ვიქნები პრემიერ-მინისტრი მაქსიმუმ 2 წელი - მიხეილ სააკაშვილის მიმართვა

საქართველოს ექსპრეზიდენტმა, მიხეილ სააკაშვილმა, რომელიც გაერთიანებულმა ოპოზიციამ პრემიერ-მინისტრობის კანდიდატად დაასახელა, ვიდეო-მიმართვა გაავრცელა, სადაც განაცხადა, რომ მზად არის, გახდეს საქართველოს პრემიერ-მინისტრი, მაგრამ არასრული ვადით და საკუთარ გეგმებზეც ისაუბრა. 

ჩვენ მოგიყვებით, რა იყო ყველაზე მთავარი მის გამოსვლაში და რა შეფასებები მოჰყვა ექსპრეზიდენტის მიმართვას პოლიტიკურ სპექტრსა და საზოგადოებაში. 

სააკაშვილმა, რომელიც ოპოზიციურმა კოალიცია “ძალა ერთობაშიამ” პრემიერ-მინისტრობის კანდიდატად დაასახელა, განაცხადა, რომ ის პრემიერობას არასრული ვადით, მხოლოდ 2 წლით აპირებს:

“მინდა გითხრათ, რომ მზად ვარ ვიტვირთო ეს ფუნქცია, არა იმიტომ, რომ ხელისუფლებაში მოვიდე და ხელისუფლება მენატრება. ნამდვილად არ მენატრება და მინდა გითხრათ, რომ პრემიერი ვიქნები არასრული ვადით, მაქსიმუმ 2 წელიწადი. ეს იქნება საკმარისი, რათა ქვეყანა ამოვათრიოთ ჭაობიდან და წინ წავიდეთ.”

ქვეყნის ჭაობიდან ამოთრევისთვის, სააკაშვილს კონკრეტული გეგმაც აქვს. 

ექსპრეზიდენტის გეგმა

მიმართვაში მან განაცხადა, რომ საკუთარ თავზე გამოსცადა, რას ნიშნავს უსამართლო სასამართლო და მთელი აქცენტი მართლმსაჯულების სისტემის რეფორმაზე გააკეთა.  

სააკაშვილის განცხადებით, ივანიშვილის დამარცხების შემდეგ, სამართალდამცავი უწყებების ხელმძღვანელებს ერთპიროვნულად ვერავინ დააკომპლექტებს – ისინი ხალხისა და პოლიტიკური სპექტრის, სამოქალაქო საზოგადოების ფართო კონსენსუსით დაინიშნებიან.

უფრო კონკრეტულად კი, სააკაშვილის გაპრემიერების შემთხვევაში:

● ქვეყანაში ჩამოვლენ უცხოელი მოსამართლეები;

● შსს-ს პოლიციის ფუნქცია ფორმალურად დარჩება; 

● სასჯელაღსრულების სისტემა გამოეყოფა იუსტიციის სამინისტროს და მისი ხელმძღვანელს პარლამენტი დანიშნავს; 

● პარლამენტის ადამიანის უფლებათა დაცვის კომიტეტის ხელმძღვანელის თანამდებობასაც ოპოზიციის წარმომადგენელი ჩაიბარებს. 

როდის დაბრუნდება საქართველოში?

ეს არის კითხვა, რომელიც საზოგადოებას და ექსპრეზიდენტის მომხრეებს ყველაზე მეტად აინტერესებთ. 

მიმართვაში სააკაშვილს დაბრუნების კონკრეტულ თარიღზე არაფერი უთქვამს. სააკაშვილი აცხადებს, რომ მისთვის მთავარია, რომ მისმა დაბრუნებამ ქვეყანაში არეულობა და დაპირისპირება არ გამოიწვიოს. 

“მე ჩამოვალ ისეთ პირობებში, რომელიც არ გამოიწვევს დაპირისპირებას და არეულობას, ძალიან მნიშვნელოვანია, რომ ყველაფერი იყოს მშვიდობიანად. ნამდვილად არ ვაპირებ არეულობით ხელისუფლებაში მოსვლას, მაგრამ ის, რომ საქართველო გადასარჩენია, ამაზე ყველაზე ვთანხმდებით”, – ამბობს ის. 

რბოლა წინაღობებით – ბარიერები სამშობლოში დაბრუნების გზაზე

რამდენად რეალურია სააკაშვილის ჩამოსვლა საქართველოში და მისი გაპრემიერება? ამაზე ფართო მსჯელობა ოპოზიციურ სპექტრში ჯერ არ დაწყებულა. მის წინაშე არსებულ წინაღობებზე არ უსაუბრია არც ექსპრეზიდენტს. 

