ენმ, გახარიას გუნდი, გირჩი, ლელო, დროა, ახალი - რომელი პარტიების აკრძალვას აპირებს ოცნება
რომელი პარტიების აკრძალვას აპირებს ოცნება
საქართველოს პრემიერმინისტრმა ირაკლი კობახიძემ ჟურნალისტის კითხვას, რომელი პარტიების აკრძალვას აპირებს მმართველი პარტია ქართული ოცნება, მკაფიო ჩამონათვალით უპასუხა: ენმ, ახალი, გირჩი, დროა, ლელო და გახარია საქართველოსთვის.
ჟურნალისტის კითხვაზე, თუ რა რეაქცია ექნება დასავლეთს საქართველოში ერთპარტიულად დარჩენილ პარლამენტზე და შეუშლის თუ არა ეს ხელს ევროინტეგრაციას, პრემიერი პასუხობს, რომ მოლდოვის პარლამენტის ერთპარტიულობაზე არავინ არაფერს ამბობს და იგივე განმეორდება საქართველოშიც.
მისივე თქმით, ნაციონალური მოძრაობის პარტიის აკრძალვის შემდეგ, ლოგიკური გაგრძელება მათი მანდატების აკრძალვაც იქნება.
რა თქვა ირაკლი კობახიძემ
“არის თვითონ ნაცმოძრაობა, რომელშიც შედის დამატებით რამდენიმე პარტია, ერთად გამოდიან ამ არჩევნებში.
ასევე, თქვენ იცით, რომ კოლექტიურ ნაცმორაობას განეკუთვნება ახალი, გირჩი, დროა. ყველა ამ პოლიტიკოსს, ლიდერს აქვს წარსული პირდაპირ დაკავშირებული ნაცმოძრაობასთან და ყველა ამ პოლიტიკოსს აქვს თავისი აწმყო დაკავშირებული ნაცმოძრაობასთან.
ასევე, თქვენ მოგეხსენებათ, რომ არის ასეთი გაერთიანება ლელო, რომელიც პირდაპირ იყო ჩართული ბიზნეს რეკეტში და ეს უნდა იყოს გამოძიების ერთ-ერთი საგანი პირდაპირ, ნაცმოძრაობის რეჟიმთან ერთად […]
გახარია, რომელსაც აქვს შექმნილი კოალიცია ნაცმოძრაობასთან 4 მუნიციპალიტეტში, ხო? პირდაპირ ალიანსშია კრიმინალურ პოლიტიკურ ძალასთან. ეს არის ერთი კოლექტიური კრიმინალური პოლიტიკური ძალა, რომელიც აუცილებლად უნდა გასამართლდეს. დანარჩენზე გადაწყვეტილებას მიიღებენ შესაბამისი ინსტანციები.
მანდატების გაუქმება შეუძლია მარტო საკონსტიტუციო სასამართლოს ჩვენი მოქმედი კონსტიტუციის თანახმად. მე ვფიქრობ, რომ პარტიის აკრძალვის ლოგიკური გაგრძელება იქნება, ბუნებრივია, მანდატების გაუქმებაც. არ შეიძლება დანაშაულებრივი პოლიტიკური ძალის დამნაშავე წევრები სარგებლობდნენ ისეთი სტატუსით, როგორიც არის საქართველოს პარლამენტის წევრობა…
პარლამენტი დარჩება დემოკრატიულად არჩეული, სადაც ქართულ ოცნებას ექნება საკონსტიტუციო უმრავლესობა, ეს არის მნიშვნელოვანი”. – ამბობს კობახიძე.
მანამდე ირაკლი კობახიძემ განაცხადა, რომ პოლიტიკური პარტიების აკრძალვა “დემოკრატიული პროცესია”. მისი თქმით, როდესაც არსებობს “ყველა სამართლებრივი საფუძველი”, დემოკრატიულ სახელმწიფოში “ასე უნდა ხდებოდეს”.
კობახიძის მტკიცებით, პოლიტიკური პარტიები “ერთმანეთის მიყოლებით” იკრძალება უკრაინასა და მოლდოვაშიც, რასაც მისი თქმით, ევროკავშირი პოზიტიურად აფასებს.
ქართული ოცნების პოლიტსაბჭოს განცხადებით, რაც შემდეგ ბიძინა ივანიშვილმაც გაიმეორა, მმართველ გუნდს საკონსტიტუციო უმრავლესობა მათ შორის იმიტომაც სჭირდება, რომ დააინიცირონ სამართლებრივი პროცესი, “რომლის შედეგადაც ერთიანი ნაციონალური მოძრაობა და ყველა მისი სატელიტი თუ მემკვიდრე პარტია არაკონსტიტუციურად გამოცხადდება”.
