"როდესაც ამბობენ, რომ პრემიერ-მინისტრი ფარსია, ეს ჩემთვის შეურაცხმყოფელია". ღარიბაშვილის წერილი დეოლიგარქიზაციაზე
ღარიბაშვილის წერილი დეოლიგარქიზაციაზე
12 ივნისის დილით საქართველოს პრემიერ-მინისტრმა ირაკლი ღარიბაშვილმა ფეისბუკის საკუთარ გვერდზე გამოაქვეყნა წერილი, სადაც აცხადებს, რომ მმართველი პარტია ყველა მიმდინარე თუ საკვანძო გადაწყვეტილებებს ბიძინა ივანიშვილთან კონსულტაციის და კარნახის გარეშე იღებს.
ამგვარად ღარიბაშვილი გამოეხმაურა ევროკავშირის მიერ, საქართველოსთვის გადაცემულ 12 პუნქტიან გეგმას, სადაც ერთ-ერთი საკითხი, რომელიც საქართველომ ევროკავშირის წევრობის კანდიდატის სტატუსის მოსაპოვებლად უნდა შეასრულოს, სწორედ დეოლიგარქიზაციაა.
საქართველოს უმდიდრესმა ადამიანმა ბიძინა ივანიშვილმა, რომელიც არის მმართველი პარტიის , “ქართული ოცნების” დამფუძნებელი და ქვეყნის ყოფილი პრემიერი, პოლიტიკიდან წასვლის შესახებ გადაწყვეტილება მიიღო, თუმცა საქართველოში თითქმის არავის ეპარება ეჭვი ქვეყანას რეალურად ჩრდილიდან მართავს ივანიშვილი და არა მთავრობა და მისი მეთაური.
ხელისუფლების ოპონენტები და ექსპერტები აღნიშნავენ, რომ “დეოლიგარქიზაციაში” იგულისხმება ივანიშვილის გავლენის შესუსტება საქართველოს ხელისუფლებაზე.
თავის წერილში ღარიბაშვილმა სწორედ ოპონენტებს უპასუხა და მოუწოდა განმარტონ, თუ რას გულისხმობენ, როდესაც ოლიგარქსა და დეოლიგარქიზაციაზე ლაპარაკობენ.
ღარიბაშვილის თქმით, საუბრები დეოლიგარქიზაციაზე არის საქართველოს “შიდა თუ გარე პოლიტიკური ოპონენტების მიერ აგორებული კამპანია”, რომლის მიზანია “საქართველოში მოქმედი მმართველობის სისტემის დისკრედიტირება”.
“როდესაც ჩვენი შიდა თუ გარე პოლიტიკური ოპონენტები დეოლიგარქიზაციაზე საუბრობენ, ბუნებრივია, ეს ჩემთვის განსაკუთრებით შეურაცხმყოფელია. კონსტიტუციური თეორიისა და პრაქტიკის მიხედვით, საპარლამენტო რესპუბლიკაში ქვეყნის პოლიტიკური ლიდერი პრემიერ-მინისტრია და ხალხის წინაშე მას ეკისრება პასუხისმგებლობა… როდესაც ვიღაც ამტკიცებს, რომ პრემიერ-მინისტრი ფარსის ნაწილია და სინამდვილეში იმ ადამიანისგან იმართება, რომელმაც გასული წლის იანვარში პოლიტიკიდან გასვლის გადაწყვეტილება მიიღო, ეს არა მხოლოდ მე, არამედ სახელმწიფოსაც შეურაცხყოფს,” – წერს ღარიბაშვილი.
მისი თქმით, ივანიშვილის ფაქტორი ქართულ პოლიტიკაში დიდია, თუმცა ისეთი საკვანძო გადაწყვეტილებებიც კი, როგორიცაა რუსეთისთვის სანქციების არდაწესება, “ქართული ოცნების” ხელისუფლებამ ივანიშვილთან კონსულტაციის გარეშე მიიღო.
