რუსულ კანონს საქართველოს პარლამენტი, სავარაუდოდ, 17 მაისს დაამტკიცებს
რუსულ კანონს 17 მაისს დაამტკიცებენ
რუსული კანონს, რომელიც ბიუროს სხდომაზე 8 აპრილს დაარეგისტრირეს, პლენარულ სხდომაზე მესამე მოსმენით, სავარაუდოდ, 17 მაისს გაიტანენ. ინფორმაცია პარლამენტის საიტზე განთავსდა.
პარლამენტის ვებგვერდის თანახმად, საკომიტეტო მოსმენა ორშაბათს, 15 აპრილს არის დაგეგმილი, პლენარულ სხდომაზე კი პირველი მოსმენის სავარაუდო თარიღი 16 აპრილი, მესამე მოსმენის კი — 17 მაისია.
15 აპრილს, საკომიტეტო მოსმენის პარალელურად, თბილისში საპროტესტო აქცია იგეგმება.
17 მაისი ჰომოფობიასა და ტრანსფობიასთან ბრძოლის საერთაშორისო დღეა. ამ დღეს მსოფლიოს ბევრ ქვეყანაში ლგბტქ+ ადამიანები ეკონომიკური და სოციალური თანასწორობისთვის საბრძოლველად გამოდიან. საქართველოში, წლების მანძილზე თავს ესხმოდნენ ქვიარ უფლებებისთვის მებრძოლ აქტივისტებს სხვადასხვა ძალადობრივი და პრორუსული, ჰომოფობიური ჯგუფები.
ამ დღის მნიშვნელობის საპირწონედ, 2014 წელს 17 მაისი ეკლესიამ ოჯახის სიწმინდის დაცვის დღედ გამოაცხადა. ამ დღეს სასულიერო პირები და მრევლი მსვლელობას აწყობენ, სამებაში ფეხით ადიან და იქ პატრიარქის დალოცვას იღებენ.
● 3 აპრილს ცნობილი გახდა, რომ არასამთავრობო ორგანიზაციების “ფინანსების გამჭვირვალობაზე” მმართველი პარტია რუსულ კანონს ხელახლა აინიციირებს. ამის შესახებ “ქართული ოცნების” ფრაქციის თავმჯდომარემ, მამუკა მდინარაძემ სპეციალურ ბრიფინგზე განაცხადა.
● ხელისუფლების მთავარი არგუმენტი მდგომარეობს იმაში, რომ საქართველოში მოქმედი არასამთავრობო ორგანიზაციების გამჭვირვალობა კითხვის ნიშნის ქვეშ დგას, რაც საფრთხეს უქმნის ქვეყნის უსაფრთხოებას. თუმცა, ამ არგუმენტის არც დამოუკიდებელ ექსპერტებს, არც ოპოზიციას და არც სამოქალაქო საზოგადოებას არ სჯერა. ექსპერტები აღნიშნავენ, რომ ამგვარად “ქართული ოცნება” ხელისუფლებაში ყოფნის გახანგრძლივებას ცდილობს და ნიადაგს იმზადებს 2024 წლის ოქტომბრის საპარლამენტო არჩევნებისთვის, რათა ალტერნატიული აზრი ქვეყანაში ჩაახშოს.
● ერთხელ ე.წ. უცხოელი აგენტების შესახებ კანონი საქართველოს მმართველმა პარტიამ უკვე დააინიციირა ზუსტად ერთი წლის წინ – გასული წლის მარტში. მაშინ კანონი პირველი მოსმენით პარლამენტში მიიღეს კიდეც, თუმცა “ოცნება” იძულებული გახდა კანონი გაეწვია, რადგან თბილისი მრავალათასიანმა პროტესტმა მოიცვა. ათასობით ადამიანი რამდენიმე დღის განმავლობაში აპროტესტებდა აღნიშნული კანონის მიღებას, რომელსაც საქართველოში “რუსული კანონი” უწოდეს, რადგან იგი რუსეთში მიღებული კანონის ანალოგია.
