ევროკავშირის საგარეო მინისტრები საქართველო-მოლდოვაში პრორუსი ოლიგარქების სანქცირებას ითხოვენ - POLITICO

პრორუსი ოლიგარქები საქართველო-მოლდოვაში

ევროკავშირის წევრი ქვეყნების რამდენიმე საგარეო საქმეთა მინისტრმა ევროკავშირს მოუწოდა სანქციები დაუწესდეს მოლდოველ და ქართველ ოლიგარქებს, რომლებიც ჩართული არიან “დესტაბილიზაციის მცდელობებში”, ამის შესახებ ავტორიტეტული გამოცემა POLITICO წერს.

“ეს ორი ქვეყანა დესტაბილიზაციის მცდელობების საფრთხის წინაშეა, რასაც ჩვენი ძალიან ფხიზლად ყოფნა სჭირდება და ამან შესაძლოა გაამართლოს ჩვენ მიერ დაფიქრება, სამიზნედ გავხადოთ ისინი, ვინც ამ მცდელობებზე პასუხისმგებლები არიან”. – თქვა საფრანგეთის საგარეო საქმეთა მინისტრმა, კატერინ კოლონამ ევროკავშირის საგარეო საქმეთა მინისტერიალის წინ.

რუმინელმა და ესტონელმა საგარეო საქმეთა მინისტრებმა ასევე მოუწოდეს ბლოკს მოლდოვაში პრორუსი ოლიგარქებისთვის სანქციების დაწესებისკენ.

ესტონეთის საგარეო საქმეთა მინისტრმა, ურმას რეინსალუმ აღნიშნა, რომ ევროკავშირს აკისრია პასუხისმგებლობა, გამოიყენოს და შექმნას “სანქციების ახალი მექანიზმი რუსი მარიონეტული აგენტების წინააღმდეგ.”

“იმავდროულად, ათასობით ადამიანმა ორი კვირის წინ თბილისში გამოაცხადა საპროტესტო აქცია “უცხოელი აგენტების” საკამათო კანონპროექტის წინააღმდეგ, რომელიც საქართველოს პრეზიდენტის თქმით, მოსკოვის მიერ იყო ნაკარნახევი.

მმართველმა პარტიამ “ქართულმა ოცნებამ” მხარი დაუჭირა კანონპროექტს სამი დღის შემდეგ – მაგრამ ქართველების მზარდი რაოდენობა შიშობს, რომ მათი მთავრობა მოსკოვთან დაახლოებას ექვემდებარება.

პარტიის დამფუძნებელს, ექს-პრემიერ ბიძინა ივანიშვილს მჭიდრო კავშირები აქვს რუსეთთან, სადაც მან თავისი ქონება 1990-იან წლებში ააშენა.”– ვკითხულობთ სტატიაში.

Politico ასევე წერს, რომ მოლდოვას ევროკავშირის კანდიდატის სტატუსი მიენიჭა უკრაინასთან ერთად – მაშინ, როდესაც საქართველოს მოუწევს რამდენიმე რეფორმის განხორციელება, მათ შორის ოლიგარქების პოლიტიკური და ეკონომიკური გავლენის შეზღუდვა.

პრორუს მოლდოველ ოლიგარქს, ილან შორს ბრალად კიშინიოვის პროევროპული მთავრობის წინააღმდეგ საპროტესტო აქციების დაფინანსება ედება.

● სერგეი ლავროვი: ქართული მხარე ჯერ კიდევ ფიქრობს 3+3 ფორმატში გაწევრიანებაზე, თბილისისთვის კარი ღიაა
● “შეიძლება ევროპა მართლაც არ არის სათქვენო” – დასავლელი პარტნიორები ღარიბაშვილის ინტერვიუს ეხმაურებიან
● საპროტესტო ბანერები – აგენტების წინააღმდეგ მიმდინარე დემონსტრაციებიდან

ევროკომისიამ საქართველოს, უკრაინისა და მოლდოვის ევროკავშირის წევრობის კანდიდატის სტატუსის მინიჭების საკითხზე 2022 წლის 17 ივნისს დასკვნა მოამზადა. შედეგად, უკრაინა და მოლდოვა მიიღებენ ევროკავშირის კანდიდატობის სტატუსს და დაეკისრებათ გარკვეული ვალდებულებების შესრულება, ხოლო საქართველოს ჯერ 12 პუნქტიანი გეგმის და პირობების შესრულება დაევალება, შემდეგ კი კანდიდატობის სტატუსის მიღების შანსი ექნება.

ევროპის საბჭოს საპარლამენტო ასამბლეამ (PACE) კი 2022 წლის 13 ოქტომბერს რუსეთის რეჟიმი ტერორისტულად გამოაცხადა და გახდა პირველი საერთაშორისო ორგანიზაცია, რომელმაც მსგავსი აქტი მიიღო. საქართველოს მმართველი პარტია აცხადებს, რომ იზიარებს PACE-ის რეზოლუციის ზოგად სულისკვეთებას, თუმცა დოკუმენტს მხარი არ დაუჭირა, რადგან არ ეთანხმება ჩანაწერს ექსპრეზიდენტ მიხეილ სააკაშვილის პოლიტპატიმრობის შესახებ.

რეზოლუციაში შესწორების სახით დამატება მოგვიანებით შევიდა, სადაც ასამბლეა ითხოვს რუსეთის ფედერაციასა და სხვა ქვეყნებში “პრეზიდენტ პუტინის მოწინააღმდეგე პოლიტპატიმრების, მათ შორის უკრაინის მოქალაქისა და საქართველოს ყოფილი პრეზიდენტის, მიხეილ სააკაშვილის საქმეების განხილვასა და მათ გათავისუფლებას.”

აღსანიშნავია, რომ 2022 წლის 8 ნოემბერს ევროპარლამენტარებმა ბრიუსელში, საგარეო კომიტეტის სხდომაზე, საქართველოს ევროკავშირთან ასოცირების შეთანხმების დანერგვის ყოველწლიური ანგარიში განიხილეს. მიღებული კომპრომისული დოკუმენტის მიხედვით, ბიძინა ივანიშვილი აღარ არის ნახსენები როგორც ოლიგარქი, თუმცა დეოლიგარქიზაციის პუნქტის თავშივე მოცემულია მისი სახელი და გვარი და წერია, რომ აუცილებელია ივანიშვილის ჭარბ გავლენებთან დაკავშირებით მიღებული იყოს, მათ შორის, საკანონმდებლო გადაწყვეტილებები.

მიმდინარე წლის 3 თებერვალს ევროკომისიამ საქართველოს, უკრაინისა და მოლდოვის ევროკავშირის კანონთა კრებულთან (EU acquis) შესაბამისობის შესახებ ანგარიში გამოაქვეყნა და საქართველოს თანხვედრას ევროკავშირის საგარეო პოლიტიკასთან “საშუალოდ მომზადებულად” შეაფასა.