“ჩემმა მეუღლემ მიიღო რჩევა ბიძინა ივანიშვილის მეუღლისგან”
წერილში ღარიბაშვილი ხსნის, თუ რა ურთიერთობა აქვს ივანიშვილთან და ამბობს, რომ ივანიშვილის ოჯახთან აქვს პერიოდული კომუნიკაცია.
„ქართუ ჯგუფში“ [ივანიშვილის კუთვნილი კომპანია_JAMnews] ღია კონკურსის გზით მოვხვდი და ბიძინა ივანიშვილიც სწორედ ასე გავიცანი. ბუნებრივია, როგორც „ქართუს“ საქველმოქმედო ფონდის დირექტორს, მასთან მჭიდრო ურთიერთობა მქონდა. მაშინ დამყარდა მეგობრული ურთიერთობაც ბიძინა ივანიშვილის ოჯახსა და ჩემს ოჯახს შორის, რითაც მთელი ჩემი ოჯახი განსაკუთრებულად ამაყობს”.
მისი თქმით, ის განსაკუთრებით ამაყობს ივანიშვილის ვაჟთან, ბერასთან პირადი მეგობრობით.
“საზოგადოებას მინდა განვუმარტო, რომ ამ ურთიერთობების გათვალისწინებით, ჩვენს ოჯახებს აქვთ პერიოდული კომუნიკაცია ერთმანეთთან. მაგალითად, ცოტა ხნის წინ, ჩემმა მეუღლემ მიიღო რჩევები ბიძინა ივანიშვილის მეუღლისგან გარკვეულ სამედიცინო საკითხთან დაკავშირებით. მსგავსი კომუნიკაცია ბიძინა ივანიშვილთან პერიოდულად მეც რომ მქონდეს, ბუნებრივია, ვერც ამაში იქნება რაიმე დასაძრახი”.
ქართუს გუნდი ხელისუფლებაში
წერილის დიდი ნაწილი დათმობილი აქვს იმაზე საუბარს, თუ როგორი წნეხის ქვეშ იყვნენ ივანიშვილის კუთვნილი კომპანიის – “ქართუ ჯგუფის” თანამშრომლები ძველი ხელისუფლების პერიოდში და როგორ მედგრად იბრძოლეს მათ სააკაშვილის რეჟიმის წინააღმდეგ.
ღარიბაშვილი წერილში ადასტურებს, რომ მთავრობის დიდი ნაწილი დღესაც სწორედ ივანიშვილის კუთვნილი ამ კომპანიის ყოფილი თანამშრომლებითაა დაკომპლექტებული.
“ქართუს” გუნდმა ბოლომდე იბრძოლა, ზეწოლას გაუძლო და მოძალადე რეჟიმი დაამარცხა… ქართუ ჯგუფის“ ნაწილი დღესაც ჩვენი პოლიტიკური გუნდის აქტიური წევრია”.
შსს-ს მოქმედი მინისტრი ვახტანგ გომელაური, სახელმწიფო უსაფრთხოების სამსახურის ხელმძღვანელი გრიგოლ ლილუაშვილი, სახელმწიფო დაცვის სპეციალური სამსახურის ხელმძღვანელი ანზორ ჩუბინიძე – ღარიბაშვილი წერილში აღნიშნავს მათ განსაკუთრებულ ღვაწლს წინა ხელისუფლების წინააღმდეგ ბრძოლაში.
ღარიბაშვილი წერილში ახსენებს ასევე “ქართუს” ყოფილ თანამშრომლებს, ყოფილ პრემიერს გიორგი კვირიკაშვილს და ეკონომიკის ყოფილ მინისტრს დიმიტრი ქუმსიშვილს, რომლებმაც ვერ გაუძლეს წინა ხელისუფლების ზეწოლას და “ქართუ” დატოვეს 2011 წელს. თუმცა, ღარიბაშვილი ამბობს, რომ ივანიშვილმა “კადრების დეფიციტის გამო, მათ პროფესიონალიზმი მაინც დაუფასა და 2012 წელს ისინი ახალ მთავრობაშიც კი მიიწვია”.
