საელჩოები და პოლიტიკური პარტიები LGBTQI+ ადამიანებს მხარდაჭერას უცხადებენ

თხუთმეტმა პოლიტიკურმა პარტიამ, საქართველოში გაერთიანებული ერების ორგანიზაციის და ევროკავშირის წარმომადგენლობებმა, ასევე საელჩოებმა, ლგბტქი+ ადამიანებს მხარდაჭერა სხვადასხვა ფორმით გამოუცხადეს.

პოლიტიკური პარტიების დოკუმენტი

პოლიტიკურმა პარტიებმა ლგბტქი+ უფლებებზე პოლიტიკურ შეთანხმებას მოაწერა ხელი.

მათი თქმით, საქართველოში არსებული ჰომოფობიური და ტრანსფობიური განწყობების გათვალისწინებით, მნიშვნელოვანია, რომ პოლიტიკურ პარტიებში არსებობდეს ერთიანი პოზიცია ლესბოსელი, გეი, ბისექსუალი, ტრანსგენდერი და ქვიარ ადამიანების ფუნდამენტური უფლებების შესახებ.

Tbilisi Pride-მა სწორედ ამ მიზნით მიმართა ყველა ძირითად პროდასავლურ პოლიტიკურ პარტიას საქართველოში და 15 პოლიტიკური გაერთიანება შეთანხმდა, რომ თითოეული მათგანი:

• მათ ხელთ არსებული ყველა მექანიზმის გამოყენებით, იბრძოლებს ქვიარ ადამიანების მიმართ არსებული დისკრიმინაციისა და ძალადობის აღმოსაფხვრელად;
• დაიცავს თითოეული მოქალაქის შეკრებისა და გამოხატვის თავისუფლებას, განურჩევლად სექსუალური ორიენტაციისა და გენდერული იდენტობისა; 
• არ დაუშვებს პოლიტიკურ პროცესში ჰომოფობიის ნიადაგზე სოციალური შუღლის გაღვივებასა და სიძულვილის ენის გამოყენებას. 

“იმედს ვიტოვებთ, რომ ეს შეთანხმება იქნება გარდამტეხი მომენტი ქართულ პოლიტიკურ სივრცეში და ერთობლივი ძალისხმევით ავაშენებთ უფრო დეკოკრატიულ და ადამიანზე ორიენტირებულ სახელმწიფოს”, – ამბობენ ორგანიზაციაში. 

ხელმომწერებს შორისაა: ნაციონალური მოძრაობა, ევროპული საქართველო, ლელო, სტრატეგია აღმაშენებელი, რესპუბლიკური პარტია, გირჩი, გირჩი – მეტი თავისუფლება, კანონი და სამართალი, პროგრესი და თავისუფლება, დროა, სამართლიანობისთვის, თავისუფალი დემოკრატები, რეფორმერი, ერთიანი საქართველო, გამარჯვებული საქართველო. 

შეთანხმებას არ შეუერთდა მმართველი გუნდი “ქართული ოცნება”. დოკუმენტზე ხელმოუწერობის მიზეზი პარტიაში არ განუმარტავთ.

“ქვეყანაში არსებული პოლიტიკური კრიზისის მიუხედავად, მოხარულები ვართ, რომ 15 პოლიტიკურ პარტიას აღმოაჩნდა მზაობა, სიმბოლური, თუმცა უმნიშვნელოვანესი პოლიტიკური განაცხადის გასაკეთებლად.

ჰომოფობია არის ფართო საზოგადოებრივი გამოწვევა, ამიტომ განსაკუთრებით მნიშვნელოვანია, რომ პოლიტიკოსები იდგნენ ადამიანის ფუნდამენტური უფლებების სადარაჯოზე“, – წერია ორგანიზაციის ფეისბუქ-გვერდზე.

საელჩოების, UN-ის და EU-ს ერთობლივი განცხადება

ერთობლივი განცხადებით ლგბტქი+ თემს მხარდაჭერა გამოუცხადეს საქართველოში გაერთიანებული ერების ორგანიზაციის და ევროკავშირის წარმომადგენლობებმა და საელჩოებმა.

განცხადებაში ნათქვამია, რომ ისინი 17 მაისს, ჰომოფობიის, ბიფობიისა და ტრანსფობიის წინააღმდეგ ბრძოლის საერთაშორისო დღეს (IDAHOBIT) უცხადებენ მხარდაჭერას და სოლიდარობას ლესბოსელ, გეი, ბისექსუალ, ტრანსგენდერ, ქვიარ და ინტერსექს (ლგბტქი+) თემს საქართველოში და ერთიანდებიან, რათა ყველამ იცხოვროს თავისუფალ და თანასწორ გარემოში უსაფრთხოდ და ღირსეულად.

