რატომ არაა სააკაშვილზე რეაქციები ბაქოდან და ერევნიდან - კომენტარები

სააკაშვილის გარშემო შექმნილ სიტუაციაზე, აზერბაიჯანსა და სომხეთში 

რას ფიქრობენ აზერბაიჯანსა და სომხეთში, ბოლო თვის განმავლობაში განვითარებულ მოვლენებზე საქართველოში, სადაც დაპატიმრებული ექსპრეზიდენტი მიხეილ სააკაშვილი თითქმის 40 დღეა შიმშილობს, მისი მომხრეები კი მრავალათასიან საპროტესტო გამოსვლებს აწყობენ? 

ოფიციალური სტრუქტურები არც ერთი მეზობელი სახელმწიფოდან არც ერთხელ არ გამოსულან არანაირი კომენტარით.

JAMnews-მა შესთავაზა პოლიტიკურ ანალიტიკოსებს სომხეთსა და აზერბაიჯანში, კომენტარი გაეკეთებინათ სიტუაციაზე.  

პოლიტიკური მიმომხილველი შაჰინ ჯაფარლი, ბაქო 

„საქართველოში განვითარებულ მოვლენებზე აზერბაიჯანის ხელისუფლების მხრიდან რეაქციის არქონას, ქვეყნის საგარეო პოლიტიკის პრიზმაში უნდა შევხედოთ. სომხეთის გამოკლებით, რომელთანაც აზერბაიჯანს განსაკუთრებული ურთიერთობები აქვს, ქვეყნის ხელისუფლება არასოდეს აკეთებდა კომენტარს მეზობელ და მეგობრულ ქვეყანაში მიმდინარე მოვლენებზე. 

აზერბაიჯანში აგრეთვე არ არსებობს მეზობელი ქვეყნების ოპოზიციურ ძალებთან ურთიერთობების აწყობის პრაქტიკა. აზერბაიჯანის ხელისუფლებები მთავრობებთან მუშაობას ამჯობინებენ. 

რაც შეეხება თავად სიტუაციას საქართველოში, ის სერიოზულ შიშს აღძრავს. ეს მეზობელი ქვეყანა მრავალი წელი იყო ჩვენთვის რეგიონში დემოკრატიის ბურჯი. ეს ეხება მიხეილ სააკაშვილის პრეზიდენტობის პერიოდს და იმ პერიოდს, როდესაც მან ძალაუფლება მშვიდობიანი გზით გადასცა ახალარჩეულ ხელისუფლებას. 

მაგრამ იმას, რაც ახლა ამ ქვეყანაში ხდება, მას ძალიან აშორებს დემოკრატიისაგან. ოპოზიციასთან შეჯახებები, არჩევნების შედეგების ფალსიფიცირება, განსაკუთრებით, ამასწინანდელი მუნიციპალური არჩევნების მეორე ტურში, – ეს ყველაფერი არ შეესაბამება ამ ქვეყნის დემოკრატიულ იმიჯს. 

ხოლო ხელისუფლების დამოკიდებულება პოლიტიკოსის მიმართ, რომელიც ამ ქვეყნის პრეზიდენტი იყო, საერთოდ დამთრგუნველია. ცდილობენ მის დამცირებას ყველა შესაძლო საშუალებით, მოტყუებით გადაჰყავთ სხვა ციხეში – იქმნება მისი სიცოცხლისთვის საფრთხის შემცველი ყველანაირი პირობა მიუხედავად იმისა, რომ ექსპრეზიდენტმა შიმშილობა გამოაცხადა.  

არავისთვისაა საიდუმლო, რომ ალიევსა და სააკაშვილს პირადი მეგობრული ურთიერთობები აკავშირებდა. და სავსებით შესაძლებელია, რომ დახურული არხებით კონსულტაციები მიმდინარეობდეს. 

მაგრამ მე, ქართული ოპოზიციის მსგავსად, ველოდები უფრო გადამწყვეტ მოქმედებებს აშშ-ისა და ევროკავშირისგან. ამ დასავლურ ძალებს გაცილებით დიდი გავლენა აქვთ საქართველოს პოლიტიკაზე, ვიდრე მეზობელ ქვეყნებს. დიახ, დასავლეთმა უკვე გამოხატა შეშფოთება მომხდართან დაკავშირებით, მაგრამ უფრო კატეგორიული აზრი და ჩარევა  მიზანშეწონილი იქნებოდა“. 

• არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
• “მმართველი პარტია ევროკავშირისგან ისე შორსაა, როგორც არასდროს” – ევროპარლამენტარების გამოხმაურება
• უკრაინული მიშა

პოლიტიკური მიმომხილველი აკოპ ბადალიანი, ერევანი 

„მიმაჩნია, რომ სიტუაცია საქართველოში – ეს საქართველოს საშინაო საქმეა. ოფიციალურ ერევანს არ გააჩნია მიზეზი, ჩაერიოს და რაიმე პოზიცია გამოხატოს. ხოლო ის, რომ საქართველოში სტაბილურობა, ყოველთვის მნიშვნელოვანი ფაქტორია სომხეთისთვის – ამის თაობაზე რეგულარულად ლაპარაკობენ. 

საქართველოში უკვე დიდი ხანია ძალიან რთული შიდაპოლიტიკური სიტუაციაა. ისღა დაგვრჩენია, იმედი ვიქონიოთ, რომ საქართველოში მოვლენების განვითარება არ მივა რაიმე მადესტაბილიზებელ სცენარამდე, რადგან სომხეთისთვის ეს გარემოება უკიდურესად მნიშვნელოვანია“. 

ექსპერტი საქართველოს საკითხებში, ჯონი მელიქიანი, ერევანი 

„ის რაც საქართველოში ხდება, ლოგიკურია, ეს საქართველოში ბოლო წლების შიდაპოლიტიკური პროცესების გაგრძელებაა. 

სომხეთის მხრიდან რეაქციაზე ლაპარაკი ზედმეტია, რადგან ეს საქართველოს საშინაო საქმეა. თუ გავიხსენებთ იმას, რომ რამდენიმე დღის წინ ნიკა გვარამიამ ნავალნისა და ფაშინიანს მიმართა და უთხრა, რომ საქართველო სააკაშვილის საქმეზე პასუხს ელოდება, ვფიქრობ, სწორი იქნება, ნიკა გვარამიას შევახსენოთ, რომ სააკაშვილთან დაკავშირებით არსებობს ორი სასამართლო გადაწყვეტილება, რამდენიმე საქმეზე კი პროცესები მიმდინარეობს.  

ამას გარდა, სააკაშვილი საქართველოში უკანონო გზით დაბრუნდა, არ მგონია, მოსალოდნელი იყოს, რომ მის დაპატიმრებასთან დაკავშირებით ვინმეს შეკითხვები გასჩენოდეს. 

შეგახსენებთ, რომ ევროპა და აშშ ოფიციალურად არ შესწინააღმდეგებიან ან არ უცდიათ სააკაშვილის დაპატიმრების თავიდან არიდება. თუმცა,  დღეს ჩნდება კითხვები, რომლებიც დაკავშირებულია მის უსაფრთხოებასა და ჯანმრთელობასთან. 

სომხურ-ქართული ურთიერთობები ბოლო წლების განმავლობაში საკმაოდ დინამიკურია და სავსებით დადებით შედეგებს იძლევა. არ ვფიქრობ, რომ საჭირო იყოს ჩარევა და სომხურ-ქართული ურთიერთობების გართულება“.