ამავე წერილში ღარიბაშვილი ამბობს, რომ არიან მინისტრები, რომლებსაც ივანიშვილი პირადად არ იცნობს. ასეთებად ღარიბაშვილმა თავდაცვის, საგარეო საქმეთა, იუსტიციის, ფინანსთა და ჯანდაცვის მინისტრები დაასახელა: “მათ ბიძინა ივანიშვილი არც კი შეხვედრია და არ იცნობს”.
ღარიბაშვილის თქმით, ივანშვილი არ იცნობს საპარლამენტო გუნდის ლიდერების დიდ ნაწილსაც.
“მათ შორის, პარლამენტის თავმჯდომარესთან და არაერთი საკვანძო კომიტეტის ხელმძღვანელთან, ბიძინა ივანიშვილი მხოლოდ საპარლამენტო არჩევნების წინ მათი წარდგენის დღეს არის შენახვედრი”.
“ასეთ დროს, საუბარი იმაზე, რომ ბიძინა ივანიშვილი მთავრობასა და პარლამენტს მართავს და აკონტროლებს, სრული ფარსი და აბსურდია,”- წერს ღარიბაშვილი.
ივანიშვილი, როგორც გუნდის ლიდერი
ღარიბაშვილი თავის წერილში აღმატებული ტონით საუბრობს ბიძინა ივანიშვილზე და აღიარებს, რომ “ქართული ოცნების” “პოლიტიკურ გუნდს აქვს განსაკუთრებული დამოკიდებულება ბიძინა ივანიშვილის მიმართ”;
“მან 2011 წელს ქვეყნისთვის თავი გადადო და საქართველოს დემოკრატიული გარდატეხა მოუტანა”.
ღარიბაშვილი ამბობს, რომ ივანიშვილი პოლიტიკიდან კი წავიდა, მაგრამ ქვეყანა მისი დანატოვარი ღირებულებებით იმართება:
“პოლიტიკიდან გასვლისას სახელმწიფოს სამართავად სწორი ღირებულებები და თამაშის წესები დაგვიტოვა. ეს ღირებულებები და თამაშის წესებია სამშობლოს სიყვარული და კანონის პატივისცემა”.
“ივანიშვილის ფაქტორი” ქვეყანაში სერიოზულ როლს ასრულებს, წერს ღარიბაშვილი:
“მისი თავგანწირვითა და ახალი თამაშის წესების დამკვიდრებით მოიპოვა ის სიყვარული და პატივისცემა გუნდისგან და საზოგადოებისგან”
“ბიძინა ივანიშვილის წარსულს და ამ წარსულზე დაფუძნებულ სიყვარულსა და პატივისცემას ჩვენი ოპონენტები ვერაფერს უხერხებენ, რაც მათ სასოწარკვეთილებაში აგდებს”.
რა გადაწყვეტილებებში იღებს მონაწილეობას ივანიშვილი
“გუნდი არც ოპერატიულ და არც საკვანძო გადაწყვეტილებებს არ იღებს პოლიტიკიდან გასული ყოფილი ლიდერის კარნახით”, – წერს ღარიბაშვილი.
მისი თქმით, ის არ არის ჩართული არც ისეთი საკვანძო გადაწყვეტილებების მიღებაში, როგორიცაა რუსეთისთვის სანქციების არდაწესება და ომში ქვეყნის არჩართვა.
“თუ ვინმე ფიქრობს, რომ სანქციები ბიძინა ივანიშვილის კარნახით არ დავაწესეთ და ომშიც მისი კარნახით არ ჩავერთეთ, ძალიან ცდება. გუნდში ამ საკითხთან დაკავშირებით არავის რჩევა და კარნახი არ გვჭირდება. მიზეზი მარტივია – ჩვენც გვიყვარს ქვეყანა და საბედისწერო ომისთვის ის არც ჩვენ გვემეტება. შესაბამისად, ამ საკითხებზე გადაწყვეტილებები გუნდმა დამოუკიდებლად და სრული ერთსულოვნებით მიიღო.” – აღნიშნა ღარიბაშვილმა.
