რუსი ბლოგერი ალექსეი რომანოვი საქართველოში არ შემოუშვეს
რუსი ბლოგერი საქართველოში არ შემოუშვეს
რუსი ბლოგერი ალექსეი რომანოვი Facebook-ის საკუთარ გვერდზე წერს, რომ საქართველოში არ შემოუშვეს. ბლოგერის განმარტებით, ის სომხეთის გავლით საქართველოში მოდიოდა, თუმცა სადახლოს გამშვებ პუნქტზე, მას ქვეყანაში შესვლაზე უარი უთხრეს.
რომანოვის თქმით, 6-საათიანი ლოდინის შემდეგ მას გადასცეს დოკუმენტი, რომელიც ასახავს საქართველოში შემოსვლაზე უარის თქმის გადაწყვეტილებას.
“დოკუმენტში ჩამოთვლილია უარის ყველა შესაძლო მიზეზი:
- დოკუმენტების არასრული ნაკრები
- არასწორი დოკუმენტები საქართველოში
- პირის ყოფნის საფრთხე სახელმწიფო უსაფრთხოებისთვის
- პირს არ გადაუხდია ჯარიმა, მას არ აქვს დაზღვევა, მისი ყოფნა არ არის სასურველი საერთაშორისო პოლიტიკის გამო, დაარღვია საქართველოში უცხო ქვეყნის მოქალაქეების მიმართ წესები ან აპირებს რომ აღნიშნული წესები დაარღვიოს.
ვფიქრობ, რომ ჩემი საქართველოში არშეშვება ჩემს რეპორტაჟებს უკავშირდება, რომლებიც საქართველოში შემოდგომაზე გადავიღე, როდესაც ხალხი მიხეილ სააკაშვილის გათავისუფლების მოთხოვნით აქციებზე გადიოდა. მიშა, ერთი ქართველი ოლიგარქისთვის, ყელში გაჭედილი მთავარი ძვალია”, – წერს ის.
ალექსეი რომანოვმა რუსეთი 2016 წელს დატოვა და ოჯახთან ერთად საცხოვრებლად საქართველოში გადმოვიდა. რუსეთის დატოვებას ბლოგერი მთავრობის ზეწოლით ხსნიდა და ამბობდა, რომ მისი დევნა უკავშირდება ხელისუფლების მიმართ კრიტიკული ინტერნეტ-არხის შექმნას. რომანოვი რუსეთში 2019 წელს დაბრუნდა.
2020 წელს ალექსეი რომანოვი ხაბაროვსკში დააკავეს და ბრალი დასდეს ადმინისტრაციულ სამართალდარღვევაში – “საჯარო ღონისძიებების ჩატარების წესების დარღვევა.”
ის YouTube-ზე საკუთარი არხით მხარის გუბერნატორ სერგეი ფურგალის დაპატიმრებით გამოწვეულ საპროტესტო აქციებს აშუქებდა.
აღსანიშნავია, რომ 16 ივნისს საქართველომ არ შემოუშვა საზღვარზე ყაბარდო-ბალყარელი ბლოგერი, ინსა ლანდერი, რომლის წინააღმდეგ რუსეთში სისხლისსამართლებრივი დევნა მიმდინარეობს.
როდესაც ლანდერმა საზღვრის გადაკვეთა სცადა, ქართველმა მესაზღვრეებმა ის დააკავეს, კაბინეტში შეიყვანეს და ორი საათის განმავლობაში კითხავდნენ. საბოლოოდ მას მისცეს დოკუმენტი, სადაც ეწერა, რომ საზღვრის გადაკვეთაზე უარს ეუბნებოდნენ “სხვა მიზეზების გამო”.
ბოლო თვეებში, რუსეთიდან და სხვა ქვეყნებიდან კრემლის ბევრ კრიტიკოსს უთხრეს უარი საქართველოში შემოშვებაზე – მიზეზების ახსნის გარეშე.
რუსული ოპოზიციური ტელეკომპანია „დოჟდის“ ჟურნალისტმა მიხაილ ფიშმანმა 5 მარტს, საქართველოში თავისი წარუმატებელი მოგზაურობის დეტალების შესახებ ისაუბრა. ის ქვეყანაში არ შემოუშვეს და თბილისის საერთაშორისო აეროპორტიდან უკან გააბრუნეს. საზღვარზე ფიშმანს უარის მიზეზები არ განუმარტეს.
31 იანვარს, საქართველოში არ შემოუშვეს რუსი ოპოზიციონერი დმიტრი გუდკოვი. მანამდე საქართველოში არ შემოუშვეს რუსი პოლიტიკოსი ლუბოვ სობოლი და ჟურნალისტი ილია აზარი, ასევე, უკრაინელი ჟურნალისტი დმიტრი გორდონი.
საქართველოს საზღვრიდან უკან გააბრუნეს რუსული დამოუკიდებელი აქტივისტური მედიაჯგუფის, “მედიაზონის” ჟურნალისტი დევიდ ფრენკელიც.
გარდა ამისა, ასევე მიზეზების ყოველგვარი ახსნის გარეშე საქართველოში არ შემოუშვეს რამდენიმე რუსული ოპოზიციური პარტიის წარმომადგენელი, რომლებიც საჯარო საქმიანობას არ ეწევიან და მათი სახელები უცნობია ფართო საზოგადოებისთვის. ამასთან დაკავშირებით არანაირ კომენტარს არ აკეთებენ არც სამართალდამცავ სტრუქტურებში და არც საქართველოს მთავრობაში.