მიხეილ სააკაშვილი არ არის საქართველოს მოქალაქე. საქართველოს კონსტიტუციის თანახმად კი პრემიერ-მინისტრის თანამდებობას ვერ დაიკავებს ადამიანი, რომელიც საქართველოს მოქალაქე არ არის. 

უკრაინის მოქალაქეობა სააკაშვილს სხვა მხრივაც უშლის ხელს: საარჩევნო კოდექსის თანახმად, უცხო ქვეყნის მოქალაქეს საარჩევნო კამპანიაში მონაწილეობის უფლება არ აქვს.

არსებობს კიდევ ერთი წინაღობა. მიხეილ სააკაშვილზე საქართველოს ხელისუფლებას ძებნა აქვს გამოცხადებული. მას საქართველოში დაუსწრებლად აქვს მისჯილი პატიმრობა სანდრო გირგვლიანის მკვლელობისა და დეპუტატ ვალერი გელაშვილის ცემის საქმეებზე. საქართველოს კანონმდებლობით კი პატიმრობაში მყოფ და ნასამართლევ ადამიანს საჯარო სამსახურში მუშაობა ეკრძალება. 

• მოსაზრება: სააკაშვილის “მესამედ მოსვლა” უკრაინაში

• უკრაინული მიშა

“ნაციონალურ მოძრაობაში” ამბობენ, რომ ამ პრობლემებზე უკვე ნაფიქრი აქვთ და მათი გამარჯვების შემთხვევაში, კანონში ცვლილებებს შეიტანენ და სააკაშვილის მოქალაქეობის და ნასამართლეობის საკითხებს ოპოზიცია სანანონმდებლო გზით მოაგვარებს. მოინახება თუ არა პოლიტიკური გამოსავალი საქართველოში ექსპრეზიდენტის უმტკივნეულო დაბრუნებისთვის, ეს ამ ეტაპზე ცხადი არ არის. 

საზოგადოების და პოლიტიკოსების შეფასებები

მმართველი პარტიის – „ქართული ოცნების“ წარმომადგენლები სააკაშვილის განცხადებას საქართველოში და ქართულ პოლიტიკაში მისი დაბრუნებას შესახებ კომიკურს უწოდებენ.

“მომავალში სააკაშვილს ვხედავ გულმოდგინე, ენერგიულ ტუსაღად, რომელიც ძალიან შრომისმოყვარე კაცია, რომელიც კერავს იქ ქუდებს, ხელთათმანებს. კანონი უნდა აღსრულდეს, მისჯილი აქვს და აუცილებლად მოხვდება პენიტენციურ დაწესებულებაში, შემდეგ თუ რამე მართლაც არის, შეიძლება სამკურნალო დაწესებულებაში გადავიდეს,“ – ამბობს უმრავლესობის წევრი, ნუკრი ქანთარია.

ქანთარიას ეთანხმება იუსტიციის მინისტრი, თეა წულუკიანიც.

„თუ ის გადაწყვეტს ჩამოსვლას, ჩამობრძანდეს, არ არის პრობლემა. მას ელოდება სისხლის სამართლის პასუხისმგებლობა,“ – ამბობს წულუკიანი. 

“მიხეილ სააკაშვილის დამოკიდებულება პროპორციულ სისტემაზე და კოალიციურ მმართველობაზე არის ნიშანი, რომ მას უნდა უკან დაბრუნება და ჩნდება ეჭვები, რომ სურს ერთპიროვნული მმართველობა. ქვეყანას კი სჭირდება გარდამტეხი ცვლილებები და წინსვლა და არა უკან დაბრუნება,” – ამბობს “ევროპული საქართველოს” ლიდერი, გიგა ბოკერია. 

“ერთადერთი, ვისაც საქართველოში მიხეილ სააკაშვილის დაბრუნების დაანონსება უხარია, “ქართული ოცნებაა”. ეს არის ისევ ყავლგასული ორპოლუსიანობის პოლიტიკური სპექტაკლი, რომელსაც გვთავაზობს ეს ორი პარტია,” – ამბობს “ლელო საქართველოსთვის” წევრი, ლევან კობერიძე.  

“სააკაშვილი პატივს არ სცემს საკუთარ ამომრჩეველს. თვლის, რომ რასაც აჭმევს, იმას შეჭამენ. წინააღმდეგ შემთხვევაში, ისეთ  გაუგებარ აჯაფსანდალს არ მოუმზადებდა ამ საარჩევნოდ, რასაც უმზადებს და იმას მაინც ეტყოდა, კონკრეტულად როდის და რა ვითარებაში აპირებს ჩამოსვლას,” – წერენ ფეისბუკზე.