როგორ მოვხვდეთ ამერიკული უნივერსიტეტის მაგისტრატურაზე. რჩევები ფულბრაითის სტიპენდიატისგან
რამდენიმე დღეში თავისუფალი უნივერსიტეტის კურსდამთავრებული, 24 წლის გუგა ბურდული ამერიკაში, ფილადელფიაში წავა, სადაც Temple University-ში კომპიუტერულ მონაცემთა მეცნიერების პროგრამაზე ორწლიან მაგისტრატურას გაივლის.
გუგა ფულბრაითის პროგრამის წლევანდელი გამარჯვებულია. ის ორი წლის განმავლობაში, ამერიკაში სწავლისას „საქართველოს ბანკისგან“ მიიღებს სრულ დაფინანსებას, მათ შორის სტიპენდიას.
ფულბრაითის სტიპენდია აშშ-ის მთავრობის ერთ-ერთ ყველაზე პრესტიჟული პროგრამაა მთელს მსოფლიოში. სტუდენტი, რომელიც ამ პროგრამაში მოხვდება, ისწავლის აშშ-ის უნივერსიტეტში სამაგისტრო პროგრამაზე და სწავლა სრულად დაუფინანსდება. საქართველოში პროგრამის თანადამფინანსებელია საქართველოს ბანკი.
„საქართველოს ბანკი“ უკვე 6 წელია თანამშრომლობს საქართველოში აშშ-ის საელჩოსთან. ყოველ წელს ბანკი ფულბრაითის სტიპენდიანტებს შორის ერთ-ერთს გამოარჩევს და პროგრამის ფარგლებში მის სწავლას აფინანსებს. „საქართველოს ბანკის“ დაფინანსებით აშშ-ში უკვე ისწავლა ექვსმა ქართველმა სტუდენტმა.
წელს, ფულბრაითის ათ სტიპენდიანტს შორის „საქართველოს ბანკმა“ ყოფილი კომაროველი და თავისუფალი უნივერსიტეტის ყოფილი სტუდენტი გუგა ბურდული გამოარჩია.
გუგა უყვება JAMnews-ს როგორ გახდა ამერიკული პროგრამის გამარჯვებული და რა უნდა გაითვალისწინონ სტუდენტებმა, რომლებსაც საზღვარგარეთ სწავლის გაგრძელება უნდათ.
როგორ შევარჩიე სამაგისტრო პროგრამა
სამაგისტრო პროგრამის შერჩევას საკმაოდ დიდი დრო სჭირდება.
ყველაზე მეტი დრო მაინც იმაზე ფიქრს მიაქვს, თუ რისი სწავლა გინდა, რა მიმართულება გაინტერესებს. არჩევანი უზარმაზარია.
მე თავისუფალი უნივერსიტეტის ელექტრო და კომპიუტერული ინჟინერიის ფაკულტეტი დავამთავრე.
„თავისუფალ უნივერსიტეტში“ ოთხწლიანი სწავლის პერიოდშიც აქტიური ვიყავი სამეცნიერო საქმიანობაში. ჩემს ჯგუფელ არკადი აკოფიანთან და პროფესორ ვახტანგ ჯანდიერთან ერთად რამდენიმე სამეცნიერო სტატიაზე ვიმუშავე, დავდიოდი სამეცნიერო კონფერენციებზე.
შემდეგ ორი წელი თავისუფალ უნივერსიტეტსა და თავისუფალ სკოლაში ვმუშაობდი ლექტორად და მასწავლებლად. ვკითხულობ საგანს “შესავალი ციფრულ ტექნოლოგიებში”.
ვფიქრობ, რომ ეს ორი წელი მნიშვნელოვანი იყო, რადგან ამ ორმა წელმა საბოლოო ჯამში ჩამოაყალიბა ჩემი მომავალი პროფესია. გარკვეული გამოცდილების, ცოდნის და უნარ-ჩვევების გაერთიანება მოვახერხე და მივხვდი, რომ ყველაზე მეტად Data Science მაინტერესებს. შესაბამისად, მაგისტრატურისთვის უნივერსიტეტის ძებნაც ამ მიმართულებით დავიწყე და შევარჩიე ოთხი უნივერსიტეტი, სადაც სწავლას გავაგრძელებდი.
შემდეგ შევავსე ფულბრაითის აპლიკაცია, სადაც ეს ოთხი უნივერსიტეტი ჩავწერე.
შერჩევისას სისტემა ასეთია – ფულბრაითის პროგრამაში აპლიკაციის შევსების შემდეგ კიდევ სამი ეტაპია გასავლელი, რის შემდეგაც თვითონ ფულბრაითის წარმომადგენლები გზავნიან შენს მონაცემებს სხვადასხვა უნივერსიტეტებში, შენ მიერ შევსებული აპლიკაციის საფუძველზე.
