რუსეთის დუმის საერთაშორისო საქმეთა კომიტეტი განცხადებას ავრცელებს და საქართველოს ხელისუფლებას რუსეთის წინააღმდეგ დაწესებულ სანქციებთან დაკავშირებულ პოლიტიკას უწონებს. მათი თქმით, საქართველო მოქმედებს სწორად და გაბედულად, გამომდინარე იქიდან, რომ არ აჰყვა “ანტირუსულ ისტერიას” და საკუთარი ეროვნული ინტერესების შესაბამისად მოქმედება ამჯობინა.
“როგორიც არ უნდა იყოს სირთულეები მოსკოვსა და თბილისს შორის ურთიერთობაში, საქართველოს ამჟამინდელმა ხელისუფლებამ იპოვა გამბედაობა, არ აჰყვეს ანტირუსულ ისტერიას და იხელმძღვანელოს, პირველ რიგში, ეროვნულ ინტერესებსა და საკუთარი მოქალაქეების კეთილდღეობაზე ორიენტირებული პოზიციით.
სწორედ პრიორიტეტების სწორმა არჩევანმა განაპირობა, რომ, საქართველოს ეკონომიკა სწრაფად იზრდება და ზედიზედ ორი წელია ორნიშნა ზრდას აჩვენებს. სხვათა შორის, რუს ტურისტებს კარგი შემოსავალი შეაქვთ ქვეყანაში”, – წერია დუმის საერთაშორისო საქმეების კომიტეტის განცხადებაში.
განსხვავებით საქართველოს მთავრობის მიმართ დაფიქსირებული პოზიციისა, რუსეთის დუმა გავრცელებულ განცხადებაში მწვავედ აკრიტიკებს ევროკავშირის პოლიტიკას რუსეთის წინააღმდეგ დაწესებული სანქციების გამო:
“ამავდროულად, ევროკავშირი განაგრძობს სანქციების მე-12 პაკეტზე მუშაობას, რითაც გამოხატავს საკუთარ მანიაკალურ სურვილს გაანადგუროს ჩვენი ეკონომიკა ლურსმნების, თხილისა და ღილების ექსპორტის აკრძალვით. მსგავსი შორსმჭვრეტელი ევროპელი ლიდერების გამო, ევროპა ყველა სფეროში არსებული დეგრადაციის კლინიკური ნიშნებით პალატა N6-ად იქცა.
როგორც ჩანს, ეს ყოველივე საკმაოდ გადამდებია. პოლიტიკური დემენციის მეტასტაზებმა კიევს მიაღწიეს, რეალობის შეგრძნება სრულიად დაკარგეს და სერიოზულად განიხილავენ, უკრაინისთვის უცხო ტერიტორიაზე, ყირიმში ქალაქების სახელების შეცვლის საკითხს.”
რას ითვალისწინებს ევროკავშირის სანქციების მეთორმეტე პაკეტი
Bloomberg-ის ინფორმაციით, რუსეთის წინააღმდეგ ევროკავშირის სანქციების მე-12 პაკეტით გათვალისწინებული საექსპორტო-საიმპორტო შეზღუდვების საერთო მოცულობა 5,3 მლრდ დოლარს შეადგენს.
სააგენტოს ცნობით, ექსპორტის შეზღუდვები გავლენას მოახდენს შედუღების აპარატებზე, ქიმიურ ნივთიერებებზე, თავდაცვის ტექნოლოგიებსა და პროგრამული უზრუნველყოფის ლიცენზირებაზე. იმპორტის შეზღუდვები, სხვა საკითხებთან ერთად, ლითონსა და ალუმინის ნაწარმს შეეხება.
მე-12 პაკეტის მიზანია, რუსეთის მიერ მესამე ქვეყნების მეშვეობით სანქციების გვერდის ავლა/აღმოფხვრას. გამოცემის წყაროები ამბობენ, რომ ამასთან დაკავშირებით სანქციების პაკეტს შესაძლოა, მესამე ქვეყნების კომპანიები დაემატოს, თუ მათი ხელმძღვანელობა რუსეთის წინააღმდეგ მკაცრ ზომებს არ მიიღებს. სააგენტო აღნიშნავს, რომ საუბარია უცხოურ კომპანიებზე, რომელთა დახმარებითაც რუსეთი იარაღის წარმოებისთვის საჭირო საქონელსა და ტექნოლოგიებს მოიპოვებს.
ევროკავშირი, ასევე, განიხილავს სანქციებს, რომლებიც მიზნად ისახავს რუსეთის მიერ ნავთობის ფასზე 60-დოლარიანი ზღვრის დაცვას. საერთაშორისო ენერგეტიკის სააგენტოს მონაცემებით, სექტემბერში რუსული ნავთობის საშუალო ფასი ბარელზე 81,8 დოლარს შეადგენდა, ამიტომ, Bloomberg-ის ცნობით, ევროკავშირი სანქციების ქვეშ მყოფი საზღვაო გემებთან ტრანზაქციების აკრძალვას აპირებს, ასევე, გემის გაყიდვაზე შეტყობინებას მოითხოვს და ახალი კონტრაქტის დებულებებს შემოიღებს, რომლებიც დადგენილ ლიმიტზე მეტ ფასში მიწოდებას აკრძალავს.
მე-12 პაკეტში დამატებით 100 ფიზიკური და 40 იურიდიული პირი მოხვდება.
2022 წლის 24 თებერვალს რუსეთის უკრაინაში შეჭრის შემდეგ, ბევრმა ქვეყანამ – აშშ-მ, ევროკავშირის ქვეყნებმა, დიდმა ბრიტანეთმა, იაპონიამ, ავსტრალიამ და ა.შ. – რუსეთის წინააღმდეგ სანქციების რამდენიმე პაკეტი შემოიღო – როგორც კოლექტიური, ასევე ცალმხრივი.
სანქციები ეხება ფინანსურ, ენერგეტიკულ და სატრანსპორტო სექტორს, ექსპორტსა და იმპორტს, სავიზო პოლიტიკას. სანქციები დაუწესდათ ჩინოვნიკებს, ოლიგარქებსა და პუტინთან დაახლოებულ პირებს. დასავლურ სამყაროს იმედი აქვს, რომ რუსეთის მთავრობა ამ წნეხს ვერ გაუძლებს და უკრაინის წინააღმდეგ ომს შეწყვეტს.
საქართველოს რუსეთისთვის სანქციები არ დაუწესებია. მეტიც, 24 თებერვლიდან დღემდე, საქართველოს ხელისუფლების წევრები ხაზგასმით იმეორებენ, რომ საქართველო დასავლეთის მიერ დაწესებულ სანქციებს არ უერთდება. უკრაინა საქართველოს ამ პოზიციით უკმაყოფილოა და ამას ღიად გამოხატავს.
ამასთან, საქართველოს პრეზიდენტმა და ცალკეულმა უწყებებმა არაერთხელ აღნიშნეს, რომ საქართველო იცავს რუსეთის წინააღმდეგ დაწესებულ სანქციებს და არავის დაეხმარება მათ თავიდან აცილებაში.
