როდის და რა ვაქცინით აცრიან საქართველოს მოქალაქეებს. რა ვიცით ამ დროისთვის

ვაქცინაქციის დაწყებაზე საუბარი საქართველოში გასული წლის ბოლოდან დაიწყო, თუმცა ამ დრომდე კონკრეტული პასუხი, თუ რომელ ვაქცინას შემოიტანენ ქვეყანაში და როდის, არ არსებობს.

მეტიც, ხელისუფლების წარმომადგენლები და ქვეყნის მთავარი ინფექციონისტები ზოგ შემთხვევაში ურთიერთგამომრიცხავ ინფორმაციას ავრცელებენ, რაც დაბნეულობასთან ერთად, ზოგადად ზრდის უნდობლობას ვაქცინაციის მიმართ მოსახლეობაში, რომელიც ისედაც არ გამოირჩევა ვაქცინებისადმი დიდი ნდობით.

ვაქცინაციაზე მკაფიო პასუხის მოლოდინშია ასევე ათასობით მოქალაქე და ბიზნესი, რომლებსაც პანდემიამ და ქვეყნის ჩაკეტვამ დიდი ეკონომიკური პრობლემები მოუტანა.

საქართველოს მოსახლეობა 3 მილიონ 700 ათასია
სულ საქართველოში დადასტურებულია 244 612 შემთხვევა
აქედან:
● გარდაცვლილი – 2 867
● გამოჯანმრთელებული – 228 359
● აქტიური შემთხვევა (ანუ ახლა არიან ავად) – 13 360

რომელი ვაქცინა შემოვა საქართველოში?

თუ ხელისუფლების წარმომადგენლების კომენტარებს გადავხედავთ, დიდი ალბათობით, საქართველო მასობრივი ვაქცინაციისთვის ოქსფორდის ვაქცინა “ასტრაზენეკას” შემოტანას ფიქრობს, თუმცა რაიმე კონკრეტული გადაწყვეტილება ჯერ ამ მიმართულებით მიღებული არ არის.

გარდა ამისა, როგორც ჯანდაცვის სამინისტროს წარმომადგენლები ამბობენ, ქვეყანაში მცირე დოზით Pfizer-ის ვაქცინასაც ელოდებიან.

_____________________________________________

● აზერბაიჯანის მოსახლეობა ჩინური ვაქცინით აიცრება

● საქართველო კორონავირუსის მესამე ტალღისთვის ემზადება

● რა არის ცნობილი კორონავირუსის ვაქცინებზე, დაამარცხებენ თუ არა ისინი პანდემიას და როდის?

______________________________________________________________________________

ჯანდაცვის სამინისტროს ოფიციალური განცხადებები ვაქცინასთან დაკავშირებით:

13 იანვარს ჯანდაცვის მინისტრმა ეკატერინე ტიკარაძემ განაცხადა, რომ „კოვაქს პლატფორმამ“ უკვე დაადასტურა,  სამედიცინო პერსონალის ასაცრელად საქართველოს კოვიდის ვაქცინას მიაწვდის.

როდის მოხდება ეს, ტიკარაძეს კონკრეტულად არ უთქვამს.

მისი თქმით, წინასწარი ინფორმაციით, პირველ ეტაპზე საქართველო მიიღებს Pfizer-ის ვაქცინის 100 000 დოზას.

“ამ ეტაპზე საუბარია Pfizer-ის ვაქცინაზე, რაც არ გამორიცხავს, რომ უახლოეს მომავალში მას დაემატოს სხვა ვაქცინებიც. ამ შემთხვევაში გვაქვს მოლოდინი, რომ ასტრაზენეკაზე ხელმისაწვდომობაც გაუჩნდება ჩვენს მოქალაქეებს,” – განაცხადა მინისტრმა.

ჯანდაცვის მინისტრმა უარყო, რომ ამ ეტაპზე საქართველო განიხილავს ჩინური ვაქცინის შემოტანას: 

„ცალსახად ჩვენ ვსაუბრობთ ფაიზერის და ასტრაზენეკას ვაქცინაზე. ჩინურ ვაქცინას ამ პერიოდისთვის არ გააჩნია საკმარისი ინფორმაციული მასალა და სანდოობა. შესაბამისად, ჯანდაცვის სამინისტრო კატეგორიულად არ განიხილავს ამ ეტაპისთვის ჩინური ვაქცინის შემოტანას“. 

მანამდე, ჩინური ვაქცინის შესახებ ინფორმაცია ინფექციური პათოლოგიის, შიდსისა და კლინიკური იმუნოლოგიის ცენტრის გენერალურმა დირექტორმა, თენგიზ ცერცვაძემ გაავრცელა. ტელეკომპანია “ფორმულასთან” მან თქვა, რომ საქართველოში ორი ვაქცინის შემოტანა განიხილება – ბრიტანული „ასტრაზენეკასი“ და კიდევ ერთი ჩინური ვაქცინის.

