პარლამენტმა 2023 წლის ბიუჯეტი დაამტკიცა. რაში ვხარჯავთ 21.9 მილიარდ ლარს?

რაში ვხარჯავთ 21.9 მილიარდ ლარს

პარლამენტმა 2023 წლის სახელმწიფო ბიუჯეტი დაამტკიცა. პროექტის მიხედვით, საქართველოს 2023 წლის სახელმწიფო ბიუჯეტის ჯამური მაჩვენებელი, წინა წლის გეგმასთან შედარებით, 2 მილიარდ 61 მილიონ 900 ათასი ლარითაა გაზრდილი რაც ნიშნავს იმას, რომ ის 21 მილიარდ 914 მილიონ 200 ათას ლარს შეადგენს (გაზრდილია 612 200 000 ლარით). 

მაკროეკონომიკური მაჩვენებლებით რეალური ეკონომიკური ზრდა 5%-ის ფარგლებშია დაგეგმილი.

მომავალი ფისკალური წლის სამინისტროების დაფინანსებისთვის განსაზღვრული თანხობრივი მოცულობები შემდეგია:

• საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო – 6 858 420 000 ლარი;
• რეგიონული განვითარებისა და ინფრასტრუქტურის სამინისტრო – 3 330 920 000 ლარი;
• განათლებისა და მეცნიერების სამინისტრო – 2 030 780 700 ლარი;
• თავდაცვის სამინისტრო – 1 260 000 000 ლარი;
• შინაგან საქმეთა სამინისტრო –1 106 000 000 ლარი;
• გარემოს დაცვისა და სოფლის მეურნეობის სამინისტრო – 698 480 000 ლარი;
• ეკონომიკისა და მდგრადი განვითარების სამინისტრო – 558 180 000 ლარი;
• კულტურის, სპორტისა და ახალგაზრდობის სამინისტრო – 431 232 000 ლარი;
• იუსტიციის სამინისტრო – 392 400 000 ლარი;
• საგარეო საქმეთა სამინისტრო – 186 000 000 ლარი;
• ფინანსთა სამინისტრო – 106 000 000 ლარი.

2023 წლისთვის სახელმწიფო ბიუჯეტის შემოსავლები 17 619 000 000 ლარზე მეტი ოდენობითაა განსაზღვრული. აქედან გადასახედებიდან მიღებული შემოსავლების ოდენობა დაახლოებით 16 290 000 000 მილიონია, გრანტებიდან – 279 000 000 ლარზე მეტი, ხოლო სხვა შემოსავლებიდან 1 050 000 000 ლარზე მეტის მიღებაა გათვალისწინებული. 

გადასახადებიდან მიღებული შემოსავლების კლასიფიკაცია შემდეგია:

• საშემოსავლო გადასახადი – 5 140 000 000 ლარი;
• მოგების გადასახადი – 2 000 000 000 ლარი;
• დამატებითი ღირებულების გადასახადი – 6 670 000 000 ლარი;
• აქციზი – 2 100 000 000 ლარი;
• იმპორტის გადასახადი – 130 000 000 ლარი;
• სხვა გადასახადი – 250 000 000 ლარი.

● რუსეთიდან ნაღდი ფულით: რუსები გარბიან, საქართველოში ეკონომიკური ბუმია
● საქართველოს მთავრობა: 2030 წლისთვის საქართველო მაღალი შემოსავლების მქონე ქვეყნების რიგში გადაინაცვლებს
● საქართველოს უმსხვილესი სავაჭრო პარტნიორები ჩინეთი, თურქეთი და რუსეთი არიან

წელს იანვარ-სექტემბერში საქართველოს ეკონომიკა 10.2 პროცენტით გაიზარდა. ამასთან, ეროვნული ბანკის შეფასებით, მიმდინარე წელს ეკონომიკური ზრდა 10 პროცენტი იქნება, რაშიც მიგრაციის ფონზე გაზრდილი ტურისტული შემოსავლები მნიშვნელოვან წვლილს შეიტანს.

აღსანიშნავია, რომ აზიის განვითარების ბანკის (ADB) ერთ-ერთი მაღალჩინოსნის, ლიაზიზა საბიროვას განმარტებით, მიგრანტების შემოდინებამ საქართველოს ეკონომიკაზე დადებითად იმოქმედა, თუმცა ეს ერთჯერადი ეფექტია.

თითქმის ამავე აზრზეა ევროპის რეკონსტრუქციისა და განვითარების ბანკის (EBRD) კავკასიის რეგიონული დირექტორი, კატარინა ბიორლინ ჰანსენი. მისი თქმით, არსებობს კითხვები იმასთან დაკავშირებით, თუ რამდენად მდგრადია ამჟამად საქართველოში არსებული ორნიშნა ეკონომიკური ზრდა, რეგიონში არსებული არასტაბილური ვითარების ფონზე.

მიუხედავად ეკონომიკური ზრდის სწრაფი დინამიკისა, საქართველოში პროდუქტებზე ფასები კატასტროფულად იზრდება. მწარმოებლები გაზრდილ ფასებს რუსეთის მიერ უკრაინაში შეჭრას, რუსეთიდან გაძნელებული ლოგისტიკას და მსოფლიო ბაზარზე პროდუქციასა და ნედლეულზე გაზრდილი ფასებს უკავშირებენ.

აღსანიშნავია ისიც, რომ კვლევითი ორგანიზაცია PMCG-ის ცნობით, 2010 წლიდან 2020 წლამდე საქართველოდან ემიგრაციაში წასული ადამიანების ჯამური რაოდენობა 7 პროცენტით გაიზარდა და 861,000 ადამიანი შეადგინა, რაც ქვეყნის მოსახლეობის 23 პროცენტია.