რუსეთში კონსტიტუცია შეიცვალა - ახლა პუტინი სამუდამოდ დარჩება ხელისუფლებაში
2020 წლის 1 ივლისს ჩატარებული საყოველთაო კენჭისყრის შემდეგ, რუსეთში, კონსტიტუცია შეუქცევადად შეიცვალა. ძირითადი შედეგი – 68 წლის პრეზიდენტმა ვლადიმირ პუტინმა მიიღო შესაძლებლობა, კიდევ 16 წლის განმავლობაში დარჩეს ხელისუფლებაში.
ერთიან პაკეტად შემოთავაზებულ 269 ცვლილებას მკაცრად აკრიტიკებდნენ თავად რუსეთსა და მის ფარგლებს გარეთაც. კენჭისყრა მიმდინარეობდა დამკვირვებლების არარსებობისა და ძალიან უცნაურ პირობებში – ავტომობილების საბარგულებსა და ტყეში.
ოფიციალური მონაცემებით, ცვლილებებს მხარი დაუჭირა ამომრჩეველთა 77.92%-მა, წინააღმდეგ წავიდა – 21.27%. ამომრჩეველთა აქტივობამ 65% შეადგინა.
დამოუკიდებელი მედია, ექსპერტების დიდი ნაწილი და საზოგადოების ბევრი წარმომადგენელი კენჭისყრის არალეგიტიმურობასა და ფალსიფიცირებაზე საუბრობს.
რა შეიცვალა რუსეთისთვის?
მთავარი ცვლილება – ყველა წინა საპრეზიდენტო ვადის განულება და ნებისმიერისთვის უფლების მიცემა, კენჭი იყაროს პრეზიდენტის პოსტზე, როგორც პირველად.
ეს ნიშნავს, რომ მოქმედი პრეზიდენტი ვლადიმირ პუტინი, რომელიც უკვე 20 წელზე მეტია ხელისუფლებაშია, კიდევ ორჯერ შეძლებს კენჭისყრას და ამ პოსტზე 2036 წლამდე დარჩება.
ასევე, დიდი ყურადღება მიიპყრო და სკანდალი გამოიწვია შემდეგმა ცვლილებებმა:
• რუსი ხალხი – „სახელმწიფოს შემქმნელია“, ამიტომ რუსული ენა განსაკუთრებულ სტატუსს იძენს;
• ქორწინება – ესაა მამაკაცსა და ქალს შორის კავშირი;
• ქვეყნის ძირითად კანონში შემოდის ღმერთის ცნება: „წინაპართა ხსოვნა, რომელიც ღმერთმა გვიანდერძა“.
კენჭისყრის ყველაზე აქტიური მონაწილეები გახდნენ ჩეჩნეთისა და ტუვის რესპუბლიკის მცხოვრებლები. ისინი არიან ლიდერები იმ ხალხთა შორისაც, რომლებმაც პასუხი „დიახ“ დააფიქსირეს.
რუსეთის ფედერაციაში ერთადერთი რეგიონი, რომელმაც ცვლილებების წინააღმდეგ მისცა ხმა – ნენთა ავტონომიური ოლქია. მოსკოვშიც არის ცალკეული უბნები, სადაც ცვლილებების მოწინააღმდეგეებმა გაიმარჯვეს.
• იზოლაციის აღლუმი: როგორ ჩაიარა მოსკოვში მეორე მსოფლიო ომში გამარჯვების 75 წლისთავმა
• კორონავირუსის უცნაური სტატისტიკა რუსეთში: კარგი მედიცინა თუ პუტინის ხელისუფლებაში დარჩენის სურვილი?
• „შეიყვარო კადიროვი“ – ჩეჩნეთის ლიდერს რუს ბლოგერებთან ერთად „იუმორისტულ“ ვიდეოებში იღებენ
რატომ არიან დარწმუნებული დამოუკიდებელი ექსპერტები და ჟურნალისტები, რომ კენჭისყრა გაყალბებულია?
რუსეთში არ არსებობს კანონი, რომელშიც ნახსენებია „საყოველთაო კენჭისყრა“.
დამკვირვებლები და ჟურნალისტები საარჩევნო უბნებზე არ დაიშვებოდნენ. განაცხადეს, რომ ეს ზომა კორონავირუსის პანდემიის პირობებში, უსაფრთხოების უზრუნველსაყოფად მიიღეს.
სოციალურ ქსელებსა და მედიაში, კენჭისყრას სპექტაკლს ადარებენ.
ოპოზიციონერი აქტივისტი დმიტრი გუდკოვი, როგორც ბევრი სხვა ადამიანი, მთელი კვირის განმავლობაში, სანამ კენჭისყრა მიმდინარეობდა, მოსკოვსა და პეტერბურგში, საარჩევნო უბნების გამოსასვლელებში გამოკითხვას აწარმოებდა და ამ ეგზიტპოლებს ცენტრალური საარჩევნო კომისიის შედეგებს ადარებდა.
„პუტინმა ნამდვილად წააგო, როგორც მინიმუმ, რუსეთის ამ ორ უმთავრეს ქალაქში, მაგრამ სხვა რეგიონებშიც იკვეთება სურათი“, – განუცხადა მან გამოცემა „ნასტოიაშჩეე ვრემიას“.
