"ოცნება ახდა, მაგრამ შიშები დარჩა". ინალ ხაშიგის მოსაზრება - როგორ აღიქვეს „ქართული ოცნების“ გამარჯვება აფხაზეთში
როგორ აღიქვეს „ქართული ოცნების“ გამარჯვება აფხაზეთში
ადრე აფხაზეთი , დიდწილად, გულგრილი იყო ვინ მოვიდოდა საქართველოს ხელისუფლებაში, რადგან ქართულ-აფხაზური კონფლიქტის მოგვარების საკითხში, ქართველი პოლიტიკოსები თუ პოლიტიკური ძალები ნაკლებად განსხვავდებოდნენ ერთმანეთისგან. რა მნიშვნელობა აქვს, რომელი პარტია გაიმარჯვებს, თუ ყველა ზემოდან უყურებს აფხაზეთს?
მიუხედავად ამისა, ქართველი ლიდერების, ედუარდ შევარდნაძისა და მიხეილ სააკაშვილის სახელები, კარგად იყო ცნობილი აფხაზეთში (მკვეთრად ნეგატიურ კონტექსტში) და აფხაზური საზოგადოება დაინტერესებული იყო იმით, რაც ხდებოდა საქართველოში.
- რას ელიან აფხაზი პოლიტიკოსები საქართველოში საპარლამენტო არჩევნებისგან?
- “ქართული ოცნება” კონფედერაციის შესახებ | ხედვა აფხაზეთიდან
1992-93 წლების ქართულ-აფხაზური ომის ხსოვნა და საქართველოდან შურისძიების მუქარა “ჩეხოვის თოფივით” ეკიდა არაღიარებულ რესპუბლიკას, რომელიც სცენაზე რომ გამოჩნდებოდა, აუცილებლად გაისვროდა.
და გაისროლა 2008 წელს. მართალია, სამხრეთ ოსეთში. რის შემდეგაც, რუსეთმა აღიარა როგორც სამხრეთ ოსეთის, ისე აფხაზეთის დამოუკიდებლობა და აიღო მათი უსაფრთხოების გარანტიები.
იმ მომენტიდან კონფლიქტი „გაიყინა“. აფხაზებმა დაივიწყეს ომის განახლების შიში და მათი ინტერესი ქართული პოლიტიკის მიმართ თანდათან გაქრა.
თუმცა რუსეთ-უკრაინის ომის დაწყების შემდეგ, ვითარება ისევ შეიცვალა. დაიწყო საუბარი იმაზე, რომ საქართველოს შეეძლო მეორე ფრონტის გახსნა რუსეთის წინააღმდეგ და ეს კვლავ საფრთხეს შეუქმნიდა აფხაზეთის უსაფრთხოებას.
ბოლო ორი და მეტი წლის განმავლობაში, მმართველი პარტია „ქართული ოცნება“ დროდადრო აცხადებდა, რომ გარკვეული გარე ძალები მასზე ზეწოლას ახდენენ და კოფლიქტების გალღობას სთხოვდნენ. საპარლამენტო არჩევნების მოახლოებასთან ერთად კი პარტიის წინასაარჩევნო კამპანიაში დომინანტი გახდა თეზისი – „თუ “ოცნება” დამარცხდება, რუსეთთან ომი იქნება“.
თავად რუსეთში, ისევე როგორც აფხაზეთსა და სამხრეთ ოსეთში, ამას ეხმიანებოდნენ: დიახ, მშვიდობა და სტაბილურობა რეგიონში დამოკიდებულია იმაზე, რა არჩევანს გააკეთებენ ქართველები 2024 წლის 26 ოქტომბრის არჩევნებზე.
ამგვარად, პირველად, აფხაზეთის ხელისუფლებამ, ქართული პოლიტიკის კუთხით პრეფერენციები გამოაცხადა. გაჩნდა მოსაზრება, რომ თუ „ოცნება“ არჩევნებში გაიმარჯვებს, აფხაზეთი მშვიდად ისუნთქებს – უახლოეს მომავალში ომი არ იქნება.
ასე რომ, “ოცნება” ახდა. ანუ მან მოიგო.
თუმცა, აფხაზეთი არ იზიარებს კრემლის უპირობო კმაყოფილებას ამ გამარჯვებით.
მოსკოვსა და თბილისს შორის სულ უფრო მზარდი ურთიერთობები, შეუძლებელია არ აწუხებდეს აფხაზურ საზოგადოებას.
ხელისუფლება ამას საჯაროდ არ ამბობს, მაგრამ შიშობენ, რომ რუსეთ-საქართველოს ურთიერთობების დათბობამ შეიძლება მიაღწიოს იმ “ხარისხს”, რომელიც საფრთხეს შეუქმნის აფხაზეთის სუვერენიტეტს. მარტივად რომ ვთქვათ, ამ დათბობის კვალდაკვალ, რუსეთი აფხაზეთს „დაუთმობს“ საქართველოს.
უფრო მეტიც, „ტერიტორიული მთლიანობის აღდგენა“ არის „ქართული ოცნების“ ერთ-ერთი მთავარი არგუმენტი რუსეთთან ურთიერთობის დამყარების სასარგებლოდ და ერთ-ერთი მთავარი საარჩევნო დაპირება.
როგორ აღიქვეს „ქართული ოცნების“ გამარჯვება აფხაზეთში
