საქართველოში საგანგებო რეჟიმი გამკაცრდა. რა უნდა ვიცოდეთ

საგანგებო მდგომარეობის დასრულებამდე – 21 აპრილამდე აკრძალულია: 

•  ყველა სახის საერთაშორისო სამგზავრო მიმოსვლა – როგორც საჰაერო, ისე სახმელეთო და საზღვაო. (აკრძალვა ტვირთებს არ ეხება)

•  ჩარტერული ფრენები დაიგეგმება საჭიროებისამებრ და მხოლოდ ხელისუფლებასთან შეთანხმებით.

•  არ მუშაობს რკინიგზა. საქართველოს ქალაქებს შორის არ ივლიან მატარებლები.

•  მატარებელთან ერთად, აკრძალულია საქართველოს ქალაქებს შორის ნებისმიერი საზოგადოებრივი ტრანსპორტის მოძრაობაც – ანუ არ ივლიან არც ავტობუსები და არც სამარშრუტო ტაქსები.

•  გამონაკლისია სამარშრუტო ტაქსები, რომლებიც მუნიციპალიტეტის ცენტრსა და სოფლებს შორის ივლიან – მაგალითად გორსა და გორის რაიონის სოფლებს შორის სამარშრუტო ტაქსი ივლის.

• საქართველოს ქალაქებს შორის ამ ეტაპზე ნებადართულია კერძო ავტომობილებით გადაადგილება ამ ეტაპზე.

•  რაც შეეხება ქალაქებში შიდა გადაადგილებას – თბილისში ამ ეტაპზე მუშაობს მეტრო და ავტობუსები. აკრძალეს მხოლოდ სამარშრუტო ტაქსები. მხოლოდ ავტობუსები დადიან ასევე საქართველოს სხვა დიდი ქალაქების შიგნით – რუსთავში, ბათუმში, ქუთაისში.

•  სკოლებსა და უმაღლეს სასწავლებლებში სასწავლო პროცესი მინიმუმ 21 აპრილამდე არ განახლდება. იქ, სადაც ეს შესაძლებელია, სწავლება მიმდინარეობს დისტანციურად. 

• 30 მარტიდან საზოგადოებრივი მაუწყებლის მეორე არხის ეთერში სკოლის მოსწავლეებისთვის ვიდეო-გაკვეთილების ტრანსლირება დაიწყება.

•  აიკრძალა ყველა სახის ტრენინგის, კონფერენციის და სემინარის ჩატარება. მსგავსი ღონისძიებების ჩატარება დასაშვებია მხოლოდ დისტანციურ რეჟიმში.

•  აკრძალულია ყველა ტიპის კულტურული ღონისძიება როგორც დახურულ, ისე ღია სივრცეში. 

• აიკრძალა ყველა ტიპის სპორტული ღონისძიება როგორც დახურულ, ასევე ღია სივრცეში. მათ შორის წვრთნები და ვარჯიშებიც. 

•  აიკრძალა შეკრება და მანიფესტაცია, ასევე საჯარო სივრცეში 10-ზე მეტი პირის თავშეყრა.

•  მთავრობის განმარტებით, საჯარო სივრცე ნიშნავს ნებისმიერ ადგილს როგორც გარეთ, ასევე შენობებში. ეს არ ეხება მხოლოდ კერძო პირის საცხოვრებელ ადგილს.

•  აიკრძალა ყველა ტიპის სოციალური ღონისძიება, რომელიც დაკავშირებულია 10-ზე მეტი ფიზიკური პირის შეკრებასთან (მაგ: ქელეხი, ქორწილი და სხვა მსგავსი ღონისძიებები).

•  10-ზე მეტი ფიზიკური პირის თავშეყრა იმ კერძო დაწესებულებებში, რომლებზეც არ ვრცელდება საქმიანობის შეჩერების მოთხოვნა (მაგალითად, დიდ სუპერმარკეტში) , დასაშვებია იმ შემთხვევაში, თუ ადამიანებს შორის დაცული იქნება 2-მეტრიანი სოციალური დისტანცია.

• რას ნიშნავს საგანგებო მდგომარეობა – რისი უფლება გვაქვს და რისი არა
• მარნეული და ბოლნისი დაიკეტა
• მარნეული ეპიდაფეთქების მოლოდინში. რა ხდება დახურულ ქალაქში

•  რესტორნებს და კაფე-ბარებს აკრძალული აქვთ შიდა სივრცეში მომხმარებელთა მიღება. მათ აქვთ უფლება, რომ თავიანთ საქმიანობაში ადგილზე მიტანის სერვისი გამოიყენონ.

•  21 აპრილამდე აკრძალულია საკლუბო და გასართობ-დასასვენებელი ცენტრების, კინოთეატრების, სპორტულ-გამაჯანსაღებელი ცენტრების, სილამაზის სალონებისა და ღამის კლუბების საქმიანობა. 

•  აზარტული და მომგებიანი თამაშები მხოლოდ ელექტრონული ფორმითაა დასაშვები.

რა უნდა იცოდეთ თქვენი უფლებების შესახებ

•  საგანგებო მდგომარეობის დასრულებამდე სახელმწიფოს და კერძო აღმასრულებელებს არ აქვთ უფლება კერძო პირების ქონებას ყადაღა დაადონ.

•  ასევე, იკრძალება გაყიდული ქონებიდან პირთა გამოსახლება. 

•  მოვალეს არ ჩამოეჭრება თანხა ანგარიშიდან, ხელფასიდან, პენსიიდან ან სხვა შემოსავლიდან. აღმასრულებელს უფლება აქვს, მხოლოდ მოვალის სასარგებლო გადაწყვეტილება მიიღოს. 

•  იურიდიული პირების ქონების დაყადაღება შესაძლებელია.

•  საგანგებო მდგომარეობის მოქმედების დროს არ დაჯარიმდებიან ის მძღოლები, რომლებიც გეგმიურ ტექდათვალიერებას ვერ გაივლიან.

•  ეს წესები მოქმედებს საქართველოს მთელ ტერიტორიაზე.

•  მარნეულსა და ბოლნისში, სადაც მკაცრი საკარანტინო ზონაა, სხვა დამატებითი შეზღუდვებიცაა დაწესებული.

•  კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა, 23 მარტს კი კორონავირუსის შიდა გავრცელების გამო მარნეული და ბოლნისი დაიკეტა.