სახალხო დამცველმა სააკაშვილის სამედიცინო მომსახურებისთვის ექსპერტთა ჯგუფი შექმნა

საქართველოს სახალხო დამცველმა ნინო ლომჯარიამ მიხეილ სააკაშვილის სამედიცინო მომსახურების მონიტორინგის მიზნით მულტიპროფილურ ექსპერტთა ჯგუფი შექმნა.

ომბუდსმენის აპარატის ინფორმაციით, მათ მოიწვიეს კვალიფიკაციითა და კეთილსინდისიერებით გამორჩეული სამედიცინო დარგის შემდეგი სპეციალისტები:

• გიორგი გრიგოლია – ანესთეზიოლოგ-რეანიმატოლოგი;
• გრიგოლი ხურციძე – შინაგანი სნეულებები/ჰოსპიტალური მედიცინა;
• გიორგი კაჭარავა – კარდიოლოგი;
• გიორგი პაპიაშვილი – კარდიოლოგი/არითმიოლოგი;
• აიდა გოზალოვა – ჰემატოლოგი, კლინიკური ონკოლოგი, ინტერნისტი, პალიატიური მედიცინის სპეციალისტი;
• მამუკა მაჩაიძე – ინფექციონისტი, თერაპევტი;
• თენგო წულაძე – ნევროლოგი;
• ნინო ზავრაშვილი – ენდოკრინოლოგი.

● შიმშილობის 47-ე დღე: სააკაშვილთან არ შეუშვეს უკრაინის სახალხო დამცველი. ვინ რა იცის მისი ჯანმრთელობის მდგომარეობაზე?
● სააკაშვილის საქმეები. რისთვის ზის ციხეში ყოფილი პრეზიდენტი

აპარატის ცნობით, ჯგუფის მიზანია შეაფასოს, რამდენად შეესაბამება მიხეილ სააკაშვილის ჯანმრთელობის უფლების დაცვას N18 სამკურნალო დაწესებულება და იქნება თუ არა ამ დაწესებულებაში ადეკვატური სამედიცინო სერვისის მიწოდება შესაძლებელი მას შემდეგ, რაც პატიმარი ხანგრძლივ შიმშილობას შეწყვეტს, როგორც ამას სტრასბურგის სასამართლო 10 ნოემბრის გადაწყვეტილებით ითხოვს.

“სახალხო დამცველმა მიიღო გადაწყვეტილება, გამოიყენოს კანონმდებლობით მისთვის მონიჭებული უფლებამოსილება და შექმნა მულტიპროფილურ ექსპერტთა ჯგუფი, რომელიც მონიტორინგს გაუწევს სახელმწიფოს მიერ პატიმრისთვის მიწოდებული სამედიცინო სერვისის ეფექტიანობას. თუმცა, აქვე ხაზგასმით აღნიშნავს, რომ სახალხო დამცველი ვერ და არ ჩაანაცვლებს სახელმწიფოს პასუხისმგებლობას პატიმარზე და მის ჯანმრთელობაზე ზრუნვის ნაწილში.

სახალხო დამცველს უკვე არაერთხელ აქვს გამოყენებული საკონსულტაციო სამუშაოთა შესასრულებლად ექიმ-სპეციალისტთა მოწვევის მანდატი სხვა პატიმრებთან დაკავშირებით”, – ნათქვამია განცხადებაში.

ჯგუფის საქმიანობაში ასევე ჩაერთვება სახალხო დამცველის აპარატში შრომითი ხელშეკრულების საფუძველზე დასაქმებული ექიმი, მედიცინის დოქტორი მერაბ ქავთარაძე.

განცხადებაში აღნიშნულია ისიც, რომ საჭიროების შემთხვევაში, ჯგუფის შემადგენლობა გაფართოვდება შესაბამისი დარგის სამედიცინო ექსპერტთა მონაწილეობით.

“აქვე კვლავ მოვუწოდებთ იუსტიციის სამინისტროს/სპეციალურ პენიტენციურ სამსახურს – უზრუნველყოს მის მიერვე შექმნილი მულტიფუნქციური კონსილიუმის რეგულარული ვიზიტები და ხელი არ შეუშალოს მათ ეფექტიან საქმიანობას, მათ შორის, ბიუროკრატიული დაბრკოლებებით. ასევე, შემჭიდროვებულ ვადებში, შემუშავდეს მულტიფუნქციური კონსილიუმის საქმიანობის პროტოკოლი”, – წერია ომბუდსმენის განცხადებაში.

როგორც ლომჯარიამ აღნიშნა, ექიმების ჯგუფი სააკაშვილთან უახლოეს მომავალში შევა და რა სიხშირით მოინახულებენ პაციენტს, მათ გადაწყვეტილებაზე იქნება დამოკიდებული.

“თუ ამ ჯგუფს შეექმნება დაბრკოლებები, ეს ნიშნავს იმას, რომ პენიტენციური სამსახური სახალხო დამცველსა და მის წარმომადგენლებს ეუბნება უარს ციხეში პატიმრის მონახულებაზე, რაც წარმოადგენს არა მხოლოდ ადმინისტრაციულ სამართალდარღვევას, არამედ შეიძლება დაკვალიფიცირდეს სისხლის სამართლის დანაშაულადაც”, – განაცხადა ნინო ლომჯარიამ.

● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
●  სააკაშვილი შიმშილობს ერთი თვეა – ოქტომბრის ქრონოლოგია
● ევროდეპუტატი ანა ფოტიგა სააკაშვილთან ციხეში არ შეუშვეს

საქართველოს მესამე პრეზიდენტი მიხეილ სააკაშვილი უკვე 47-ე დღეა შიმშილობს. 8 დღეა, რაც იგი რუსთავის ციხიდან გლდანის ციხის სამკურნალო დაწესებულებაში გადაიყვანეს. 10 დღეა სააკაშვილი საკვებ დანამატებსაც აღარ იღებს და როგორც მისი მეგობრები და ადვოკატები ამბობენ, ასევე უარს ამბობს გარკვეულ სამედიცინო მომსახურებაზე.

სააკაშვილი მზად არის შეწყვიტოს შიმშილობა, თუკი მას მულტიპროფილურ, სამოქალაქო კლინიკაში გადაიყვანენ. თუმცა, ექიმები ამბობენ, რომ თუკი ის შიმშილობას შეწყვეტს, მას მაინც აუცილებლად სჭირდება მულტიპროფილურ კლინიკაში გადაყვანა, რადგან თითქმის ორთვიანი შიმშილობის შემდეგ, კვების დაწყება სამედიცინო თვალსაზრისით არ არის იოლი პროცესი და სიცოცხლისთვის სახიფათო შეიძლება აღმოჩნდეს, თუკი მოშიმშილე ვერ მიიღებს სათანადო სამედიცინო დახმარებას და არ იქნება მუდმივი დაკვირვების ქვეშ.