მოსკოვსა და პეტერბურგში, მთელი კვირის განმავლობაში, ერთკაციანი პიკეტები იმართებოდა, რადგან კორონავირუსის პანდემიის გამო, ნებისმიერი თავყრილობა აკრძალულია. მაგრამ პიკეტებში არც ისე ბევრი ადამიანი მონაწილეობდა, სხვადასხვა დათვლით, 500 კაცამდე.
მოსკოვში, კენჭისყრის ბოლო დღეს, პოლიციამ წითელ მოედანზე მოწყობილი ერთგვარი პროტესტის მონაწილეები დააკავა – ადამიანები მიწაზე იწვნენ და საკუთარი სხეულებით პუტინის უფლებამოსილების დასრულების წელს – 2036-ს – გამოსახავდნენ.
სპეციალურად ამ კენჭისყრისათვის შექმნილ „დარღვევების რუკაზე“, 1 ივლისის ღამით, 1 800-ზე მეტი შეტყობინება იყო დაფიქსირებული. მედიასა და სოციალურ ქსელებში ამის დამადასტურებელი ფოტო- და ვიდეომასალა ქვეყნდება.
ქალაქ სარანსკში, ურნაში ბიულეტენების ჩაყრის პროცესი, შემთხვევით, პირდაპირ ეთერში აჩვენეს, კენჭისყრის შესახებ მომზადებული ტელერეპორტაჟისას.
ყველაზე ხშირად ადამიანები ნახულობდნენ, რომ მათ ნაცვლად უკვე მისცეს ხმა. ასევე, დამკვირვებლები ჩიოდნენ, რომ მათ უბნებიდან აძევებდნენ და მუშაობაში ხელს უშლიდნენ.
ასევე, ფიქსირდებოდა სამუშაო ადგილებზე ადამიანების კენჭისყრაში მონაწილეობის მასობრივი იძულების ფაქტები და ამომრჩეველთა მოსყიდვა პირდაპირ საარჩევნო უბნებზე.
აგრეთვე, რუსეთის ყველა მოქალაქეს, რომელსაც 16 წლამდე ასაკის შვილი ჰყავს, კენჭისყრის დღეს, 10 ათასი რუბლი (დაახლოებით, 140$) ანგარიშზე ჩაერიცხა.
ამავდროულად, ყველას ესმის, რომ ოფიციალურად ამ ყველაფერს დარღვევებსაც ვერ დაარქმევ, რამდენადაც კენჭისყრა საარჩევნო კანონმდებლობით არ რეგულირდებოდა.
კომენტარი
ალექსეი ნავალნი, რუსული ოპოზიციის ერთ-ერთი ლიდერი
„პუტინმა უბრალოდ ყველა დაამცირა. ჩვენ აფრიკაზე უარესად გამოვიყურებით. ასეთი სამარცხვინო ამბავი მესამე მსოფლიოს ქვეყნების უდიდეს ნაწილშიც არ ხდება. და ჩვენ არასოდეს ვაღიარებთ ამ შედეგებს.
კენჭისყრა ყალბია, მაგრამ ის გახდა ნათელი კონსტატაცია იმისა, რაც ქვეყანაში ხდება – ვლადიმირ პუტინმა თავის კორუმპირებულ მეგობრებსა და თანამებრძოლებთან ერთად, უკანონოდ დაისაკუთრა ძალაუფლება და სურს, რუსეთის სამუდამო მმართველი იყოს.
რამდენიმე ქვეყანამ ზუსტად ანალოგიურად გაანულა ვადები (ტაჯიკეთი, უზბეკეთი, პერუ, ბურკინა-ფასო, სენეგალი, ბურუნდი – ნავალნის სია).
და ყველა მათგანს ერთი საერთო აქვს: ეს არის ჩამორჩენილი, განუვითარებელი ქვეყნები ძალიან ღარიბი მოსახლეობით. ეს ქვეყნები დეგრადაციას განიცდიან. იქ მიზერული ხელფასებია. მოსახლეობა უკეთესი ცხოვრების მოსაძებნად იქაურობას ტოვებს.
და მცირედითაც არ მეპარება ეჭვი, რომ პუტინს ჩვენ ამ გზით მივყავართ. (…)
ცვლილებების ყველა შანსი, პირველ რიგში, დაკავშირებულია მხოლოდ თითოეული ჩვენგანის სააგიტაციო მუშაობასთან.
ყველაზე აქტიურებისა და ყველაზე ნორმალურების 20%-მა უნდა გადაარწმუნოს ის 20%, რომელიც ტელევიზორთან ზის. ამას პუტინის რეიტინგის ისეთი ვარდნა მოჰყვება, როგორსაც მისი რეჟიმი ვერ გაუძლებს.
ეს კარგად უნდა გვესმოდეს.
რეჟიმის საფუძველს წარმოადგენს მოსყიდული მოსამართლეები და პოლიციელები, პროპაგანდისტები, არჩევნების გაყალბება, მაგრამ, პირველ რიგში – რეალური ადამიანები გამორეცხილი ტვინებით. ისინი აძლევენ პუტინს მხარდაჭერის რეიტინგს, ხმებს და, როგორც მას მიაჩნია, ჩვენი ხმების წართმევის უფლებას.
სწორედ ამ რეიტინგის საფუძველზე მართავს პუტინი“.