“ლგბტქი+ ადამიანები საქართველოში კვლავ აწყდებიან სტიგმებს, შემცირებულ შესაძლებლობებს პოლიტიკური, სოციალური და ეკონომიკური ჩართულობის თვალსაზრისით, ასევე ხდებიან ძალადობრივი ზიზღის, სიძულვილის და დანაშაულის მსხვერპლი”, – აღნიშნულია განცხადებაში.

_________________________________

• ორი აქცია კანცელარიასთან: ერთმანეთს ლგბტ-პრაიდის მომხრეები და მოწინააღმდეგეები დაუპირისპირდნენ
• “არასოდეს ვიცი, სახლში ცოცხალი დავბრუნდები თუ არა”
● ცხოვრება სიძულვილის გარემოში. რას ჰყვებიან ლგბტ ადამიანების მშობლები

_________________________________

რა მოხდა

Tbilisi Pride-ის ორგანიზებით თბილისში ლბტქი+ ადამიანების დღეებთან დაკავშირებით სხვადასხვა ღონისძიებები იმართება. პირველ ინსტალაციას, რომელიც დედაენის ბაღში მოეწყო, უკვე მოჰყვა ინციდენტი – 15 მაისს აქტივისტებმა ჰომოფობიასა და ტრანსფობიასთან ბრძოლის დღესთან დაკავშირებით პერფორმანსი მოაწყვეს – ადგილზე მიიტანეს ცისარტყელას ფერებში მოხატული ინსტალაცია Welcome to the Closet, რომელშიც მუსიკა იყო ჩართული.

ჰომოფობიური და ქსენოფობიური მოძრაობის ლიდერმა, გურამ ფალავანდიშვილმა ინსტალაცია დააზიანა და თავს დაესხა აქტივისტებს, რის შემდეგაც ის შსს-მ დაკითხვაზე გადაიყვანა. საქმეს ძალადობით ან ძალადობის მუქარით დევნის მუხლით იძიებენ.

ორგანიზაციაTbilisi Pride ძალადობას ამ ფოტოთი გამოეხმაურა: “ჩვენი პასუხი ყოველთვის სიყვარულია!” – დაწერეს მათ.

_________________________________

● ადამიანი, რომელიც ლესბოსელ წყვილს თავს დაესხა, სასამართლომ გირაოთი გაათავისუფლა
● ლევან ვასაძის თქმით, მალე მისი მოძრაობა პოლიტიკურ პარტიად გარდაიქმნება

________________________________

17 მაისს ეკლესია ოჯახის სიწმინდის დღეს აღნიშნავს

17 მაისს მსოფლიოში ჰომოფობიასთან და ტრანსფობიასთან ბრძოლის დღეს აღნიშნავენ. თუმცა, 2014 წლიდან საქართველოს მართლმადიდებელი ეკლესია 17 მაისს ოჯახის სიწმინდის დღეს აღნიშნავს. 

საპატრიარქოს განცხადებით, 17 მაისს, 11:00 საათზე, შეიკრიბებიან ყოვლადწმინდა სამების საპატრიარქო ტაძარში და ისევე, როგორც ერთი წლის წინ, დედაქალაქს დალოცავენ. მსვლელობის მონაწილეები თბილისის ქუჩებს, სავარაუდოდ, ისევ ჯიპებით და სკუტერებით შემოივლიან და ნაკურთს წყალს მოასხურებენ.

CRRC-ის კვლევა

CRRC-ის მიერ ჩატარებული კვლევის თანახმად, ლგბტ ადამიანების მიმართ ტოლერანტობის დონე საქართველოში ძალიან დაბალია.

ჰომოსექსუალებთან არა თუ პირად, არამედ საქმიან ურთიერთობებსაც კი არ ისურვებდა გამოკითხულთა 70 პროცენტი. მხოლოდ 22-მა პროცენტმა უპასუხა ამ კითხვას დადებითად. გამოკითხვის ფარგლებში მონაწილეებს სთხოვეს დაესახელებინათ ის ჯგუფები, რომლებსაც მეზობლებად არ ისურვებდნენ.

ნარკოდამოკიდებულების (67%) და კრიმინალების (67%) შემდეგ გამოკითხულებმა ლგბტ ადამიანები დაასახელეს – მათ მეზობლად არ ისურვებდა გამოკითხულთა 54 პროცენტი.

ყველაზე ტოლერანტულები გამოკითხულები შეზღუდული შესაძლებლობების პირების მიმართ აღმოჩნდნენ – მხოლოდ ერთმა პროცენტმა თქვა, რომ ასეთ ადამიანებს მეზობლად არ ისურვებდა.