ჰქონია, მათ შორის არც 2008-2009 წლებში – რუსეთთან ომისა და მსოფლიო ფინანსური კრიზისის დროს.
სტატისტიკის ეროვნულ სამსახურში ამბობენ, რომ ინვესტიციების შემცირების უმთავრესი მიზეზი რამდენიმე საწარმოს გადასვლაა საქართველოს რეზიდენტის საკუთრებაში, რამაც ინვესტიციების მაჩვენებელი 283 მლნ აშშ დოლარით შეამცირა.
![](https://jam-news.net/app/uploads/2021/08/საქსტატი_1.png)
გასულ წელს ყველაზე მსხვილი ინვესტორი ქვეყნები იყო:
● გაერთიანებული სამეფო – 303 მლნ. აშშ დოლარი
● ნიდერლანდები – 200.7 მლნ. აშშ დოლარი
● აშშ – 98.4 მლნ. აშშ დოლარი
2020 წელს ყველაზე მეტი პირდაპირი უცხოური ინვესტიცია განხორციელდა:
● საფინანსო სექტორი – 404.4 მლნ აშშ დოლარი
● სამთომოპოვებითი მრეწველობის სექტორი – 98.8 მლნ. აშშ დოლარი
● უძრავი ქონების სექტორი – 90.3 მლნ. აშშ დოლარი
___________________________________________________________
● საქართველოში ხელფასი 53 ლარით გაიზარდა
● საქართველოს ყოველი მეშვიდე მოქალაქე სოციალური შემწეობის დახმარებას იღებს
● “საქსტატის” მონაცემებით 2020 წელს პროდუქტები მნიშვნელოვნად გაძვირდა
● აპრილის თვეში ჯანდაცვა 13.8 პროცენტით გაძვირდა
● საქსტატმა ახალი საარსებო მინიმუმი თვეში 178 ლარით და 10 თეთრით განსაზღვრა
_____________________________________________________________
საქსტატის ინფორმაციით, ისტორიული იყო ეკონომიკის ვარდნა გასულ წელს – 1994 წლის შემდეგ საქართველოს ეკონომიკა ყველაზე მეტად სწორედ 2020 წელს, 6,1 პროცენტით შემცირდა.
ვარდნის მთავარი მიზეზი პანდემია და თვეების განმავლობაში გაგრძელებული ლოქდაუნია.
ასევე, საქართველოში საარსებო შემწეობას მთლიანი მოსახლეობის 13,7% იღებს, რაც ნიშნავს იმას, რომ ყოველი მე-7 ადამიანი უკიდურესად გაჭირვებულია.
პანდემიის დაწყებიდან დღემდე ასეთი ადამიანების რიცხვი 16%-ით გაიზარდა და ამჟამად საარსებო შემწეობის მიმღები ნახევარ მილიონზე მეტი – 510 343 ადამიანია.