სახელმწიფოს იქ არ უშვებენ. რა ხდება ნინოწმინდის ბავშვთა სახლში
ქართველი უფლებადამცველები საპატრიარქოსთან არსებულ დახურულ პანსიონში მოხვედრას წარუმატებლად ცდილობენ – ამ დაწესებულებაში ბავშვებზე ძალადობის ფაქტების შესახებ არსებული ინფორმაციის ფონზე.
ერთ-ერთი დაწესებულება, რომელიც ადამიანის უფლებათა დამცველებში ეჭვებს იწვევს, ქალაქ ნინოწმინდაში მდებარე პანსიონია ობოლი ბავშვებისთვის. საპატრიარქოს კუთვნილმა პანსიონმა ახლახან კარი ოფიციალურად მიუხურა არა მხოლოდ საქართველოს სახალხო დამცველის აპარატის ექსპერტებს, არამედ სოციალურ მუშაკებსაც.
სახალხო დამცველის აპარატის წარმომადგენლების განცხადებით, მათ პანსიონში მონიტორინგის ჩატარებაზე უარი მიიღეს. მიზეზი მაღალი რანგის სასულიერო პირის – სხალთის მთავარეპისკოპოსის, მეუფე სპირიდონის ბრძანება იყო, რომელიც იმავდროულად ამავე პანსიონის რექტორია.
- დასავლეთი თუ რუსეთი? საით მიჰყავს ქვეყანა ქართულ ეკლესიას
- კორონავირუსი და ბოლო ჟამის ეკლესია. საუბარი გია ნოდიასთან და ბექა მინდიაშვილთან
- ბათუმელი მუსლიმები: ბრძოლა მეჩეთისთვის
“ერთსქესიანთა ქორწინების მომხრეებს არ შევუშვებთ”
თვით მეუფემ, რომელმაც ვიდეომიმართვა ჩაწერა, თავისი უარი შემდეგნაირად განმარტა:
”ეს ის ხალხია, ვინც ოფიციალურად ითხოვს ერთსქესიანთა ქორწინების დაკანონებას. ჩემი პირადი მოსაზრებაა, რომ ასეთი ადამიანები არ უნდა შეუშვან ბავშვთა სახლში, ან საერთოდ არცერთ ოჯახში. – ამბობს მღვდელი მიმართვაში, რომელიც თავის ფეისბუქ გვერდზე გამოაქვეყნა,- მე ამ ბავშვების სულის მოვალე ვარ. მე პასუხისმგებელი ვარ ღმერთის წინაშე ამ ბავშვების ბედზე და მიმაჩნია, რომ შენობაში იმ ადამიანების შეშვება, ვინც საქართველოში ერთსქესიანთა ქორწინების ლეგალიზებას ცდილობს, ყველაზე სერიოზული დანაშაული და სიწმინდის შეურაცხყოფაა”,
სახალხო დამცველის აპარატის ცნობით, მთელი წლის განმავლობაში სახელმწიფომ ვერ გაარკვია, თუ რა ხდება პანსიონის კედლებს მიღმა. სოციალური მუშაკები პანსიონში ბოლოს 2020 წლის ივნისში იყვნენ. დღეს იქ 57 ბავშვი ცხოვრობს, მათ შორის ყველაზე უმცროსი 5 წლისაა.
სახალხო დამცველის ოფისი აღნიშნავს, რომ ნინოწმინდის პანსიონში ადრე ჩატარებულმა მონიტორინგმა ბავშვებზე ძალადობის სერიოზული შემთხვევები გამოავლინა. კერძოდ, წინა შემოწმების შედეგების თანახმად, რომელზეც რადიო თავისუფლებამ ნოემბერში დაწერა, ნინოწმინდის სკოლა-პანსიონში, ბავშვების დასჯისას მათ შეიძლება აუწიონ ყური, მოქაჩონ თმა, კუთხეში დააყენონ, შეუზღუდონ რელიგიურ რიტუალებში მონაწილეობა, აიძულონ მეტანიების გაკეთება.
სახელმწიფო არ რეაგირებს
როგორც სახალხო დამცველის მოადგილემ ეკა სხილაძემ რადიო თავისუფლებასთან საუბრისას განაცხადა, პანსიონში ბავშვების სასტიკი დასჯის შემთხვევები ფიქსირდება, ბავშვები პრაქტიკულად იზოლირებულნი არიან საზოგადოებისგან.
