რუსეთს სამხედრო გემების ნაწილი ანექსირებული ყირიმიდან საქართველოს ოკუპირებულ ტერიტორიაზე გადაჰყავს, ამის შესახებ ინფორმაციას უკრაინის მთავარი სამხედრო სადაზვერვო სამმართველოს პრესსპიკერი, ვადიმ სკიბიცკი ავრცელებს.
სკიბიცკის თქმით, მანამდე რუსეთმა გემები ნოვოროსისკის პორტში გადაიყვანა, თუმცა მისი ამჟამინდელი მდგომარეობიდან გამომდინარე პორტი რუსეთის სრულ ფლოტს ვერ დაიტევს, ამიტომ კრემლმა ოკუპირებული აფხაზეთის გამოყენება გადაწყვიტა.
სპიკერი ასევე ამბობს, რომ ამ ეტაპზე ოჩამჩირეში აქტიური სამუშაოები მიმდინარეობს.
“რუსებმა ჩაატარეს პორტის ნაწილობრივი რეკონსტრუქციული სამუშაოები, ასევე გააღრმავეს ფსკერი, რათა შექმნან ბაზა საკუთარი სამხედრო თვითმფრინავებისთვის. თუმცა ეს არც თუ ისე დიდი ბაზა იქნება”, – აცხადებს სკიბიცკი.
დაზვერვის პრესსპიკერი ხაზს უსვამს, რომ რუსებმა “გაიაზრეს საგრძნობი სამხედრო საფრთხე” მას შემდეგ, რაც უკრაინამ ყირიმში სპეცოპერაციების სერია განახორციელა.
“ისინი [რუსები] ხვდებიან რომ ომი ყირიმში გადავიდა. ჩვენი მიზანია ოკუპირებული ყირიმის სრული გათავისუფლება. ამ კუთხით უკან არ დავიხევთ. ჩვენ უნდა გავანადგუროთ იქ განთავსებული საოკუპაციო დაჯგუფება.” – ამბობს სკიბიცკი.
აფხაზეთის ე.წ. პრეზიდენტის, ასლან ბჟანიას თქმით, ოჩამჩირეში რუსეთის მუდმივი საზღვაო ბაზა მოეწყობა. ამის შესახებ ბჟანიამ რუსულ მედია Известия-სთან მიცემულ ინტერვიუში 5 ოქტომბერს ისაუბრა.
“ჩვენი დღესასწაულის დღეს ჩვენთან შემოვიდა პატარა სარაკეტო ხომალდი, ჩვენ მის ბორტზე ავედით. ძალიან განვითარებული ხომალდია სერიოზული საბრძოლო შესაძლებლობებით. ჩვენ ხელი მოვაწერეთ შეთანხმებას და უახლოეს მომავალში, ოჩამჩირის რაიონში რუსეთის საზღვაო ძალების მუდმივი ბაზა მოეწყობა.
ეს ყველაფერი მიმართულია რუსეთისა და აფხაზეთის თავდაცვისუნარიანობის გაზრდისკენ და ასეთი ტიპის თანამშრომლობა გაგრძელდება, რადგან ეს ემსახურება რუსეთისა და აფხაზეთის ფუნდამენტურ ინტერესებს და უსაფრთხოება ამ მხრივ ყველაზე მნიშვნელოვანია”. – ამბობს ბჟანია.
აფხაზეთის რესპუბლიკის უშიშროების საბჭოს მდივანი, სერგეი შამბა ასლან ბჟანიას განცხადებას გამოეხმაურა და აღნიშნა, რომ ეს შეთანხმება “დღეს არ იყო მიღწეული” და გადაწყვეტილება წინა, ერთობლივ შეხვედრებზე მიიღეს.
მისივე თქმით, აფხაზეთისთვის ეს არის რუსეთის ფედერაციასთან სამოკავშირეო ხელშეკრულებების განხორციელების მაგალითი.
საქართველოს საგარეო უწყება აღნიშნულთან დაკავშირებით “შეშფოთებას” გამოთქვამს და აღნიშნავს, რომ მსგავსი ქმედება საქართველოს სუვერენიტეტისა და ტერიტორიული მთლიანობის დარღვევაა.
ოჩამჩირეში რუსული საზღვაო ბაზის წინააღმდეგ ქართული ოპოზიცია პარლამენტისგან რეზოლუციის მიღებას ითხოვს. შესაბამისი რეზოლუციის პროექტი საკანონმდებლო ორგანოში 9 ოქტომბერს დარეგისტრირდა. რეზოლუციის ავტორები ოპოზიციის წარმომადგენლები, საპარლამენტო პოლიტიკური ჯგუფი „საქართველოსთვის“ და დამოუკიდებელი დეპუტატი თეონა აქუბარდია არიან.
“რეზოლუციის პროექტი მტკიცედ გმობს რუსეთის მიერ საქართველოს სუვერენული რეგიონების, აფხაზეთისა და ცხინვალის რეგიონის ოკუპაციას, მილიტარიზაციას და მათი ანექსიისკენ მიმართულ აგრესიულ ქმედებებს, რომლის ახალი გამოხატულებაა აფხაზეთში, ოჩამჩირის პორტში რუსეთის მუდმივმოქმედი სამხედრო საზღვაო ბაზის გახსნის გადაწყვეტილება, ისევე როგორც აფხაზეთის რუსეთ-ბელარუსის კავშირში ინტეგრაციის მცდელობა.” – ვკითხულობთ აღნიშნულ ინიციატივაში.
9 ოქტომბერს ჩრდილოატლანტიკური ალიანსის საპარლამენტო ასამბლეამ სამი რეზოლუცია მიიღო, რომლებშიც საქართველოს ევროატლანტიკური მისწრაფებებისა და ტერიტორიული მთლიანობის მხარდაჭერაზე საუბრობს. ასევე, რეზოლუცია გმობს ოჩამჩირეში რუსული სამხედრო ბაზის განთავსებას.
“ვგმობთ რუსეთის გაცხადებულ მისწრაფებას ოჩამჩირეში სამხედრო-საზღვაო ბაზა ააშენოს, რომელიც განთავსებულია რუსეთის მიერ საქართველოს ოკუპირებულ ტერიტორიაზე, რაც შავი ზღვის რეგიონში შემდგომი დესტაბილიზაციის საშიშროებას ქმნის.
მხარს ვუჭერთ, რომ კვლავ დადასტურდეს 2008 წლის ბუქარესტის სამიტის გადაწყვეტილება, რომლის თანახმადაც საქართველო გახდება NATO-ს წევრი გაწევრიანების სამოქმედო გეგმით, როგორც გაწევრიანების პროცესის განუყოფელი ნაწილი.
ასევე სწრაფად უნდა მოხდეს საჭიროებებზე მორგებული პაკეტის იმპლემენტაცია, რომლის ფარგლებშიც გამოიხატება საქართველოსა და მოლდოვის მხარდაჭერა, ასევე აქტიურად გაგრძელდეს საქართველოს მხარდაჭერა ევროატლანტიკური ინტეგრაციის გზაზე, გარდა ამისა მისი მხარდაჭერა ჩრდილოატლანტიკურ ალიანსში გაწევრიანებისთვის გადადგმულ ნაბიჯებში, რომლებიც ჩატარებულ რეფორმებში აისახება.” – წერია ალიანსის მიერ მიღებულ ერთ-ერთ რეზოლუციაში.
