"რუსეთი დაჭრილი დათვია, რომელმაც გონება დაკარგა" - კომენტარი ბაქოდან
რუსეთის მიმდინარე ომი უკრაინის სუვერენიტეტისა და ტერიტორიული მთლიანობის წინააღმდეგ საფრთხის შემცველია რუსეთის ფედერაციის მოსაზღვრე ყველა ქვეყნისთვის, პირველ რიგში, პოსტსაბჭოთა ქვეყნებისთვის. ვიდრე მოსკოვი ტერიტორიებზე ძალებს სინჯავს, ის სახიფათოდ რჩება ყველა მოსაზღვრე სახელმწიფოსთვის, – მიიჩნევს აზერბაიჯანელი პოლიტიკოსი ნატიკ ჯაფარლი.
„გუშინ პუტინი რუსეთის ახალგაზრდა მეცნიერებსა და ბიზნესმენებს შეხვდა და თავი პეტრე დიდს შეადარა. მისი თქმით, გზა დიდი სახელმწიფოსკენ ტერიტორიების გაზრდაზე გადის (ფაქტობრივად, სხვების ოკუპაციაზე). მან ქვეყნის სუვერენიტეტი და სიდიადე ტერიტორიის ფართობით გაზომა“, – აცხადებს აზერბაიჯანის ოპოზიციური პარტიის, “რესპუბლიკური ალტერნატივის” ერთ-ერთი ლიდერი ნატიკ ჯაფარლი.
მისი აზრით, ეს ტიპიური იმპერიული ლოგიკაა და საფრთხის შემცველია მთელი პოსტსაბჭოთა სივრცისთვის.
„დღეს საშუალო რუსი იგივე პუტინია, მოსახლეობის აბსოლუტური უმრავლესობა ასე ფიქრობს. ხალხი იმდენად „დაპროგრამებულია“, რომ მათ არ სურთ მიიღონ, რომ დიდ სახელმწიფოდ, „იმპერიად“, ეკონომიკის განვითარებითა და მოსახლეობის კეთილდღეობით უნდა იქცე.
ტერიტორიების ზრდას არავითარი კავშირი არ აქვს ქვეყნის კეთილდღეობასთან და განვითარებასთან. „იმპერიის“ თანამედროვე მოდელს შეიძლება ეწოდოს, მაგალითად, სამხრეთ კორეა.
მოდით შევადაროთ:
1. 1991 წელს, როცა სსრკ-ს დაშლის შემდეგ რუსეთი დამოუკიდებელი სახელმწიფო გახდა, მისი მშპ 517 მილიარდ დოლარს შეადგენდა. შემდეგ იყო მკვეთრი კლება და 1996 წელს ეს მაჩვენებელი მხოლოდ 396 მილიარდი დოლარი იყო.
იმავე წელს, 1991 წელს, სამხრეთ კორეის მშპ იყო $367 მილიარდი, მაგრამ 1996 წელს ის გაიზარდა $597 მილიარდამდე.
2. შემდგომ პერიოდში დაიწყო რუსეთის მშპ-ს ზრდა და 2021 წლისთვის მიაღწია 1 ტრილიონ 780 მილიარდ დოლარს.
იმავე წელს სამხრეთ კორეის მშპ 1 ტრილიონ 800 მილიარდი დოლარი იყო.
3. სტატისტიკის მიხედვით 2021 წელს რუსეთის მოსახლეობა 145 მილიონ 557 ათასი ადამიანი იყო, მშპ ერთ სულ მოსახლეზე 12 200 დოლარი იყო.
იმავე პერიოდში სამხრეთ კორეას ჰყავდა 51 780 000 მოსახლე და მშპ ერთ სულ მოსახლეზე 34 865 დოლარი იყო.
როგორც ხედავთ, რუსეთი ამ მაჩვენებლით სამჯერ ჩამორჩება სამხრეთ კორეას.
4. რუსეთის ექსპორტმა 2021 წელს 491 მილიარდ 600 მილიონი დოლარი შეადგინა და აქედან 60 პროცენტი ნავთობსა და ბუნებრივი აირზე მოდის.
იმავე წელს სამხრეთ კორეამ 644 მილიარდ 540 მილიონი დოლარის პროდუქცია გაიტანა. მაგრამ მთელი ექსპორტი ეკონომიკის რეალური სექტორის პროდუქციისგან, ტექნოლოგიური პროდუქტებისგან შედგება.
5. მიუხედავად მთელი ბუნებრივი რესურსისა, სანქციებამდელ პერიოდში რუსეთის ოქროსა და სავალუტო რეზერვები მხოლოდ 630 მილიარდ დოლარს შეადგენდა, აქედან 300 მილიარდი ახლა „გაყინულია“.
სამხრეთ კორეის ოქროს და სავალუტო რეზერვები 452 მილიარდ 300 მილიონ დოლარს შეადგენს.
სინამდვილეში, რუსეთი უბედური ქვეყანაა და, მიუხედავად მისი უთვალავი ბუნებრივი რესურსისა და უზარმაზარი ტერიტორიისა, ვერ გახდება დიდი სახელმწიფო.
რუსეთში სიდიადე ტერიტორიის ფართობით იზომება. ნორმალური სისტემა რომ ყოფილიყო, რუსეთის ფედერაციის მოქალაქეები ამერიკელებზე ხუთჯერ უკეთესად იცხოვრებდნენ, თავად რუსეთი კი მდიდარი და ავტორიტეტული ქვეყანა იქნებოდა.
სამხრეთ კორეის ტერიტორია 170-ჯერ უფრო მცირეა, ვიდრე რუსეთის, მოსახლეობა სამჯერ მცირეა, მაგრამ ის არის ნამდვილი თანამედროვე “იმპერია”. მას დიდი ტერიტორიები არ აქვს, მაგრამ ბაზრებს იპყრობს. ის იპყრობს არა ტერიტორიებს, არამედ ჩვენს ავტოფარეხებს, ჯიბეებს, ბინებს.
სანამ საშუალო რუსი პუტინის მსგავსად ფიქრობს, სანამ მოსკოვი თავის სიდიადეს ტერიტორიების სიდიდით აფასებს, ის კვლავ იქნება რეალური საფრთხე მეზობლებისთვის, პოსტსაბჭოთა ქვეყნებისთვის.
და ამ მიზეზით აზერბაიჯანმა უნდა გააფართოოს და გააძლიეროს თავისი „დე იურე“ და „დე ფაქტო“ მოკავშირული ურთიერთობები, გააღრმაოს ინტეგრაციის შეთანხმებები მოძმე თურქეთთან.
ჩრდილოეთში ყოველთვის გვყავდა დათვი, დღეს კი ის დაჭრილი დათვია, რომელმაც გონება დაკარგა“, – წერს ჯაფარლი ფეისბუქის საკუთარ გვერდზე.