„ჩინეთს აქვს ხუთი ვაქცინა და ერთ-ერთზე არის ლაპარაკი. მინდა გითხრათ, რომ მსოფლიოში ჩინური ვაქცინის რეიტინგი საკმაოდ მაღალია“, – უთხრა ცერცვაძემ „ფორმულას“.

სწორედ ეს განცხადება უარყო ტიკარაძემ.

„Pfizer”-ის ან „Moderna”-ს ვაქცინის შემოტანაზე საუბრისას, საქართველო ლოჯისტიკურ სიძნელეებსაც აწყდება. ამ ვაქცინების ტრანსპორტირება-შენახვისთვის სპეციალური, ძვირადღირებული მაცივრებია საჭირო, რომლებიც -80⁰ ან -20⁰ რეჟიმზე ყინავს. საქართველოს კი, ბევრი ასეთი მაცივარი არ აქვს, თუმცა როგორც დაავადებათა კონტროლის ცენტრის ხელმძღვანელის მოადგილე პაატა იმნაძე ამბობს, “ქვეყანას ამ წუთში „ფაიზერის“ ვაქცინის 200 ათასი დოზის მიღების შესაძლებლობა გააჩნია”.

გარდა ამისა, კომპანია “თეგეტა მოტორსმა” გაავრცელა განცხადება, რომ მზად არის, ქვეყანას დაეხმაროს Pfizer-ის ვაქცინის შემოტანაში და ამისთვის ხარისხიანი სამაცივრე ტრანსპორტი გამოყოს.

“ქართული ოცნების” ყოფილ დეპუტატი, ჯანდაცვის ექსპერტი აკაკი ზოიძე, რომელიც ვაქცინაციის საკითხებზე შექმნილ სამუშაო ჯგუფშია ჩართული, ამბობს, რომ ქვეყანა “ასტრაზენეკას” 500 ათასი დოზის შემოტანისთვის ემზადება.

“ორიენტაცია ახლა გვაქვს “ასტრაზენეკას” ვაქცინაზე, რომელსაც იმისათვის, რომ სამხრეთ კორეაში აწარმოონ, სჭირდენა ჯანმოს პრეკვალიფიკაცია. დეკემბერში მოსული წერილის მიხედვით, ასტრაზენეკას ვაქცინის 500 000 დოზა საქართველოსთვის ხელმისაწვდომი უნდა იყოს ადრე გაზაფხულზე”, – უთხრა აკაკი ზოიძემ ტელეკომპანია “ფორმულას”.  

ვინ აიცრება პირველ რიგში?

ჯანდაცვის მინისტრის განმარტებით, მსოფლიოს ნებისმიერი სხვა ქვეყნის მსგავსად, საქართველოც ვაქცინაციის პრიორიტეტებს მსოფლიო ჯანდაცვის ორგანიზაციასთან ათანხმებს.

შესაბამისად, ისევე როგორც ყველგან, საქართველოშიც პირველ რიგში, აიცრებიან ექიმები და სხვა სამედიცინო პერსონალი.

“მედიკოსები აღარ იქნებიან ვირუსის გატამტანი. ედიკოსების ვაქცინაცია, ასევე, მნიშვნელოვნად ზრდის სანდოობას მოსახლეობაში ვაქცინაციისთვის” – აღნიშნა ტიკარაძემ.

შემდეგ რიგში არიან ისეთი მოწყვლადი ჯგუფები, როგორიცაა ქრონიკული დაავადების მატარებლები და პენსიონერები.

რაც შეეხება დანარჩენ მოქალაქეებს, რომლებიც რისკ ჯგუფში არ არიან, როგორც დაავადებათა კონტროლის ცენტრის ხელმძღვანელის მოადგილე პაატა იმნაძე ამბობს, “ჩვეულებრივი ადამიანებისთვის ვაქცინა იქნება ზაფხულში ან შემოდგომის დასაწყისში”.

როდის მოხდება ვაქცინაცია?

კონკრეტულ თარიღს, თუ როდის გაუკეთდება პირველი ვაქცინა საქართველოს მოქალაქეს, ჯანდაცვის მინისტრი არ ასახელებს.

თუმცა, მან თქვა, რომ რაკი საქართველოს არ ჰყავს 100 ათასი მედიკოსი, აქედან გამომდინარე, პირველ ეტაპზე შემოტანილი ვაქცინა პროპორციულად განაწილდება სხვა რისკ ჯგუფებზეც გადანაწილდება.