რუსეთის გადაწყვეტილებამ სავალდებულო ტესტების შესახებ, შესაძლოა, აფხაზეთი ტურისტების გარეშე დატოვოს

კორონავირუსის პანდემიის გამო რუსეთის მიერ დაწესებული საზღვრის გადაკვეთის ახალი წესები, აფხაზეთს ტურისტული სეზონის ჩავარდნით ემუქრება. ამას გარდა, გაურკვეველია, როგორ შეძლებენ რუსეთში შესვლას აფხაზეთის მცხოვრებლები, რომლებსაც რუსული პასპორტები აქვთ. ჯერჯერობით ამაზე პასუხი ხელისუფლებასაც არ აქვს. ამ დროისთვის აფხაზეთის მცხოვრებლებიც და ტურისტებიც საზღვარს თავისუფლად კვეთენ, ყველანაირი დამატებითი მოთხოვნების გარეშე, მაგრამ ეს ნებისმიერ მომენტში შეიძლება შეიცვალოს.

15 აპრილიდან მოყოლებული, რუსეთში ნებისმიერი სატრანსპორტო საშუალებით დაბრუნებისას, მოქალაქეები ვალდებული არიან ჩააბარონ PCR-ტესტი კორონავირუსზე. ამისათვის გამოყოფილია სამი კალენდარული დღე. ასეთი გადაწყვეტილება მიიღო „როსპოტრებნადზორმა“ – რუსულმა უწყებამ, რომელიც პასუხისმგებელია მომხმარებელთა უფლებებზე და უფლებამოსილია დააწესოს სანიტარული და სხვა ტიპის შეზღუდვები. 

• საოკუპაციო ხაზს მიღმა მცხოვრები ადამიანებისთვის 5-დღიანი კარანტინი გაუქმდა
• რუსი ტურისტების რიგი აფხაზეთში
• მოსაზრება: აფხაზეთის ეკონომიკას ძნელბედობის ჟამი დაუდგა

უწყების ინსტაგრამის ოფიციალურ ანგარიშზე გამოქვეყნებული ამ ინფორმაციის ქვეშ, მომხმარებლებმა იმ კითხვების დასმა დაიწყეს, რომელიც ყველაზე მეტად აწუხებთ. ამრიგად, ბევრმა დააზუსტა, საჭიროა თუ არა ტესტირება აფხაზეთიდან დაბრუნების შემთხვევაში. უწყებაში უპასუხეს: „მათ შორის აფხაზეთიდანაც“. 

ეს ჯერჯერობით უწყების ერთადერთი ოფიციალური კომენტარია. 

რუსი ტურისტები ჯერჯერობით კვლავინდებურად ისე შედიან აფხაზეთში და გადიან, რომ მათგან არაფერს ითხოვენ. მაგრამ „როსპოტრებნადზორის“ ცხელ ხაზზე მოქალაქეებს პასუხობენ, რომ აფხაზეთიდან დაბრუნების შემთხვევაშიც საჭიროა PCR-ტესტის ჩაბარება. 

სოციალური ქსელების აფხაზურ სეგმენტში, „როსპოტრებნადზორის“ გადაწყვეტილებას არაერთგვაროვანი გამოხმაურება მოჰყვა. ერთნი დაინტერესდნენ, როგორ გადავლენ ორმაგი მოქალაქეების მქონე აფხაზეთის მცხოვრებლები საზღვარზე, მეორენი – რა ელის ტურისტულ სფეროს. 

აფხაზური ტურისტული კომპანიის, „აბგაზ 999“-ის ექსკურსიამძღოლმა, ლინდა ამპარმა განაცხადა, რომ უკვე 15 აპრილს, ექვსი ტურისტული ავტობუსიდან, რომლებიც აფხაზეთში შესვლას გეგმავდნენ, ამის გაკეთება მხოლოდ ორმა მოახერხა. 

„დღეს, აფხაზეთში ტურისტების ჩამოყვანა ვერ მოვახერხე, იმიტომ რომ, როდესაც ჩვენი ავტობუსები რუსეთიდან შემოდიოდნენ, რუსულ მხარეს მყოფმა მესაზღვრეებმა ტურისტებს უთხრეს, რომ ერთდღიანი ექსკურსიის შემთხვევაშიც, მათ აუცილებლად მოუწევთ PCR-ტესტების ჩაბარება, სამი დღე იზოლაციაში მოცდა, წინააღმდეგ შემთხვევაში კი 15 ათასი რუბლის (დაახლოებით, 200 დოლარის) ოდენობის ჯარიმის გადახდა. ადამიანები სვამდნენ კითხვას – ვინ გადაიხდის PCR-ის საფასურს? ის 2500 რუბლი (32 დოლარი) ღირს, ეს უფრო ძვირია, ვიდრე მათი ექსკურსია ჯდება. მოკლედ, ჩვენ ჯერჯერობით გაურკვევლობაში ვართ“, – ამბობს ამპარი. 

ამასთან, ლინდა ამპარის თქმით, როდესაც აფხაზი მძღოლები და გიდები კვეთდნენ საზღვარს რუსეთის ფედერაციის მიმართულებით, არანაირი სირთულე არ შექმნიათ – ისინი ამას აფხაზური პასპორტით აკეთებდნენ.

ექსკურსიამძღოლის განცხადებით, ეს ძალიან აქტიური წელია ტურიზმის სფეროში. სეზონებს შორის პერიოდში სტუმრების რაოდენობამ, ზაფხულის რეკორდებიც კი დაამხო. ტურიზმის გარდა არის სხვა სფეროები, რომლებზეც ასევე აისახება მსგავსი გადაწყვეტილება. 

პარტნიორობა „აფხაზური პროექტების“ კოორდინატორი და ბლოგერი კირილ ბაზილევსი ფეისბუკის საკუთარ გვერდზე, საკმაოდ ხისტად გამოეხმაურა „როსპოტრებნადზორის“ გადაწყვეტილებას და უწყების ხელმძღვანელები გააკრიტიკა. 

„ისეთი შთაბეჭდილება მრჩება, რომ ამ უწყებაში ერთად მოიყარეს თავი იდიოტებმა და მტრის აგენტებმა, რომელთა მთავარი ამოცანაც, რუსებისთვის ცხოვრების რაც შეიძლება მეტად გართულებაა. სრულიად შეუძლებელია იმის გაგება, რაზეა დაფუძნებული ესა თუ ის კონკრეტული გადაწყვეტილება, მაგრამ სრულიად ნათელია, რომ ეს ხალხი არც კი ფიქრობს, როგორ განხორციელდება მათი გადაწყვეტილებები პრაქტიკაში“, – წერს ბაზილევსკი.

ჯერჯერობით, შექმნილ სიტუაციასთან დაკავშირებით კითხვები უფრო მეტია, ვიდრე პასუხები. აფხაზეთის საგარეო საქმეთა სამინისტროში განაცხადეს, რომ ხელისუფლება ახლა ახორციელებს სამუშაოებს იმის გასარკვევად, როგორ აისახება „როსპოტრებნადზორის“ გადაწყვეტილება აფხაზეთზე. 

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო