სამხრეთ ოსეთი რუსეთის შემადგენლობაში: ისევ აქტუალურია ეს თემა?
სამხრეთ ოსეთის შესვლა რუსეთში
რუსი პოლიტოლოგები აცხადებენ, რომ სავარაუდოდ, აფხაზეთს და სამხრეთ ოსეთს შესთავაზებენ შეერთებას რუსეთის ფედერაციაში ან საკავშირო სახელმწიფოში გაწევრიანებას. ცხინვალში სიტუაციის მსგავს განვითარებას არც ადასტურებენ და უარყოფენ. თუმცა, ერთი რამ ცხადია – სამხრეთ ოსეთის პრეზიდენტი მართლაც იყო მიწვეული მოსკოვში.
რას ფიქრობს ხალხი ცხინვალში, სამხრეთ ოსეთის რუსეთში შესაძლო შესვლაზე და როგორ მოქმედებს ამ პერსპექტივის აღქმა საქართველოსთან ახალი ომის შიშზე?
ისტორია
სამხრეთ ოსეთის რუსეთში შესაძლო შესვლის შესახებ საუბარი 2022 წლის საპრეზიდენტო არჩევნებში სამხრეთ ოსეთის მაშინდელი პრეზიდენტის, ანატოლი ბიბილოვის გადარჩევის შემდეგ ჩაცხრა. არჩევნებში გამარჯვებულმა ალან გაგლოევმა შეაჩერა ბიბილოვის განკარგულება რეფერენდუმის ჩატარების შესახებ, რომლის მიზანი იყო იმის გარკვევა, მხარს უჭერენ თუ არა მოქალაქეები სამხრეთ ოსეთისა და რუსეთის გაერთიანებას.
გაგლოევი თვლიდა, რომ ჯერ კიდევ არ დამდგარა დრო, რომ ოსები გაერთიანდნენ რუსეთის ფედერაციაში. მან დასძინა, რომ ასეთი კითხვა თავად რუსეთმა უნდა დასვას, რაც, სავარაუდოდ, ბიბილოვმა არ გააჟღერა.
მას შემდეგ ეს საკითხი სამხრეთ ოსეთის ოფიციალურ წრეებში აღარ განიხილულა; ამ თემაზე ცენზურა დააწესეს სახელმწიფო მედიაში და პარტია “ერთიანი ოსეთის” წევრებიც, რომლებმაც 2014 წელს წამოაყენეს პოლიტიკური სლოგანი სამხრეთ ოსეთის რუსეთში შესვლის შესახებ, ამ თემაზე აღარ საუბრობდნენ.
იმავდროულად, ამის შესახებ მოულოდნელად ისაუბრეს რუსეთის ფედერალურ მედიაში ვლადიმირ პუტინის ფედერალური ასამბლეისადმი გზავნილების წინა დღეს.
JAMnews შეეცადა გაერკვია, რა განწყობაა ამ ყველაფერთან დაკავშირებით სამხრეთ ოსეთში.
“რუსეთთან საერთო სივრცის განცდა არსებობს”
„დღეს სამხრეთ ოსეთის რუსეთში შესვლა დღის წესრიგში არ დგას. ფაქტობრივად, ეს არ დგას მას შემდეგ, რაც რუსეთის ფედერაციამ აღიარა სამხრეთ ოსეთის რესპუბლიკის დამოუკიდებლობა“, – ამბობს პარლამენტის საგარეო პოლიტიკისა და საპარლამენტთაშორისო ურთიერთობების კომიტეტის ყოფილი ხელმძღვანელი და დეპუტატი იგორ კოჩიევი.
„ყველა ეს რეფერენდუმის შესახებ განცხადება, პარტიული ლოზუნგები და ა.შ. გამოიყენება მხოლოდ როგორც მოქალაქეთა საარჩევნო განწყობის მანიპულირებისთვის. სხვადასხვა საარჩევნო კამპანიის მონაწილეები არ იღლებიან ამ თემის მუდმივი გაჟღერებით. ამასთან, ისინი ხშირად არ ფიქრობენ სტრატეგიული პარტნიორის ინტერესებზე და ხშირად აღმოჩნდებიან ხოლმე უხერხულ სიტუაციებში. მაგრამ თავად ამ თემის გამოყენება მეტყველებს სამხრეთ ოსეთის მოქალაქეების განწყობაზე, რომელთა უმეტესობა რუსეთთან შეერთების მომხრეა“.
