სალომე ზურაბიშვილი: დღეს არსებობს შიში, რომ უკანასკნელი ოპოზიციური არხების გაჩუმება მოხდება
სალომე ზურაბიშვილის გამოსვლა
საქართველოს მეხუთე პრეზიდენტმა, სალომე ზურაბიშვილმა ვარშავის უსაფრთხოების ფორუმზე სიტყვით გამოსვლისას განაცხადა, რომ საქართველოში არსებობს შიში, რომ უკანასკნელი ოპოზიციური არხების გაჩუმება მოხდება. მისივე თქმით, დეზინფორმაციის წინააღმდეგ ბრძოლა საერთო მტრის წინააღმდეგ საერთო ბრძოლას წარმოადგენს.
სალომე ზურაბიშვილი: “დეზინფორმაციის კამპანიებისა და ტექნოლოგიური საშუალებების წინააღმდეგ ინფორმაცია მუშაობს. ასევე, მუშაობს სოციალური ქსელები, რადგან რეგულარული კომუნიკაციის არხები პირდაპირ სამიზნედ იქცა. დღეს არსებობს იმის შიში, რომ უკანასკნელი ოპოზიციური არხების გაჩუმება მოხდება. პირველი სამიზნეები რეგიონული ჟურნალისტები იყვნენ.
მზია ამაღლობელი, ქალი ჟურნალისტი, რომელიც დაკავებულია. პოლიციელმა მას სახეში შეაფურთხა და მან სილა გააწნა. მან 8 თვე წინასწარ პატიმრობაში გაატარა, ხოლო შემდეგ 2 წლით თავისუფლების აღკვეთა მიუსაჯეს. ის რეგიონში ერთ-ერთი ყველაზე მამაცი ჟურნალისტია, რეგიონში, სადაც მსგავსი ჟურნალისტები გვჭირდება, რათა ინფორმაციული ბრძოლები მოვიგოთ. ჩვენ ინფორმაციულ ბრძოლებში ნამდვილად ვერ ვიმარჯვებთ, რადგან ყველა რესურსი, არასამთავრობო ორგანიზაციები და ოფიციალური არხები მიზანშია ამოღებული. ამიტომ, სოციალური ქსელების, მათ შორის TikTok-ის გამოყენება გვიწევს.
ამ ბრძოლაში მარტო ვერ გავიმარჯებთ. ეს საერთო ბრძოლაა. მხოლოდ ევროკავშირისა და ევროპის ქვეყნებს შეუძლიათ რეალურად დეზინფორმაციის წინააღმდეგ სტრატეგიები შეიმუშაონ, რადგან რუსეთი ამ სტრატეგიებით დიდი ხანია იბრძვის. ამ ყველაფერს წინ საბჭოთა პროპაგანდა უძღოდა, ხოლო არ უნდა დაგვავიწყდეს, რომ პუტინი არა სამხედრო ლიდერი, არამედ “კაგებეს“ ლიდერია. მასთან გამკლავების მიზნით, საჭიროა ბრძოლის საშუალებების გაზიარება. ეს საერთო ბრძოლაა საერთო მტრის წინააღმდეგ.“
მხოლოდ 2025 წლის საგაზაფხულო სესიაზე, “ქართული ოცნების” პარლამენტმა დაჩქარებული წესით მიიღო ხუთი საკანონმდებლო ცვლილება, რომელიც მნიშვნელოვნად ზღუდავს საქართველოში მედიის მუშაობასა და გამოხატვის თავისუფლებას.
ეს კანონები ფაქტობრივად, კრძალავს უცხოური დაფინანსებით მოქმედი მედიასაშუალებების საქმიანობას, აძლიერებს სახელმწიფოს კონტროლს მედიაზე და შესაძლებელს ხდის ჟურნალისტების დასჯას კრიტიკული პოზიციის გამოხატვის გამო.
