რითი დაგვამახსოვრდა არჩევნები 2016
2016 წლის არჩევნები დასრულდა. პოლიტიკური ბატალიები ჯერ კიდევ წინაა, მაგრამ მანამდე თვალი გადავავლოთ წინასაარჩევნო პერიოდს. დაძაბულობის მიუხედავად, იყო ამბები, რამაც გაგვახალისა და სოციალური ქსელების ბესტსელერად იქცა.
ადამიანები, რომლებმაც პაატა ბურჭულაძის პარტია დატოვეს
გახსოვთ დღე, როდესაც საინფორმაციო საშუალებებში არ გასულა ინფორმაცია იმის შესახებ, რომ ცნობილი საოპერო ბანის პაატა ბურჭულაძის პარტია მისმა წევრებმა დატოვეს? ჩვენ არ გვახსოვს.
ისინი გადიოდნენ მასობრივად – სოფლებით და ქალაქებით, ათეულობით და ასეულობით. და ეს პროცესი რომ არასდროს დასრულდა, გამოითქვა ვარაუდი, რომ ბურჭულაძეს თავის პარტიაში ქართველები კი არა, ჩინელები ჰყავდა შეტყუებული.
“ჰეროკრატია
38 მილიონი დაჯდა რეჟისორ გოგა ხაინდრავას ფილმის გადაღება, რომლის მთავარი მიზანი იყო წინასაარჩევნოდ ქართველი ამომრჩევლისთვის სააკაშვილის ეპოქის ბნელი მხარეებისა და მისი ჰედონისტური მიდრელიკელებების შეხსენება. ფილმში ბევრია წამებისა და ძალადობის სცენა. თუმცა, სერიალის მაყურებელს აშკარად ის სცენები მოეწონა, სადაც საქართველოს ექს-პრეზიდენტი მასტურბირებს და ორგიაში მონაწილეობს.
ყოველი სერიის გასვლის შემდეგ, “ჰეროკრატიის ფეისბუკ- გვერდის ადმინი მაყურებლებთან ინტერაქციის დამყარებას ერთი და იგივე კითხვით ცდილობდა: “ნახეთ სერია? რას ფიქრობთ? ესენი [ნაციონალური მოძრაობა] უნდა დაბრუნდნენ ხელისუფლებაში?!“
კალაძე და რუსთავი2
ვინც “რუსთავი 2-ზე “ქართული ოცნების პარტიულ პრეზენტაციას უყურა, თამამად შეუძლია მომავალ წელს Friday 13-ის მორიგ სერიაზე წავიდეს.
პოლიტიკოსებსა და ჟურნალისტებს შორის ურთიერთობა ინტერვიუს ფარგლებს გადაცემის დასაწყისშივე გასცდა, ბოლოს კი იმით დასრულდა, რომ ენერგეტიკის მინისტრმა კახა კალაძემ მასთან პოლემიკაში შესულ ჟურნალისტს სარკეში ჩახედვა ურჩია – რას გავხარო. მეორე დღეს მთელი ფეისბუკი ამ თემას იხილავდა. იყო ასეთი პოსტებიც: “ვაიმე, ბოლომდე ვერ ვუყურე!!!
ივანიშვილის წინასაარჩევნო ტურნე
მისი ყოველი საჯარო გამოსვლა ნამდვილი დღესასწაულია სოციალური ქსელების მომხმარებლებისთვის და მათ ენამახვილობისა და იუმორის გამოჩენის უკიდეგანო შესაძლებლობებს აძლევს. წინასაარჩევნოდ ბევრი ასეთი იყო. ყოველ ორშაბათს და ხუთშაბათს ბიძინა ივანიშვილი რეგიონებს სტუმრობდა და ადგილობრივ ჟურნალისტებს პირდაპირ ეთერში ესაუბრებოდა.
იმ შეხვედრებიდან ჩვენი საყვარელი ციტატა ეს არის:
“კავკასიურ ტყვე ქალში”, არის სადღეგრძელო, სადაც არის ძირითადი ფილოსოფია ადამიანის სრულყოფაზე. მე ძალიან ბევრი დრო მაქვს დახარჯული, 40 წელიწადია ვაკვირდები ადამიანის განვითარების პროცესს. დაკავებული ვიყავი ფსიქოლოგიით, ფსიქოანალიზით, ფილოსოფიით, – განაცხადა მან ერთ-ერთ რეგიონულ შეხვედრაზე.
გივი კამიკაძე
არჩევნებამდე სამი დღით ადრე თბილისის ცენტრში დეპუტატ გივი თარგამაძის მანქანა აფეთქდა. დეპუტატი და მისი მძღოლი მანქანაში იყვნენ და სიკვდილს სასწაულით გადაურჩნენ. დაშავდა რამდენიმე გამვლელიც, რომლებიც მადლობა ღმერთს უკვე კარგად არიან. ერთი შეხედვით ამ მძიმე კრიმინალურ ისტორიის ადგილი ჩვენს არც ისე სერიოზულ რეიტინგში არ არის. თუმცა, აქაც არის სასაცილო ამბავი, რომელიც ფეისბუკმა აიტაცა – ხელისუფლება ერთ-ერთ ვერსიად სრული სერიოზულობით განიხილავდა იმას, რომ პოლიტიკური დივიდენდების მოპოვების მიზნით გივი თარგამაძემ საკუთარი თავი აიფეთქა. საინტერესოა, რაში გამოადგებოდა ეს დივიდენდენი, აფეთქება რომ უფრო “წარმატებულად” დასრულებულიყო. ასე დაერქვა გივი თარგამაძეს გივი კამიკაძე.
სააკაშვილი ზღვასა და გვირაბში
სააკაშვილის ფეისბუკ თუ სკაიპ ლაივები არჩევნები 2016-ის ნამდვილ ტრენდად იქცა. “სოლოლაკამდე გვირაბის გათხრა რომ დასჭირდეს, მიშა ამას გააკეთებს” – ყოფილი პირველი ლედის, სანდრა რულოვსის მიერ წარმოთქმული ეს ფრაზა ფრთიანად იქცა. ამას დაემატა არჩევნებამდე რამდენიმე დღით ადრე, თავად მიხეილ სააკაშვილის დაპირება, რომ სულ მალე იგი საქართველოში ზღვით ჩამოვიდოდა. დაბნეული ხალხი სოციალურ ქსელებში კითხულობდა – ბოლოსდაბოლოს ჩამოყალიბდა? რით ჩამოდის გვირაბით თუ ზღვით?
ბესიკ ჩუბინიძის წინასაარჩევნო პლაკატი
და არა მარტო მისი. აქ რამდენიმე დაუვიწყარი წინასარჩევნო არტი შევარჩიეთ:
გამოქვეყნებულია:11.10.2016
