აშშ-ს ელჩი საქართველოში, კელი დეგნანი ვიზის გაცემასთან დაკავშირებით “ქართული ოცნების” თავმჯდომარის, ირაკლი კობახიძის განცხადებას ეხმაურება და ამბობს, რომ ვიზის მისაღებად გამჭვირვალე წესები არსებობს.
17 მაისს, “ქართული ოცნების” თავმჯდომარემ განაცხადა, რომ თუ კელი დეგნანი თვლის, რომ “რუსეთთან პირდაპირი ფრენები და უვიზო მიმოსვლა იწვევს დაახლოებას ქვეყანასთან, მაშინ რატომ არ ხდება ეს საქართველოსა და აშშ-ს შორის”.
კობახიძემ მკაცრი სავიზო რეჟიმის მაგალითად ანსამბლი “მართვე” მოიყვანა, რომელიც მისი თქმით, ივლისში უნდა გამგზავრებულიყო აშშ-ში, თუმცა საელჩომ ვიზის გაცემის ვადები ნოემბრამდე დაუსახელა, რის გამოც ისინი ვერ გაემგზავრნენ. ის ელჩს მოუწოდებს, “ასეთ რაღაცებს მიხედოს და არა იმას, რომ სხვა ქვეყანა კონკრეტულ ნაბიჯებს დგამს”.
კობახიძის თქმით, ამერიკის ელჩი მსგავს საკითხებს უნდა აქცევდეს ყურადღებას და უმჯობესია, თვითონ გადადგან ისეთი ნაბიჯები, რაც სავიზო რეჟიმის გამარტივებას უკავშირდება.
“სამწუხაროა, რომ იმედმა აირჩია და არაზუსტი ინფორმაცია გაავრცელა ამასთან დაკავშირებით. მე გეტყვით, რომ ყოველ წელს ათასობით ქართველი მიემგზავრება ამერიკაში, გვაქვს ამის გარდა კულტურული და საგანმანათლებლო გაცვლითი პროგრამები და სხვადასხვა ასეთი პროგრამები, რომელთა მეშვეობით ქართველები ამერიკის შეერთებულ შტატებში მიემგზავრებიან. მაგალითისთვის, გასულ თვეს, ბალეტის ზუსტად 30 მოცეკვავეს მიეცა ვიზები, ისინი აშშ-ში შეასრულებენ ბალეტს. გასულ კვირას მოცეკვავეებს და მომღერლებს მიეცათ ვიზები, რომლებიც მიდიან ამერიკაში, რომ დამოუკიდებლობის დღისადმი მიძღვნილ ღონისძიებაში მიიღონ მონაწილეობა. არსებობს გარკვეული წესები, ნაბიჯები ვიზის მისაღებად, ეს არის გამჭვირვალე და მოცემულია ჩვენს ვებსაიტზე. ჩვენ, ასევე, ვაძლევთ რეკომენდაციებს იმასთან დაკავშირებით, თუ როგორ შეიძლება დაჩქარდეს ვიზის გაცემა, მაგრამ მნიშვნელოვანია ის წესები, რომლებიც ვიზის მისაღებად საჭიროა, იყოს შესრულებული”. – თქვა კელი დეგნანმა.
ელჩი რუსეთსა და საქართველოს შორის აღდგენილ ფრენებსაც შეეხო და განაცხადა, რომ ქვეყანა, რომელიც არის ოკუპირებული, რომლის ტერიტორიების 20% არის ოკუპირებული რუსეთის მიერ, რომლის 8 მოქალაქე არის დაკავებული რუსული ძალების მიერ სამხრეთ ოსეთში, სადაც რუსული ძალების მიერ განგრძობადი წნეხის ქვეშ არიან, “უნდა იყოთ” ძალიან ფრთხილად, მათი მიღებისას:
“მე ვხედავ, რომ რუსეთი საქართველოსთან ურთიერთობის ნორმალიზებას ცდილობს. ვფიქრობ, მნიშვნელოვანი კითხვაა – რატომ? რატომ მიდის რუსეთი ახლა ამ დათმობაზე და რატომ გთავაზობთ მსგავს რამეს? რა იქნება რუსეთთან პირდაპირი ფრენების აღდგენის საფასური, სავიზო რეჟიმის გაუქმებისა და რკინიგზის აღდგენის საფასური, რომელიც საქართველოს რუსეთთან აფხაზეთის გავლით დააკავშირებს? ჩვენ ყველამ ვიცით, რომ პუტინი არაფერს გასცემს საფასურის დაკისრების გარეშე.”
10 მაისს რუსეთის პრეზიდენტმა ვლადიმერ პუტინმა ხელი მოაწერა საქართველოს მოქალაქეებისთვის სავიზო რეჟიმის გაუქმების შესახებ დოკუმენტს 2023 წლის 15 მაისიდან. მეორე განკარგულებით კი, პუტინმა გააუქმა რუსეთიდან საქართველოში საჰაერო მიმოსვლის აკრძალვა.
დოკუმენტის მიხედვით, გამონაკლისს წარმოადგენენ „მოქალაქეები, რომლებიც შედიან რუსეთის ფედერაციაში შრომითი საქმიანობის განსახორციელებლად ან 90 დღეზე მეტი ვადით, მათ შორის განათლების მიღების მიზნით“.
პუტინმა კიდევ ერთი განკარგულებით რუსეთის პრეზიდენტმა რუსული ავიაკომპანიებისთვის საქართველოში ფრენებზე აკრძალვა მოიხსნა.
დოკუმენტის თანახმად, რუსეთის ფედერაციის პრეზიდენტის 2019 წლის 21 ივნისის ბრძანება ძალადაკარგულად გამოცხადდა, რომელიც რუსულ ავიაკომპანიებს საქართველოსა და რუსეთს შორის ფრენას უკრძალავდა.
ამ დრომდე რუსეთთან სავიზო რეჟიმი ცალმხრივად იყო გაუქმებული. ე.წ. გავრილოვის ღამის შემდეგ კი რუსეთმა 2019 წლის ივლისიდან საქართველოსთან პირდაპირი ფრენებიც შეწყვიტა.