თუმცა, კოჩიევის თქმით, 2008 წლის შემდეგ ეს ხალხისთვის აღარ არის ისეთი მნიშვნელოვანი:
„ვფიქრობ, მას შემდეგ, რაც რუსეთმა უზრუნველყო სამხრეთ ოსეთის უსაფრთხოება 2008 წელს, ხალხმა თავი დაცულად იგრძნო. უმრავლესობას აქვს რუსეთის მოქალაქეობა, რუსული სახელმწიფო ენაა და მოქმედებს რუსული საგანმანათლებლო სტანდარტები. ანუ აქ არის რუსეთთან საერთო სივრცის განცდა – ამავდროულად, ბევრს ასევე აქვს გააზრებული რუსეთისკენ ორიენტირებული დამოუკიდებელი სახელმწიფოს ეკონომიკური და სხვა უპირატესობები.“
“ასეთი მოსახლეობის პირობებში სუვერენიტეტის მიღწევა ძნელია”
“ერთიანი ოსეთის” ლიდერი, პარლამენტარი და ყოფილი სპიკერი ალან თადთაევი მიიჩნევს, რომ სახალხო განწყობებში მნიშვნელოვანი ცვლილებები არ არის.
„ამ თემაზე უკვე ჩატარებული ყველა რეფერენდუმი, ისევე როგორც ბიბილოვის მიერ 2022 წლის ივლისში დაგეგმილი რეფერენდუმის იდეა, მოსახლეობამ ძალიან დადებითად მიიღო. ხალხი თვითონ მივიდა რეფერენდუმის მხარდასაჭერად ხელმოწერების შეგროვებამდე და ცდილობდა ხელი მოეწერათ, რათა რაც შეიძლება მალე ჩაეტარებინათ რეფერენდუმი, შეერთებოდნენ რუსეთის ფედერაციას და გაერთიანებულიყვნენ ჩვენს ძმებთან ჩრდილოეთ ოსეთში“.
თუმცა, მისი თქმით, „დღეს მოსახლეობის უმნიშვნელო ნაწილი საუბრობს სუვერენიტეტზე, რადგან ასეთი მცირე მოსახლეობით [დაახლოებით 53 ათასი ადამიანი] ეს ძნელი მისაღწევია.
ალან თადთაევი დარწმუნებულია, რომ მოსკოვი გაგებით მოეკიდება გაერთიანების მომხრეების პოზიციას.
„დადგება დრო, როცა მოგვისმენენ. სხვა ალტერნატივას ვერ ვხედავთ. “ერთიანი ოსეთის” პარტია და მე პირადად ვუჭერდით მხარს რუსეთის შემადგენლობაში შესვლას, როგორც სრულფასოვანი სუბიექტის, და მხოლოდ ამის შემდეგ მუშაობას ჩვენი გაყოფილი ოსი ხალხების გაერთიანებაზე“.
გაერთიანდით რუსეთთან, რომ არ გაერთიანდეთ საქართველოსთან
ერთ-ერთი მთავარი ფაქტორი, რომელიც გავლენას ახდენს საზოგადოებისა და პოლიტიკოსების დამოკიდებულებაზე სამხრეთ ოსეთის რუსეთში შესვლის მიმართ, არის ჰიპოთეტური ომი საქართველოსთან.
სამხრეთ ოსეთის თავდაცვის სამინისტროს თანამშრომელი:
„მჯერა, რომ რადიკალურად შეცვლილმა პოლიტიკურმა რეალობამ და, რაც მთავარია, საქართველოს მოლოდინისამებრ პოზიციამ, რომ რუსეთის ოდნავი დასუსტების შემთხვევაში სამხრეთ ოსეთზე თავდასხმისთვის მზადაა, ჩვენი მოქალაქეები დაარწმუნეა, რომ რუსეთთან გაერთიანებას ალტერნატივა არ აქვს, ვინაიდან ჩვენ, მხოლოდ საკუთარი ძალებით, არ შეგვიძლია საქართველოსთან ბრძოლა.
ოფიციალური პირი, რომელმაც ანონიმურად დარჩენა ისურვა:
„ამჟამად ხალხს უფრო მეტად აწუხებს საქართველოდან მეორე ფრონტის გახსნის შესაძლებლობას. შესაბამისად, რუსეთის ფედერაციაში გაწევრიანება აუცილებლად გამოიწვევს მეორე ფრონტის პროვოცირებას. და ეს საერთოდ არ სჭირდება არც რუსეთს და არც სამხრეთ ოსეთის ხალხს.”
პოლიტოლოგი ალან მამიევი:
„ახლა ყველას ესმის, რომ საქართველო ომისთვის ემზადება. რა თქმა უნდა, კარგი იქნება, თუ სამხრეთ ოსეთი რუსეთის შემადგენლობაში შევიდოდა. რატომ არ იღებენ სამხრეთ ოსეთს, ეს რთული კითხვაა. მათ ალბათ არ უნდათ საქართველოს პროვოცირება. სამხრეთ ოსეთისთვის, რა თქმა უნდა, კარგი იქნებოდა ჩრდილოეთ ოსეთთან გაერთიანება – გავხდეთ ერთი რესპუბლიკა რუსეთის ფედერაციის შემადგენლობაში. მაგრამ არ ვარ დარწმუნებული, რომ რუსეთი ახლა ამაზე წავა.”
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