სხილაძის თქმით, საქართველოში რელიგიური ორგანიზაციების დაქვემდებარებაში მყოფი დახურული პანსიონების მთავარი პრობლემა ის არის, რომ პირი, რომელიც მათ მართავს, სრულიად უკანონოდ არის უფლებამოსილი, არ შეუშვას იქ მაგალითად, სოციალური მუშაკები.
”ჩვენი მთავარი კითხვა იმის ფონზე, რაც ხდება, არის – რას აკეთებს სახელმწიფო იმისთვის, რომ გაარკვიოს, ხომ არ ირღვევა ბავშვების უფლებები, ვისზეც ის პასუხისმგებელია?” – თქვა ომბუდსმენის მოადგილემ.
16 აპრილს გავრცელებულ განცხადებაში, სახალხო დამცველის აპარატმა მიმართა საქართველოს მთავრობას, კერძოდ, ჯანმრთელობისა და სოციალური დაცვის სამინისტროს და ზომების მიღება მოითხოვა, რომ სახალხო დამცველის წარმომადგენლებმა და სოციალურმა მუშაკებმა შეძლონ პანსიონის მონახულება და ბავშვებთან კონფიდენციალურად გასაუბრება.
ქართული მედიის ინფორმაციით, მეურვეობისა და მზრუნველობის სახელმწიფო სააგენტოს მომხდართან დაკავშირებით კომენტარი არ გაუკეთებია.
განათლების სამინისტრომ, რომელსაც რადიო თავისუფლებამ მიმართა, თავის პასუხში მხოლოდ ის აღნიშნა, რომ ბავშვები ბავშვთა სახლიდან ნინოწმინდის საშუალო სკოლაში სწავლობენ.
ნინოწმინდის პანსიონის რექტორმა თავის ვიდეომიმართვაში აღნიშნა, რომ ამ დაწესებულების გახსნამდე ქალაქში საერთოდ არ არსებობდა ქართული სკოლა, ადგილობრივი ბავშვები სომხურ ან რუსულ ენებზე სწავლობდნენ.
”ნინოწმინდაში ქართული სკოლა არ არსებობდა და ის პანსიონის ბაზაზე გავხსენით, ახლა ჩვენი ბავშვები აქ დადიან”, – თქვა მეუფე სპირიდონმა.
“ის მამასავით იყო”
დამოუკიდებელი რეგიონული გამოცემის Jnews– ის ჟურნალისტებმა პანსიონის ერთ – ერთ ყოფილ მოსწავლესთან გასაუბრება მოახერხეს. გოგონა, რომელსაც ვინაობა არ დაუსახელებია, ამბობს, რომ ბავშვთა სახლი რამდენიმე წლის წინ დატოვა იმის გამო, რომ სრულწლოვანი გახდა. მისივე თქმით, პანსიონში ძალადობას ადგილი არ ჰქონია და ბავშვები იზოლირებულები არ იყვნენ:
”დღეში ოთხჯერ გვაჭმევდნენ. ძიძები დედებივით გვექცეოდნენ. ისინი თავიანთ ოჯახებს 2-3 თვით ტოვებდნენ და ჩვენთან რჩებოდნენ. თითოეულ ბავშვს დედებივით ექცეოდნენ და მეუფე სპირიდონიც ჩვენთვის მამასავით იყო ”.
სახალხო დამცველის ოფისის მონიტორინგის თანახმად, ბავშვების უფლებები არა მხოლოდ მართლმადიდებლურ სკოლა-პანსიონებში, არამედ სხვა კონფესიების კუთვნილ დაწესებულებებშიც ირღვევა. სახალხო დამცველის 2015 წლის ანგარიშში, კერძოდ, ნათქვამია, რომ მუსლიმური პანსიონების ბენეფიციარებს არ განუცხადებიათ სისტემატური ფიზიკური შეურაცხყოფის შესახებ, მაგრამ აღიარეს, რომ ზოგჯერ აღმზრდელები უყვირიან მათ და ფიზიკურ შეურაცხყოფასაც აყენებენ.
მოხსენებაში ასევე ხაზგასმულია, რომ ამ დაწესებულებების ნაწილი არ აკმაყოფილებს ჰიგიენის სტანდარტებს და სამზარეულოში ნაპოვნია ვადაგასული პროდუქტები. საერთო ჯამში, ანგარიშში შვიდი რელიგიური სკოლა-ინტერნატი მოხვდა.
