ამერიკის შეერთებული შტატების სახელმწიფო დეპარტამენტის სპიკერის, მეთიუ მილერის თქმით, საქართველოს დასავლური ტრაექტორია რისკის ქვეშაა. განცხადება სახელმწიფო დეპარტამენტის ვებ-გვერდზე გამოქვეყნდა.
“ამერიკის შეერთებული შტატები გმობს დღეს, ცოტა ხნის წინ, კრემლისგან შთაგონებული “უცხოური გავლენის” კანონპროექტის საქართველოს პარლამენტში წინ წაწევას და იმ ცრუ ნარატივს, რომელიც მთავრობის მაღალჩინოსნებმა გაითავისეს მის დასაცავად. მმართველი პარტიის წევრებმა ცხადად გამოხატეს, რომ კანონის მიღების განზრახვა კრიტიკოსთა ხმების ჩახშობა და საქართველოს სიცოცხლით სავსე სამოქალაქო საზოგადოების განადგურებაა.
ეს კანონპროექტი და ქართული ოცნების ანტიდასავლური რიტორიკა საქართველოს სახიფათო ტრაექტორიაზე აყენებს.საქართველოს მთავრობის განცხადებები და ქმედებები შეუთავსებელია იმ დემოკრატიულ ღირებულებებთან, რომლებიც ევროკავშირისა და NATO-ს წევრობას უდევს საფუძვლად და, მაშასადამე, საფრთხეში აგდებს საქართველოს ევროატლანტიკური ინტეგრაციის გზას. კომენტარები, რომლებიც არასწორად ახასიათებენ საქართველოსთვის გაწეულ უცხოურ დახმარებას – რომელმაც 32 წლის განმავლობაში საქართველოს ეკონომიკის, დემოკრატიისა და რუსული აგრესიის შეკავების უნარის გაძლიერება უზრუნველყო – ფუნდამენტურად ძირს უთხრის იმ მყარ ურთიერთობას, რომელიც ჩვენ მთავრობასთან და ქართველ ხალხთან ჩამოგვიყალიბდა.
ჩვენ ქართველი ხალხისა და მათი ხმის გაგონების უფლების გვერდით ვდგავართ. ვგმობთ მშვიდობიანი დემონსტრანტების წინააღმდეგ ძალადობის გამოყენებას, მათ შორის იმ ჟურნალისტებზე, რომლებიც დემონსტრაციებს აშუქებდნენ. მშვიდობიანი შეკრებისა და სიტყვის თავისუფლების ჩახშობისთვის ძალის გამოყენება მიუღებელია, და მოვუწოდებთ ხელისუფლებას, არაძალადობრივი დემონსტრანტების მხრიდან საკუთარი გამოხატვის თავისუფლებით სარგებლობა დაუშვას.” – წერია მეთიუ მილერის მიერ გავრცელებულ განცხადებაში.
პირველ მაისს, თბილისში, პარლამენტთან, რუსული კანონის საწინააღმდეგო აქციაზე, სპეცრაზმმა ისევ გამოიყენა წყლის ჭავლი და ცრემლმდენი გაზი აქციის მონაწილეების წინააღმდეგ. დაუდასტურებელი ინფორმაციით, სპეცრაზმმა მომიტინგეების მისამართით ისროლა რეზინის ტყვიებიც. სოციალურ ქსელებში ვრცელდება დაშავებული ადამიანების ფოტოები და ვიდეოები.
წინა დღეს, მთელი ღამის განმავლობაში გრძელდებოდა თბილისში დაპირისპირება რუსული კანონის მოწინააღმდეგე დემონსტრანტებსა და პოლიციასა და სპეცრაზმს შორის.
მშვიდობიანი აქციის დაშლა საღამოს ათი საათის შემდეგ დაიწყო, როდესაც მომიტინგეთა რიგები უკვე საგრძნობლად შემცირდა. სპეცრაზმმა მომიტინგეების წინააღმდეგ სპეციალური ტექნიკა გამოიყენა – წყლის ჭავლი, წიწაკის სპრეი, ცრემლსადენი გაზი, ისროდნენ რეზინის ტყვიებს და ფიზიკურად უსწორდებოდნენ მომიტინგეებს. დააკავეს რამდენიმე მომიტინგე.
სპეცრაზმმა თავდაპირველად მოახერხა პარლამენტის მიმდებარე ტერიტორიის გათავისუფლება მომიტინგეებისგან, თუმცა ძალიან მალე, რუსთაველის გამზირზე ხალხის რაოდენობა მკვეთრად გაიზარდა – დაბრუნდნენ აქციიდან უკვე წასულებიც და მომიტინგეებს შეუერთდნენ ისინიც, ვინც მანამდე ტელევიზორიდან უყურებდა მოვლენებს.
