საფრანგეთის პრეზიდენტი ბიძინა ივანიშვილს ესაუბრა

საფრანგეთის პრეზიდენტი ემანუელ მაკრონი თავისი ინიციატივით ესაუბრა “ქართული ოცნების” საპატიო თავმჯდომარეს, ბიძინა ივანიშვილს. ელისეს სასახლის ცნობით, მაკრონმა აქციებზე დაკავებულთა გათავისუფლება მოითხოვა. ასევე მან გამოთქვა სინანული, რომ საქართველომ გადაუხვია ევროპულ ტრაექტორიას, რაც აუცილებლად იმოქმედებს ევროკავშირისა და საქართველოს ურთიერთობაზე.

„საფრანგეთის პრეზიდენტმა დაგმო სამოქალაქო საზოგადოებისა და ოპოზიციის წარმომადგენლების დაშინება, ასევე პოლიციის ძალადობა მშვიდობიანი დემონსტრანტებისა და ჟურნალისტების მიმართ და მოითხოვა, გაათავისუფლონ ყველა, ვინც თვითნებურად დააკავეს და პატივი სცენ გამოხატვისა და შეკრების თავისუფლებას. მან კიდევ ერთხელ გამოთქვა სინანული, რომ საქართველომ გადაუხვია ევროპულ ტრაექტორიას და თქვა, რომ ევროკავშირსა და საქართველოს ურთიერთობაზე აუცილებლად იმოქმედებს მიღებული გადაწყვეტილებები”, – ვკითხულობთ ელისეს სასახლის მიერ გავრცელებულ ინფორმაციაში.

• “დაუყოვნებლივ უნდა გათავისუფლდნენ ადამიანები, რომლებიც სარგებლობდნენ მშვიდობიანი შეკრების უფლებით” – აშშ-ს საელჩო
• საქართველოში გრძელდება დაუმორჩილებლობა, გაფიცვა, რეჟიმთან დაპირისპირება. აქ ასეთ შემთხვევებს ვუყრით თავს
• “ბოლო 12 დღის მოვლენების საპასუხოდ, ყველა ვარიანტი მაგიდაზეა, უვიზოს შეჩერებაც” – ევროკავშირის ელჩი

მათივე ცნობით, მაკრონმა ივანიშვილს მოუწოდა ინკლუზიური დიალოგისკენ ყველა პოლიტიკურ ჯგუფთან და სამოქალაქო საზოგადოების წარმომადგენლებთან, ასევე ქართველი ხალხის ევროპული და დემოკრატიული მისწრაფებების პატივისცემისკენ.

ივანიშვილისა და მაკრონის საუბრის შესახებ ინფორმაცია გაავრცელა “ქართულმა ოცნებამაც”. მათი ცნობით, მაკრონის საუბარი პარტიის საპატიო თავმჯდომარესთან საფრანგეთის პრეზიდენტის ინიციატივით შედგა და ერთ საათს გაგრძელდა. მხარეები შეთანხმდნენ, რომ მომდევნო დღეებში კვლავ შედგება კონტაქტი და შეფასდება მიღწეული პროგრესი.

“მაკრონმა აღნიშნა, რომ წუხს საქართველოში შექმნილი ვითარების გამო და ამ ვითარების სრულად განმუხტვაში თავისი წვლილის შეტანის სურვილი გამოთქვა. თავის მხრივ, ბიძინა ივანიშვილმა საფრანგეთის პრეზიდენტს ინიციატივისათვის მადლობა გადაუხადა და ერთობლივი ძალისხმევის იდეას მიესალმა”, – აღნიშნულია “ქართული ოცნების” მიერ 11 დეკემბერს გავრცელებულ განცხადებაში.

• პროევროპული პროტესტის 300-ზე მეტი მონაწილე ნაცემი და დაკავებულია. აქ მათ ისტორიებს ვაგროვებთ. განახლებადი
• გაერთიანებული სამეფო საქართველოს მთავრობის პროგრამულ მხარდაჭერას აჩერებს
• ვგმობთ ჟურნალისტების წინააღმდეგ განხორციელებულ წამებას, ძალადობას, შევიწროებას და დაშინებას – ონლაინ მედიები

ბიძინა ივანიშვილი ბოლო პერიოდის განმავლობაში უარს ამბობდა ევროპელ და ამერიკელ მაღალჩინოსნებთან შეხვედრებზე. “ქართული ოცნების” ლიდერები განმარტავდნენ, რომ ამის მიზეზი იყო “ფინანსური შანტაჟი” დასავლეთის მხრიდან. არჩევნებამდე ივანიშვილმა გამოთქვა მზაობა, შეხვედროდა ამერიკის შეერთებული შტატების ელჩს რობინ დანიგანს, თუმცა ეს შეხვედრა არ შედგა.

მაკრონისა და ივანიშვილის სატელეფონო საუბრამდე 4 დღით ადრე, 7 დეკემბერს პრეზიდენტმა ემანუელ მაკრონიმ საქართველოს პრეზიდენტს სალომე ზურაბიშვილს უმასპინძლა. ზურაბიშვილი პარიზის ღვთისმშობლის ტაძრის გახსნას დაესწრო და მაკრონისთან ერთად ამერიკის ახლადარჩეულ პრეზიდენტს დონალდ ტრამპსაც ესაუბრა.

„სიღრმისეული განხილვა მქონდა პრეზიდენტ ტრამპთან და პრეზიდენტ მაკრონთან. ვამხილე მოპარული არჩევნები და უკიდურესად საგანგაშო რეპრესიები ქართველი ხალხის წინააღმდეგ. ხაზი გავუსვი ძლიერი აშშ-ს საჭიროებას. ქართველ ხალხს დონალდ ტრამპის სახით მეგობარი ჰყავს. ღმერთმა დალოცოს ამერიკის შეერთებული შტატები“, – დაწერა სალომე ზურაბიშვილმა X-ზე ევროპელ და ამერიკელ ლიდერებთან შეხვედრის შემდეგ.