კიდევ ერთხელ დიდი მადლობა ამ შესაძლებლობისთვის Fulbright -ის პროგრამასა და „საქართველოს ბანკს“.
მთავარი რჩევა მათთვის, ვისაც საზღვარგარეთ მაგისტრატურაში სწავლა უნდა
ისეთი განვითარებადი ქვეყნის მოქალაქეებისთვის, როგორიც საქართველოა, მაგისტრატურაზე სწავლის გაგრძელების ძალიან ბევრი შესაძლებლობა არსებობს.
არის უამრავი გრანტი ევროპის ბევრ სხვადასხვა უნივერსიტეტში. ერთ-ერთი გრანტი, რომლის მოპოვებაც მე შევძელი, არის სწორედ ფულბრაითი.
ამ გრანტის მოსაპოვებლად სამი ეტაპი გავიარე.
პირველი ეტაპი აპლიკაციის შევსებაა. ორი ესეა დასაწერი, რომლებშიც ჰყვები შენს გამოცდილებასა და სამომავლო მიზნებზე. ზოგადად, როდესაც უცხოური პროგრამისთვის ესეს წერთ, ეცადეთ მაქსიმალურად კარგად ახსნათ, თუ რატომ გინდათ ამ მიმართულებაზე სწავლა და რომ თქვენი სამომავლო მიზნებისთვის სწორედ ეს მიმართულებაა აუცილებელი.
მეორე ეტაპია გასაუბრება. აქ გეკითხებიან დეტალებს შენი აპლიკაციის შესახებ. რა მიზნები გაქვს მომავალში და რაში გამოგადგება ამა თუ იმ პროგრამაზე სწავლა. ეცადეთ არ დაიბნეთ და ყველაფერს გულწრფელი პასუხი გასცეთ. კარგად წაიკითხეთ თქვენი აპლიკაცია და ესე გასაუბრებამდე. ყველა დეტალს აქცევენ ყურადღებას.
მესამე ეტაპი ჯიარისა და ტოეფელის გამოცდების წერაა. ამ ეტაპისთვის მომზადება აუცილებლად აპლიკაციის შევსების დაწყებისთანავე დაიწყეთ. ტოეფელის გამოცდა ინგლისურის კარგად მცოდნე სტუდენტებს არ გაუჭირდებათ, რასაც ვერ ვიტყოდი ჯიარის გამოცდაზე. ამიტომ ჩემი რჩევა იქნება ამ გამოცდებისთვის მზადება რაც შეიძლება ადრე დაიწყოთ. [GRE – Graduate Record Examinations – ტესტი, რომელსაც აბარებენ ამერიკულ და ზოგიერთი სხვა ქვეყნის უმაღლეს სასწავლებლებში ასპირანტურაში, მაგისტრატურაში და ა.შ. ჩასარიცხად. ტესტი ამოწმებს სტუდენტის ენობრივ, მათემატიკურ და ანალიტიკურ შესაძლებლობებს, კრიტიკული აზროვნების უნარს].
რას ველოდები ამერიკაში სწავლისგან
ორი მთავარი რამე, რასაც ამერიკაში სწავლისგან ველი არის ჩემს სფეროში მაქსიმალურად კარგი ცოდნის მიღება და უამრავი საინტერესო ადამიანის გაცნობა.
მიმაჩნია, რომ ადამიანების გაცნობა ისევე მნიშვნელოვანია საბოლოო მიზნების მისაღწევად, როგორც ცოდნის მიღება.
გარდა ამისა, მივიღებ უცხო ქვეყანაში მარტო ცხოვრების გამოცდილებას, მექნება პრაქტიკა ინგლისურ ენაში და რაც ყველაზე მთავარია, მექნება საშუალება სტაჟირება გავიარო ჩემი მიმართულებით რომელიმე დიდ კომპანიაში.
ჩემი გეგმები
ყოველთვის მინდოდა მქონოდა ჩემი სკოლა. ეს სურვილი ნაწილობრივ ავიხდინე იმით, რომ ამ ორ წელიწადში თავისუფალი სკოლის განვითარებასა და ჩამოყალიბებაში მივიღე მონაწილეობა. გარდა მასწავლებლობისა, ვმუშაობდი როგორც პროექტების მენეჯერი, შესაბამისად მქონდა შანსი ჩემი იდეები განმეხორციელებინა. ის ვიცი, რომ მომავალში აუცილებლად მექნება შეხება ამ სკოლასთან.
საქართველში აუცილებლად დავბრუნდები და მინდა Data Science -ის მიმართულების არსებობაში შევიტანო წვლილი. ვფიქრობ ამ მიმართულებით ფაკულტეტის გაკეთებასაც, რადგან დღეს საქართველოში Data Science -ის სწავლის შესაძლებლობა არ არის. გარდა ამისა, მინდა მქონდეს საკუთარი კომპანია ამავე მიმართულებით.
